1, 2. Kɛ fɔli kɛ jokuɛwi nuɔ he ha kɛɛ, se mɛni peemi yee ha mɛ be komɛ?

“KE EKO Ɔ, o ná le kaa o fɔli ma gbo hwɔɔ ɔ, mɛni o maa suɔ wawɛɛ kaa o ma de mɛ mwɔnɛ ɔ?” Enɛ ɔ ji sane ko nɛ a bi jokuɛwi lafahi a bɔ nɛ a ngɛ United States ɔ. A ti nihi fuu tsɔɔ kaa a be nyagbahi nɛ ngɛ a kɛ a fɔli ɔmɛ a kpɛti ɔ he munyu tue. Mohu ɔ, a ma de a fɔli ɔmɛ ke: “I kpa nyɛ pɛɛ” kɛ “I suɔ nyɛ saminya.”—Womi nɛ ji, For Parents Only, nɛ Shaunti Feldhahn kɛ Lisa Rice ngma.

² Bimɛ suɔ a fɔli, nɛ fɔli hu suɔ a bimɛ. Enɛ ɔ ji anɔkuale, titli ɔ, ngɛ Kristofoli a wekuhi a mi. Se be komɛ ɔ, e yee ha fɔli kɛ bimɛ kaa a maa sɛɛ ní. Mɛni heje nɛ e baa jã a? Mɛni heje nɛ fɔli kɛ bimɛ nyɛ we nɛ a sɛɛɔ ní komɛ a he ní ɔ? Mɛni fɔli kɛ bimɛ ma nyɛ maa pee konɛ a nyɛ nɛ a sɛɛ ní saminya?

3. (a) Mɛni heje nɛ e yee ha wekuhi fuu kaa a maa sɛɛ ní saminya a? (b) Mɛni heje nɛ e yi ha wekuhi nɛ a hi si ngɛ Israel ɔ kaa a maa sɛɛ ní ɔ?

³ E yee kɛ haa wekuhi fuu kaa a ma ná be babauu kɛ sɛɛ ní. Se ngɛ Israelbi ɔmɛ a be ɔ mi ɔ, e be jã. Mose de tsɛmɛ nɛ a ngɛ Israel ɔ ke: “Nyɛɛ tsɔɔ nyɛ bimɛ [Mawu mlaa a.] Nyɛɛ sɛɛ he ní be nɛ nyɛ ngɛ we mi, be nɛ nyɛ hia blɔ, be nɛ nyɛ hwɔɔ si, kɛ be nɛ nyɛ te si.” (5 Mose 6:6, 7) Jamɛ a be ɔ mi ɔ, jokuɛwi kɛ a nyɛmɛ hiɔ we mi, aloo a kɛ a papaamɛ yaa ngmɔ mi aloo e nítsumi he ligbi ɔ tsuo. Be babauu ngɛ kɛ ha fɔli kɛ bimɛ nɛ a kɛ a he ma nyɛ maa sɛɛ ní. Lɔɔ he ɔ, e yi ha fɔli kaa a maa le níhi nɛ he hia a bimɛ ɔmɛ, níhi nɛ a suɔ, kɛ a suhi. Jã kɛ̃ nɛ bimɛ hu leɔ a fɔli ɔmɛ saminya.

4. Mɛni ha nɛ e yee ha wekuhi nɛ ngɛ mwɔnɛ ɔ kaa a maa sɛɛ ní ɔ?

 ⁴ Si himi nɛ ngɛ mwɔnɛ ɔ ngɛ slɔɔto! Ngɛ ma komɛ a nɔ ɔ, jokuɛwi jeɔ sukuu sisi mla. Be komɛ ɔ, a jeɔ sukuu sisi benɛ a ye jeha enyɔ pɛ. Tsɛmɛ kɛ nyɛmɛ fuu yaa nítsumi ngɛ hehi nɛ kɛ. Nɛ ke fɔli kɛ a bimɛ a nya ba kpe si ngɛ we mi ɔ, a puɛɔ be ɔ ngɛ TV kɛ computer, kɛ mobile phone he. Ngɛ wekuhi fuu a mi ɔ, fɔli kɛ bimɛ li a he saminya. Eko ɔ, a sɛɛ we ní kulaa po.

