1. Mɛni Yehowa je e suɔmi mi nɛ e baa yi konɛ adesahi nɛ a ná he se?

YEHOWA, “Mawu nɛ gbo we nɛ e ngɛ daa” a baa e sɛ gbi nɛ haa nɔ wami ɔ yi kɛ ha adesahi. Wa ngɛ nɔ mi mami kaa e sɛ gbi ɔ maa hi si daa, ejakaa “Yehowa munyu ɔ ngɛ kɛ yaa neneene.” (1 Pet. 1:23-25; Byington) E sa nɛ wa bua nɛ jɔ kaa Yehowa je e suɔmi mi nɛ e baa e sɛ gbi nɛ e he hia a yi ngɛ Baiblo ɔ mi ha wɔ!

2. Mɛni Mawu suɔ nɛ waa le ngɛ e he?

² Mawu suɔ nɛ wɔ tsuo waa le e biɛ. Kekleekle be nɛ Ngmami ɔ wo Mawu biɛ nɛ ji ‘Yehowa’ a nɔ ta ji benɛ Ngmami ɔ ngɛ bɔnɛ Mawu plɛ kɛ “bɔ” hiɔwe kɛ zugba a he munyu tue ɔ. (1 Mose 2:4) Mawu gu nyakpɛ blɔ nɔ nɛ e ngma e biɛ ɔ si abɔ ngɛ Kita Nyɔngma a nɛ e ngma kɛ fɔ tɛ tɛtlɛɛhi a nɔ ɔ mi. Kaa nɔ hyɛmi nɔ́ ɔ, kekleekle kita a kane ɔ ke: ‘Imi ji Yehowa, o Mawu ɔ nɛ.’ (2 Mose 20:1-17) Ngɛ mɔde nɛ Satan bɔ kaa e ma ha nɛ Yehowa biɛ ɔ nɛ la a tsuo se ɔ, Yehowa biɛ ɔ laa we, ejakaa Nyɔmtsɛ Matsɛ Yehowa baa e Munyu ɔ kɛ e biɛ ɔ yi.—La 73:28.

3. E ngɛ mi kaa jami mi lakpa tsɔɔmihi pɔhe ngɛ je ɔ mi mohu lɛɛ, se mɛni Mawu ha nɛ wa le?

³ Jehanɛ se hu ɔ, Yehowa baa anɔkuale ɔ yi ngɛ e Munyu ɔ hu mi. E ngɛ mi kaa jami mi lakpa tsɔɔmihi pɔhe ngɛ je ɔ mi mohu lɛɛ, se wa bua jɔ wawɛɛ kaa Mawu ha nɛ wa le Baiblo ɔ mi anɔkuale ɔ! (Kane La 43:3, 4.) Ngɛ be mi nɛ adesahi babauu ngɛ nyɛɛe ngɛ diblii mi ɔ, wɔɔ lɛɛ waa kɛ bua jɔmi ngɛ nyɛɛe ngɛ mumi mi la nɛ Mawu ha wɔ ɔ nya.—1 Yoh. 1:6, 7.

4, 5. Mɛni he blɔ ngua wa ná ngɛ jeha 1931 ɔ mi?

⁴ Wɔ Kristofoli lɛɛ wa ngɛ gbosi ní ko nɛ e he jua wa. Munyunguhi a sisi tsɔɔmi womi ko nɛ a tsɛɛ ke Collins Cobuild English Dictionary ɔ de ke: “Ma ko mi  gbosi ní ji suhi nɛ nihi jeɔ kpo, aloo ní peepeehi nɛ yaa nɔ ngɛ ma a mi kɛ je blema.” Mawu Munyu ɔ mi anɔkuale nile nɛ wa ná, kɛ Mawu kɛ e yi mi tomi ɔ he anɔkuale ɔ nɛ wa le ɔ hu ji wa mumi mi gbosi ní ɔ ekomɛ. Yehowa ha wɔ he blɔ ngua ko hulɔ.

