MUNYU nɛ ɔ ji anɔkuale nitsɛnitsɛ! Ngɛ je nɛ ɔ mi ɔ, behi fuu ɔ, wa wami be ɔ peeɔ kɛ “haomi kɛ aywilɛho sɔuu.” Eko ɔ, o biɔ ke, ‘Anɛ wa tsui ma nyɛ maa nɔ wa mi nitsɛnitsɛ ngɛ si himi mi lo?’

Kaa nɔ hyɛmi nɔ́ ɔ, ha nɛ wa susu Maria he nɛ waa hyɛ. Jinɛ e ji nɔ ko nɛ e ngɛ he wami be tsuaa be, se amlɔ nɛ ɔ, e ye jeha 84, e yɛ kpo nɛ e yɛ dɔ. E juɛmi ngɛ ní tsue pɛpɛɛpɛ, se e nɔmlɔtso ɔ gbɔjɔ. Kɛ e ma plɛ kɛ nu he kaa e tsui nɔ e mi ngɛ si himi mi kɛɛ?

Nɛ mo hu nɛɛ? Eko ɔ, be komɛ ɔ, o biɔ o he ke: ‘Anɛ ye tsui nɔɔ ye mi ngɛ si himi mi aloo ye tsui nɔɛ ye mi?’ Eko ɔ, nítsumi nɛ o tsuɔ ɔ, lɔɔ kɛkɛ nɛ o tsuɔ daa. Eko ɔ, nítsumi ɔ he wa, nɛ e haa nɛ pɔtɔɔ o he. Eko ɔ, ngɛ mɔde nɛ o bɔɔ aloo ní nɛ o tsuɔ ɔ tsuo se ɔ, nihi bui o he akɔtaa. Ke níhi a mi hi ha mo bɔnɛ sa po ɔ, eko ɔ, o haoɔ ngɛ nɔ́ nɛ ma nyɛ maa ba hwɔɔ se ɔ he. Be komɛ hu ngɛ nɛ eko ɔ, o hɛ jaa aloo o haoɔ. Eko ɔ, kunɔ kɛ pɛ sɔuu nɛ yaa nɔ ngɛ o weku ɔ mi. Eko ɔ, o suɔlɔ ko gbo hyɛ. Mo susu André he nɛ o hyɛ. Nyu bi ngɛ e kɛ e papaa a kpɛti. Tlukaa a, hiɔ ba fia André papaa nɛ e gbo. Nɔ́ nɛ ɔ hao André wawɛɛ, nɛ e nu he kaa nɔ́ ko be nɛ ma nyɛ maa wo e bua.

Ke waa kɛ haomi aloo aywilɛho si himi ko kpe ɔ, nɔ́ nɛ wa suɔ wawɛɛ kaa wa maa le ji: Anɛ wa tsui ma nyɛ maa nɔ wa mi nitsɛnitsɛ ngɛ si himi mi lo? Wa ma nyɛ maa na sane bimi nɛ ɔ heto ke wa susu Yesu Kristo nɛ e ba zugba a nɔ maa pee jeha 2,000 ji nɛ ɔ he. Ngɛ haomihi tsuo nɛ Yesu kɛ kpe ɔ se ɔ, e tsui nɔ e mi ngɛ si himi mi. Wɔ hu wa tsui ma nyɛ maa nɔ wa mi ngɛ si himi mi ke wa kase e nɔ hyɛmi nɔ́ ɔ.