5, 6. Mɛni tsakemihi fɔli komɛ pee bɔnɛ pee nɛ a ná deka kɛ ha a bimɛ?

⁵ Anɛ o ma nyɛ ma susu blɔhi a nɔ nɛ o maa gu kɛ ná deka ha o weku ɔ he lo? (Kane Efesobi 5:15, 16.) Weku komɛ ma nya si kaa, a ma je be nɛ a kɛ hyɛɔ TV, kɛ be nɛ a puɛɔ ngɛ computer he ɔ nɔ. Weku komɛ hu bɔɔ mɔde kaa ke e hi hluu ɔ, a ma bla kɛ ye ní si kake daa ligbi. Weku Mawu Jami blɔ nya tomi ɔ yeɔ bua fɔli kɛ bimɛ nɛ a leɔ a he saminya, nɛ a peeɔ kake kɛ kaseɔ Baiblo ɔ! Se pi Weku Mawu Jami be pɛ nɛ e sa kaa wekuhi nɛ a pee kake kɛ sɛɛ ní. E sa nɛ a sɛɛ ní daa. Loko o bi ɔ maa je we ɔ mi kɛ ya sukuu ɔ, mo de lɛ nɔ́ ko nɛ maa wo lɛ he wami, nyɛ susu daa ligbi ngmami ɔ he, aloo o kɛ lɛ nɛ sɔle. Ke o pee jã a, e maa ye bua lɛ ligbi ɔ tsuo.

⁶ Fɔli komɛ nyɛ nɛ a pee tsakemihi ngɛ a si himi mi bɔnɛ pee nɛ a ná deka kɛ ha a bimɛ. Kaa nɔ hyɛmi nɔ́ ɔ, yo ko nɛ a tsɛɛ lɛ ke Laura, * nɛ e ngɛ bimɛ tsɔwi enyɔ ɔ, kpa helo nya nítsumi nɛ a kɛ be tsuo tsuɔ ɔ konɛ e ná deka kɛ ha e bimɛ. E de ke: “Ke jena mɔtu ɔ, wɔ tsuo wa yeɔ oya kɛ yaa nítsumi aloo sukuu. Nɔ nɛ hyɛɔ ye bimɛ ɔmɛ ha mi ɔ, hyɛɔ mɛ nɛ a hwɔɔ mahe loko i baa we mi gbɔkuɛ. Amlɔ nɛ ɔ, akɛnɛ i kpa nítsumi heje ɔ, i be sika tsɔ, se i nuɔ he kaa i le níhi nɛ ye bimɛ ɔmɛ a susuɔ kɛ a haomihi. I buɔ níhi nɛ a deɔ ngɛ sɔlemi mi ɔ tue, nɛ i yeɔ bua mɛ, nɛ i woɔ mɛ he wami, nɛ i tsɔɔ mɛ ní.”

7. Mɛni ji haomi nɛ fɔli kɛ jokuɛwi tsuo tuɔ he munyu?

⁷ Nihi nɛ a ngma womi nɛ ji, For Parents Only ɔ bi nihewi kɛ yihewi fuu munyu, nɛ a kadi nɔ́ ko hu nɛ haa nɛ e yee ha fɔli kaa a kɛ a bimɛ maa sɛɛ ní. A tsɔɔ kaa: “Nɔ́ kake nɛ jokuɛ ɔmɛ tsɔɔ kaa e haoɔ mɛ wawɛɛ ngɛ a fɔli a he ji kaa, ke a ngɛ munyu tue ɔ, ‘Fɔli ɔmɛ bui tue.’” Tsa pi jokuɛwi pɛ nɛ a nuɔ he jã. Behi fuu ɔ, fɔli hu deɔ jã ngɛ a bimɛ a he. Bɔnɛ pee nɛ ní sɛɛmi nɛ ya nɔ ngɛ weku ɔ mi ɔ, e sa nɛ weku mi bi ɔmɛ tsuo nɛ a bu a sibi tue saminya.​—Kane Yakobo 1:19.