⁵ He blɔ nɛ ɔ ba piɛɛ wa mumi mi gbosi ní nɛ wa ná ngɛ kpe ngua nɛ wa pee ngɛ Columbus, Ohio, U.S.A., ngɛ 1931 ɔ he. A ngma Blɛfo gbi ningma okadi nɛ ji “JW” ngɛ kpe ɔ blɔ nya tomi womi ɔ nɔ. Nyɛmiyo ko de ke: “Nihi hɛɛ juɛmi slɔɔtoslɔɔtohi ngɛ nɔ́ nɛ JW ɔ daa si kɛ ha a he.” Jinɛ a tsɛɛ wɔ ke Baiblo kaseli, se ngɛ Hɔgba, July 26, 1931 ɔ nɔ ɔ, wa mwɔ wa yi mi kpɔ kaa wa suɔ nɛ a tsɛ wɔ ke Yehowa Odasefoli. Wa bua jɔ wawɛɛ kaa a kɛ Ngmami ɔ mi biɛ nɛ ɔ tsɛɔ wɔ. (Kane Yesaya 43:12.) Nyɛminyumu ko de ke: “Ye hɛ be bɔnɛ nihi kpa ngmlaa nɛ a gbɔ vu ha a nɔ jee gblegbleegble.” Jami kuu kpa ko be je ɔ mi nɛ e suɔ biɛ nɛ ɔ, se Mawu wo wɔ biɛ nɛ ɔ pe jeha nyingmi kpaanyɔ ji nɛ ɔ. Moo hyɛ he blɔ ngua nɛ wa ná kaa wa ji Yehowa Odasefoli!

6. Mɛni anɔkuale nile hu nɛ piɛɛ wa mumi mi gbosi ní ɔ he?

⁶ Baiblo ɔ mi munyuhi nɛ kɔɔ Mawu sɔmɔli nɛ hi si blema a he anɔkuale nile nɛ wa ná a hu ji nɔ́ kpa ko nɛ piɛɛ wa mumi mi gbosi ní ɔ he. Kaa nɔ hyɛmi nɔ́ ɔ, nyɛ ha nɛ wa susu Abraham, Isak, kɛ Yakob a he nɛ waa hyɛ. Eko ɔ, Mawu sɔmɔli nɛ ɔmɛ nɛ a hi si blema a kɛ a wekuhi susu níhi nɛ ke a pee ɔ, a maa sa Yehowa hɛ mi ɔ he. Enɛ ɔ he ɔ, e be nyakpɛ mɔ kaa Yosef tu ajuama bɔmi nya fo konɛ e ko “pee yayami kɛ si Mawu.” (1 Mose 39:7-9) Ngɛ kaseli ɔmɛ a be ɔ mi ɔ, Kristofoli ɔmɛ kɛ a nyɛmimɛ sɛɛɔ bɔnɛ a ma plɛ kɛ ja Mawu ha a he ní. Paulo de Kristofoli asafo ɔmɛ nɔ́ nɛ Yesu tsɔɔ lɛ kɛ kɔ Nyɔmtsɛ ɔ Gbɔkuɛ Niye ní ɔ he. (1 Kor. 11:2, 23) Mwɔnɛ ɔ, a ngma bɔnɛ e sa kaa wa ja Mawu ngɛ “mumi kɛ anɔkuale mi” ha a ngɛ e Munyu nɛ ji Baiblo ɔ mi. (Kane Yohane 4:23, 24.) Baiblo ɔ ma nyɛ maa ye bua adesahi tsuo, se e sa nɛ wɔ nɛ wa ji Yehowa sɔmɔli ɔ, wa bua nɛ jɔ he wawɛɛ.