8. Mɛni blɔ nɔ fɔli maa gu kɛ bu a bimɛ tue saminya?

⁸ Fɔli, anɛ nyɛ buɔ nyɛ bimɛ tue saminya lo? Ke pɔ tɔ o he aloo ke o susu kaa nɔ́ nɛ jokuɛ ɔ ngɛ dee ɔ he hia we tsɔ ɔ, e maa ye kaa o maa bu lɛ tue. Se munyu nɛ o susu kaa e he hia we ɔ ma nyɛ maa pee nɔ́ nɛ he hia o bi ɔ wawɛɛ. Ke a ke nɔ ‘he nɛ sɔ kɛ nɔ́ tue bumi’ ɔ, e tsɔɔ kaa e sa nɛ e bu nɔ́ nɛ e bi ɔ ngɛ dee kɛ bɔnɛ e ngɛ munyu ɔ tue ha a tue saminya. Gbi nɛ o bi ɔ kɛ ngɛ munyu ɔ tue kɛ bɔnɛ e ngɛ e ní pee ha a maa ye bua mo konɛ o na nɔ́ nɛ ngɛ e tsui mi. E he hia hu nɛ o bi o bi ɔ sanehi. Baiblo ɔ ke: “Juɛmi nɛ ngɛ nɔmlɔ adesa yi mi ɔ, e mi kuɔ kaa nyu ngɛ vu mi tsitsaa lokoo. Se ní lelɔ jeɔ juɛmi nɛ ɔ kpo ngɛ be nɛ sa mi.” (Abɛ 20:5) Nɔ́ se yomi kɛ nile he hia, titli ɔ, ke o suɔ nɛ o le ní komɛ nɛ o bi ɔ sume nɛ e tuɔ he munyu ɔ.

9. Mɛni heje nɛ e sa kaa jokuɛwi nɛ a bu a fɔli tue ɔ?

⁹ Jokuɛwi, anɛ nyɛ buɔ nyɛ fɔli tue lo? Mawu Munyu ɔ deɔ ke: “Ye bi, ke o tsɛ ngɛ mo tsɔsee ɔ, bu tue! Ke o nyɛ hu ngɛ mo ní tsɔɔe ɔ, ko kua.” (Abɛ 1:8) Mo kai kaa o fɔli ɔmɛ suɔ mo, nɛ a suɔ nɛ e hi ha mo, lɔɔ he ɔ, nile ngɛ mi kaa o maa bu mɛ tue. (Efe. 6:1) Ke ní sɛɛmi kpakpa ngɛ o kɛ o fɔli nyɛ kpɛti, nɛ o kai kaa a suɔ mo ɔ, e he be wae ha mo kaa o maa bu mɛ tue. Mo de o fɔli bɔnɛ o susuɔ ngɛ níhi a he ha. Lɔɔ maa ye bua mɛ konɛ a nu mo sisi. E sa kaa mo hu o bɔ mɔde kaa o maa nu mɛ sisi.

10. Mɛni wa kaseɔ ngɛ Rehoboam he sane nɛ ngɛ Baiblo ɔ mi ɔ mi?

¹⁰ E sa nɛ o hyɛ saminya ngɛ ga nɛ o juami bimɛ maa wo mo ɔ he. E ma nyɛ maa pee mo kaa a ga womi ɔ hi, se eko ɔ, e be mo ye buae kulaa. Ngɛ anɔkuale mi ɔ, e ma nyɛ maa ye mo awi po. Nihewi kɛ zangmawi be nile kɛ níhi a si kpami nɛ nikɔtɔmahi ngɛ ɔ. Enɛ ɔ he ɔ, a susuu we bɔnɛ yi mi kpɔ nɛ a mwɔɔ mwɔnɛ ɔ maa sa a he ha hwɔɔ se ɔ he. Mo kai nɔ́ nɛ Matsɛ Salomo binyumu Rehoboam pee ɔ. Benɛ a wo lɛ matsɛ ngɛ Israel ɔ, jinɛ e sa kaa e bu nikɔtɔmahi a ga womi tue. E ya bu e juamibi nihewi nɛ e kɛ mɛ je nɔ ɔ mohu a ga womi tue. Enɛ ɔ he ɔ, nihi nɛ a ngɛ e matsɛ yemi ɔ mi ɔ tsɔ e hɛ mi atua. (1 Ma. 12:1-17) Koo pee kaa Rehoboam. O kɛ o fɔli nɛ susu bɔnɛ o nuɔ níhi a he ha a he. Moo bu a ga womi tue, nɛ o kase ní kɛ je nile nɛ a ngɛ ɔ mi.—Abɛ 13:20.

11. Ke fɔli ná we deka kɛ ha a bimɛ ɔ, mɛni maa je mi kɛ ba?

¹¹ Fɔli, anɛ nyɛ suɔ kaa nyɛ bimɛ ɔmɛ nɛ a bi ga womi kɛ je nyɛ ngɔ mohu pe nɛ a ma bi ga womi ngɛ a juami bimɛ a ngɔ lo? Ke jã a, lɛɛ nyɛ ná deka kɛ ha mɛ, nɛ nyɛ kɛ mɛ nɛ sɛɛ ní. Nyɛmiyo wayoo ko ngma ke: “Ke i tsɛ niheyo ko biɛ pɛ, kɛkɛ ye fɔli a  hɛ mi tsake. Enɛ ɔ haoɔ mi nɛ e yee ha mi kaa ma tsa ní sɛɛmi ɔ nɔ.” Nyɛmiyo wayoo ko hu ngma ke: “Nihewi kɛ yihewi fuu suɔ nɛ a fɔli nɛ wo mɛ ga, se ke a na kaa fɔli ɔmɛ ngɔɛ a munyu ɔ kaa nɔ́ ko nɛ he hia a, a ya biɔ ga womi ngɛ nɔ ko nɛ e be níhi a si kpami po ngɔ.” Ke o suɔ kaa o maa je mi mi himi mi kɛ bu munyu saisaa nɛ o bimɛ ɔmɛ maa tu ɔ tue ɔ, o maa na kaa a bua maa jɔ kaa a kɛ mo maa sɛɛ ní, nɛ a maa suɔ kaa a kɛ o ga womi ma tsu ní.

12. Mɛni blɔ nɔ nɛ fɔli a ní peepee ma ha nɛ a bimɛ kɛ mɛ be ní sɛɛe?

¹² Bɔnɛ fɔli peeɔ a ní ha a hu ma nyɛ ma ha nɛ e maa ye ha a bimɛ kaa a kɛ mɛ maa sɛɛ ní. Fɔli komɛ ngɛ nɛ eko ɔ, ke a bimɛ kɛ mɛ ngɛ nɔ́ ko he munyu tue ɔ, kɛkɛ a mi mi fu nɔuu. “Nyagbe ligbi” nɛ ɔmɛ ngɛ oslaa, nɛ e sa nɛ fɔli nɛ bu a bimɛ ɔmɛ a he. (2 Tim. 3:1-5) Se nɔ́ nɛ fɔli ma susu kaa e ji he bumi ɔ, a bimɛ ɔmɛ ma nyɛ maa na lɛ kaa nya tsimi.

13. Mɛni heje nɛ e sɛ kaa fɔli yeɔ oya kɛ jeɔ a susumi kpo ɔ?

¹³ E sa nɛ fɔli nɛ hyɛ saminya nɛ a ko ye oya kɛ je a susumi kpo. E ji anɔkuale kaa, ke o bi wo o mi mi la a, e yee kaa o maa pee kɔ̃. Se e sa nɛ o bu o bi ɔ tue saminya loko o tu munyu. Matsɛ Salomo nɛ ji nilelɔ ɔ ngma ke: “Ke a ngɛ mo munyu tue ɔ, bu tue loko o ha heto. Ke o pee we jã a, a ma tsɛ mo kuasia, nɛ o hɛ mi ma pue si.” (Abɛ 18:13) Ke o to o tsui si nɛ o bu o bi ɔ tue ɔ, o ma nyɛ maa nu nɔ́ heje nɛ o bi ɔ ngɛ “munyu tue basabasa a” sisi. (Hiob 6:1-3) Loko o ma nyɛ maa ye bua o bi ɔ, ja o bu nɔ́ nɛ e ngɛ dee ɔ tue. Kaa fɔlɔ nɛ o ngɛ suɔmi ɔ, moo bu o bi ɔ tue, nɛ o bɔ mɔde kaa o maa nu lɛ sisi bɔnɛ pee nɛ o nyɛ nɛ o de lɛ nɔ́ ko nɛ maa ye bua lɛ.