7. Mɛni si womi nɛ ngɛ bua jɔmi nɛ piɛɛ wa gbosi ní ɔ he?

⁷ Munyuhi nɛ a ngma lingmi nɛ ɔ ngɛ wa womihi a mi nɛ tsɔɔ kaa ‘Yehowa kɛ wɔ ngɛ’ ɔ hu piɛɛ wa mumi mi gbosi ní ɔ he. (La 118:7) Enɛ ɔ heje ɔ, ke a ngɛ wɔ yi mi wae po ɔ, wa nuɔ he kaa wa ngɛ slɔkee. Wa mumi mi gbosi ní kpa ko hu ji si womi nɛ ngɛ bua jɔmi nɛ nyɛɛ se nɛ ɔ nɛ: ‘Ta hwumi níhi nɛ a sɔ̃ nɛ ɔmɛ ekoeko be nyɛe maa pee mo nɔ́ ko; jehanɛ hu, nɔ tsuaa nɔ nɛ kɛ mo ma ná sane ɔ, a maa bu lɛ fɔ. Yehowa sɔmɔli a gbosi ní ji nɛ ɔ nɛ, nɛ a dami ɔ je ye ngɔ, Yehowa lɛ e de.’ (Yes. 54:17) Satan ta hwumi nɔ́ ko be nyɛe maa ye wɔ awi kɛ ya neneene.

8. Mɛni he wa ma susu ngɛ munyu nɛ ɔ kɛ munyu nɛ nyɛɛ enɛ ɔ se nɛ wa maa kase ɔ mi?

 ⁸ Satan bɔ mɔde kaa e ma kpata Mawu Munyu ɔ hɛ mi konɛ e ha nɛ biɛ Yehowa a kɛ anɔkuale ɔ nɛ laa. Se e yi manye. Ngɛ munyu nɛ ɔ kɛ nɔ́ nɛ wa maa kase kɛ nyɛɛ enɛ ɔ se ɔ mi ɔ, wa maa na (1) bɔnɛ Mawu plɛ kɛ baa e Munyu ɔ yi ha; (2) bɔnɛ Yehowa plɛ kɛ baa e biɛ ɔ yi ha; kɛ (3) bɔnɛ mwɔnɛ ɔ, wa hiɔwe Tsɛ ɔ ha nɛ wa le anɔkuale ɔ ha.

9-11. Mɛni nɔ hyɛmi níhi nɛ tsɔɔ kaa nihi bɔ mɔde kaa a ma kpata Baiblo ɔ hɛ mi se a yi manye?

⁹ Nihi bɔ mɔde kaa a ma kpata Mawu Munyu ɔ hɛ mi, se Yehowa baa yi. Womi nɛ ji, Enciclopedia Cattolica (Catholic Encyclopedia) a de ke: ‘Ngɛ jeha 1229 ɔ mi ɔ, Katoliki jami ɔ pee kpe ko ngɛ Toulouse, nɛ a wo mlaa ke nɔ ko nɛ ko kane Baiblohi nɛ a tsɔɔ sisi kɛ ya gbi kpahi a mi ɔ. A wo mlaa nɛ ɔ ejakaa Katoliki jami ɔ kɛ nihi nɛ a tuɔ munyu kɛ siɔ sɔlemi ɔ mi tsɔɔmihi ɔ ngɛ masɔ yee. James nɛ ji kekleekle nɔ ɔ wo mlaa nɛ ɔ nɔuu kɛ̃ ngɛ jeha 1234 ɔ mi ngɛ kpe nɛ Katoliki jami ɔ pee ngɛ Tarragona, ngɛ Spain. Ngɛ jeha 1559 ɔ mi ɔ, Paul nɛ ji eywiɛne ɔ wo mlaa kaa e sɛ nɛ nɔ ko nɛ fia Baiblo ɔ aloo e hɛɛ eko ngɛ e dɛhe be mi nɛ Katoliki Jami Yi ɔ ha we lɛ he blɔ. Enɛ ɔ ji kekleekle be nɛ jami yi ɔ kɛ e he wo munyu nɛ ɔ mi.’