14. Mɛni heje nɛ e sɛ kaa jokuɛwi a he nɛ sɔ kɛ tu munyu ɔ?

¹⁴ Jokuɛwi, nyɛ hu nyɛ he ‘nɛ ko sɔ kɛ tu munyu.’ Nyɛ kai kaa Mawu kɛ blɔ nya nítsumi wo nyɛ fɔli a dɛ kaa a tsɔse nyɛ, lɔɔ he ɔ, nyɛ ko tsɔ atua kɛ si nyɛ fɔli ɔmɛ. (Abɛ 22:6) Eko ɔ, a kɛ si himi nɛ nyɛɛ kɛ ngɛ kpee amlɔ nɛ ɔ eko kpe hyɛ benɛ a ngɛ kaa nyɛ ɔ. Jehanɛ hu ɔ, a pia a he ngɛ ní komɛ nɛ a pee benɛ a wɛ ɔ he, nɛ a suɔ nɛ a po nyɛ he piɛ konɛ nyɛ ko pee jã. Lɔɔ he ɔ, nyɛɛ na nyɛ fɔli kaa nyɛ huɛmɛ, se pi nyɛ he nyɛli; nyɛɛ na mɛ kaa nyɛ ga woli, se pi nihi nɛ a teɔ si kɛ woɔ nyɛ. (Kane Abɛ 1:5.) “Bu o o tsɛ kɛ o nyɛ,” nɛ o kɛ tsɔɔ mɛ kaa o suɔ mɛ kaa bɔnɛ mɛ hu a suɔ mo ɔ. Ke o pee jã a, e be yee ha mɛ kaa a ma ‘tsɔse mo nɛ a wo mo ga kpakpa nɛ maa sa Yehowa hɛ mi.’—Efe. 6:2, 4.

15. Mɛni maa ye bua wɔ konɛ waa to wa tsui si kɛ ha nihi nɛ wa suɔ mɛ ɔ?

¹⁵ Tsa pi be tsuaa be nɛ wa toɔ wa tsui si kɛ haa nihi nɛ wa suɔ mɛ ɔ. Bɔfo Paulo ngma kɛ ya ha Kristofoli nɛ a ngɛ Kolose ɔ ke: “Nyɛ hunomɛ, nyɛɛ suɔ nyɛ yi ɔmɛ, nɛ nyɛ ko wa mɛ yi mi. Tsɛmɛ, nyɛ ko wo nyɛ bimɛ ɔmɛ a mi mi la; ke nyɛ pee jã a, a nine mi maa wo nyu.” (Kol. 1:1, 2; 3:19, 21) Paulo de Efesobi ɔmɛ ke: “Nyɛ ha nɛ mi mi doomi, hɛdɔ, mi mi la, kɛ muklii mi fumi se nɛ po ngɛ nyɛ kpɛti.” (Efe. 4:31) Ke wa je Mawu mumi ɔ yiblii komɛ kaa tsui si tomi, he si bami, kɛ he nɔ yemi kpo ɔ, e maa ye bua wɔ nɛ ke wa ngɛ nɔ nyɛmi sisi po ɔ, wa maa to wa tsui si.—Gal. 5:22, 23.

16. Kɛ Yesu plɛ kɛ dla e kaseli ɔmɛ a susumi kɛɛ, nɛ mɛni heje nɛ enɛ ɔ sa kadimi wawɛɛ ɔ?

 ¹⁶ Mo susu nɔ hyɛmi nɔ́ nɛ Yesu pee ɔ he nɛ o hyɛ. Moo po bɔnɛ Yesu hao wawɛɛ ha benɛ e kɛ e kaseli ɔmɛ ngɛ nyagbe gbɔkuɛ ní yee ɔ he foni ngɛ o juɛmi mi nɛ o hyɛ. Yesu le kaa e be kɛe nɛ e ma gbo gbenɔ yeyee. E le kaa e Tsɛ ɔ biɛ he tsɔmi kɛ adesahi a yi wami hemi daa si ngɛ anɔkuale nɛ e maa ye ɔ nɔ. Se ngɛ ní yemi ɔ sisi ɔ, “kaseli ɔmɛ sɔuu ba bɔni nya sami kaa a kpɛti mɛnɔ lɛ sa kaa a buu nɔmlɔ nguaa pe kulaa.” Yesu kpa we ngmlaa kɛ wui a yi, nɛ e mi mi fu we mɛ. Mohu ɔ, e to e tsui si nɛ e kɛ mɛ susu níhi a he. Yesu kai mɛ kaa a kɛ lɛ fĩ si ngɛ e kaa amɛ a mi. E ngɛ mi kaa Satan maa ka mɛ mohu lɛɛ, se Yesu tsɔɔ kaa e ngɛ hɛ kɛ nɔ fɔmi kaa a maa ye anɔkuale. E kɛ mɛ pee somi po.—Luka 22:24-32.