¹⁰ Ngɛ mɔde nɛ nihi bɔ kaa a ma kpata Baiblo ɔ hɛ mi tsuo se ɔ, Yehowa baa Baiblo ɔ yi. Maa pee jeha 1382 ɔ, John Wycliffe kɛ nihi nɛ piɛɛ e he ɔ tsɔɔ Baiblo ɔ sisi kɛ ya Blɛfo gbi mi. William Tyndale hu ji Baiblo sisi tsɔɔlɔ kpa ko. A gbe lɛ ngɛ jeha 1536 mi. A fi lɛ kɛ wo tso he, nɛ nihi tsɔɔ kaa e kpa ngmlaa ke, “Nyɔmtsɛ, mo bli England matsɛ ɔ hɛngmɛ.” Kɛkɛ nɛ a gbe lɛ nɛ a sã lɛ.

¹¹ Nihi nɛ a bɔ mɔde kaa a ma kpata Baiblo ɔ hɛ mi ɔ nyɛ we nɛ a pee jã. Kaa nɔ hyɛmi nɔ́ ɔ, ngɛ jeha 1535 ɔ mi ɔ, Miles Coverdale hu tsɔɔ Baiblo ɔ sisi kɛ ya Blɛfo gbi mi. Coverdale hyɛ bɔnɛ Tyndale tsɔɔ “Somi He” ɔ kɛ Mose Kekleekle Womi ɔ kɛ ya si Kronika nɛ ngɛ “Somi Momo” ɔ mi ɔ sisi ha a nɔ kɛ tsɔɔ e nɔ ɔ sisi. E tsɔɔ Ngmami ɔ mi womi ɔ ekomɛ a sisi kɛ je Latin gbi mi kɛ Baiblo nɛ Martin Luther tsɔɔ sisi kɛ ya Germany gbi ɔ mi ɔ mi hulɔ. Mwɔnɛ ɔ, nihi a bua jɔ New World Translation of the Holy Scriptures ɔ he, ejakaa e mi tɛ̃, nɛ e da, nɛ e kɛ nítsumi yi ngɛ fiɛɛmi nítsumi ɔ mi. Wa bua jɔ kaa daimonio ko aloo adesa nɔ yelɔ ko nyɛ we nɛ e kpata Yehowa Munyu ɔ hɛ mi.

12. Mɛni blɔ nɔ nɛ New World Translation ɔ baa Mawu biɛ ɔ yi ngɛ?

¹² Yehowa Mawu bɔ mɔde kaa e ma ha nɛ a baa e biɛ ɔ yi ngɛ e Munyu ɔ mi.  New World Translation ɔ tsu yi mi tomi nɛ ɔ he ní wawɛɛ nitsɛ. Ngɛ e nya tsɔɔmi munyu ɔ mi ɔ, ajla toli nɛ a tsɔɔ sisi ɔ ngma ke: “A kpale ngma Mawu biɛ ɔ ngɛ hehi nɛ e je kpo ngɛ ɔ. Mawu biɛ ɔ ji nɔ́ titli nɛ je kpo ngɛ Baiblo nɛ ɔ mi. A ngma Mawu biɛ nɛ ji Yehowa a si 6,973 ngɛ Hebri Ngmami ɔ mi, kɛ si 237 ngɛ Kristofoli a Hela Ngmami ɔ hu mi.” Amlɔ nɛ ɔ, a tsɔɔ New World Translation mluku ɔ loo e fã ko sisi kɛ ya gbihi nɛ hiɛ pe 116 mi, nɛ yibɔ nɛ a pee ɔ hiɛ pe 178,545,862.