17. Mɛni maa ye bua jokuɛwi konɛ a to a tsui si?

¹⁷ E sa kaa jokuɛwi hu nɛ a to a tsui si. Ke a ye kɛ je jeha 13 kɛ ya si jeha 19 ɔ, a nuɔ he kaa blɔ tsɔɔmi nɛ a fɔli kɛ haa mɛ ɔ tsɔɔ kaa a fɔli ɔmɛ he we mɛ yi. Ke be komɛ o nuɔ he jã a, mo kai kaa suɔmi nɛ o fɔli ngɛ kɛ ha mo ɔ heje nɛ a kɛ blɔ tsɔɔmi haa mo ɔ nɛ. Ke o to o tsui si nɛ o bu o fɔli ɔmɛ tue nɛ o kplɛɛ a blɔ tsɔɔmi nɔ ɔ, a ma na bumi kɛ ha mo, nɛ a ma ná hɛ kɛ nɔ fɔmi ngɛ o mi. Enɛ ɔ ma ha nɛ eko ɔ, o fɔli ma ha mo he blɔ babauu ngɛ ní komɛ a mi. Ke o yeɔ o he nɔ ɔ, e tsɔɔ kaa o ngɛ nile. Baiblo ɔ de ke: “Kuasia jeɔ e we abofu tsuo kpo; se ní lelɔ lɛɛ e toɔ e tsui si kɛ tsiɔ abofu nya.”—Abɛ 29:11.

18. Mɛni blɔ nɔ suɔmi yeɔ bua wekuhi nɛ a sɛɛɔ ní ngɛ?

¹⁸ Lɔɔ he ɔ, fɔli kɛ bimɛ nɛ a suɔ, ke nyɛ sɛɛ we ní ngɛ nyɛ weku ɔ mi kaa bɔnɛ nyɛ ngɛ hlae ɔ, nyɛ kɔni mi nɛ ko jɔ̃. Nyɛɛ ya nɔ nɛ nyɛɛ bɔ he mɔde, nɛ nyɛɛ ya nɔ nɛ nyɛɛ nyɛɛ ngɛ anɔkuale ɔ mi. (3 Yoh. 4) Ngɛ je ehe ɔ mi ɔ, wa maa ye mluku, nɛ wa be ní sɛɛmi he haomi ko náe. Se amlɔ nɛ ɔ lɛɛ, wɔ tsuo wa peeɔ ní komɛ nɛ pee se ɔ, wa piaa wa he. Lɔɔ he ɔ ke o tɔ̃ ɔ, o kɛ oya yemi nɛ kpa pɛɛ. Ke a tɔ̃ o nɔ ɔ, mo kɛ pa faa. Nyɛ ha ‘suɔmi nɛ ha nɛ nyɛɛ pee kake.’ (Kol. 2:2) Suɔmi ngɛ he wami. ‘Suɔmi toɔ e tsui si, nɛ e mi mi hi. E mi mi wui la. E kɛ nɔ ko tɔmi wui e mi. E haa nɔ toɔ e tsui si ngɛ nɔ́ tsuaa nɔ́ mi, e haa nɔ heɔ nɔ́ tsuaa nɔ́ yeɔ, e heɔ níhi kulaa yeɔ, e miaa e hɛ mi ngɛ níhi tsuo mi.’ (1 Kor. 13:4-7) Ke nyɛ ya nɔ nɛ nyɛ je suɔmi kpo ɔ, nyɛ maa sɛɛ ní ngɛ nyɛ weku ɔ mi, nɛ nyɛ ma ná bua jɔmi, nɛ e maa wo Yehowa hɛ mi nyami.