13. Mɛni heje nɛ wa ma nyɛ ma de ke kɛ je benɛ Mawu bɔ adesahi tɔɔ nɛ e ha nɛ a le biɛ ɔ?

¹³ Kɛ je be nɛ Mawu bɔ adesahi tɔɔ nɛ e ha nɛ a le e biɛ. Adam kɛ Hawa le Mawu biɛ nɛ a le bɔnɛ a tsɛɛ Mawu biɛ ɔ ha tutuutu. Benɛ Ham je nɔ buimi kpo kɛ tsɔɔ e tsɛ nɛ ji Noa ngɛ Nyu Afua a se ɔ, Noa de ke: ‘A je Yehowa, Shem Mawu ɔ yi! Kanaan [Ham binyumu ɔ] maa pee Shem nyɔguɛ.’ (1 Mose 4:1; 9:26) Mawu nitsɛ de ke: ‘Ye biɛ ji Yehowa; imi pɛ ji Mawu. I be ye hɛ mi nyami ɔ ngɔe kɛ ha mawu kpahi, nɛ ye yi jemi ɔ hu i be ngɔe kɛ ha amagahi.’ Mawu de hu ke: ‘Imi ji Yehowa; ye se ɔ, Mawu kpa ko be hu.’ (Yes. 42:8; 45:5) Yehowa ha nɛ a baa e biɛ ɔ yi nɛ a tsɔɔ nihi e biɛ ɔ ngɛ je kɛ wɛ. E ji he blɔ ngua nɛ wa ná kaa waa kɛ Mawu biɛ ɔ ngɛ ní tsue, nɛ wa ngɛ lɛ sɔmɔe kaa e we Odasefoli! Enɛ ɔ he ɔ, wa deɔ ke: “Wa ma wo aflangaa nɔ ngɛ wa Mawu ɔ hɛ mi kɛ tsɔɔ kaa wa bua jɔ.”—La 20:5.

14. Ngɛ Baiblo ɔ se ɔ, jije hu nɛ nihi na Mawu biɛ ɔ ngɛ?

¹⁴ Pi Baiblo ɔ mi pɛ nɛ Mawu biɛ ngɛ. Mo susu Moab Tɛ nɛ a na ngɛ Dhiban (Dibon) nɛ lejɛ ɔ kɛ Ngo Wo ɔ he kɛ mi ji si tomi 13 ngɛ puje he blɔ ɔ he nɛ o hyɛ. A ngma Israel Matsɛ Omri he sane ngɛ tɛ ɔ nɔ, nɛ a ngma nɔ́ nɛ Moab Matsɛ Mesha de kɛ kɔ ta nɛ e kɛ Israelbi ɔmɛ hwu ɔ he ɔ hu ngɛ nɔ. (1 Ma. 16:28; 2 Ma. 1:1; 3:4, 5) Se nɔ́ nɛ ha nɛ Moab Tɛ ɔ he hia wawɛɛ ji, a ngma Mawu biɛ ɔ ngɛ ningma okadi eywiɛ nɛ ji YHWH ngɛ nɔ. A tsɛɛ ningma okadi eywiɛ nɛ ɔ ke Tetragrammaton. Ningma okadi eywiɛ nɛ ɔ je kpo si abɔ ngɛ Lakish Ningmahi a mi. A na ningma nɛ ɔmɛ ngɛ buɛhi nɛ a ywia nɛ a na ngɛ Israel ɔ a he.

15. Mɛni ji Septuagint ɔ, nɛ mɛni heje nɛ e he hia?

¹⁵ Nihi nɛ a hi si blema nɛ a tsɔɔ Baiblo ɔ sisi ɔ hu baa Mawu biɛ ɔ yi. Benɛ a nuu Israelbi ɔmɛ kɛ ho nyɔguɛ yemi mi ya ngɛ Babilon ngɛ jeha 607 L.M.B. nɛ a ngmɛɛ a he ngɛ jeha 537 L.M.B. ɔ, Yudabi fuu kpale we a se kɛ yɛ Yuda kɛ Israel ma amɛ a mi hu. Pee se ɔ, Yudabi fuu hia kɛ ho Alexandria nɛ ngɛ Egipt ɔ ya. A tuɔ Hela gbi ngɛ lejɛ ɔ. E he hia nɛ a tsɔɔ Hebri Ngmami ɔ sisi kɛ ya Hela gbi ɔ mi kɛ ha Yudabi nɛ ɔmɛ. A gbe Hebri Ngmami ɔ nɛ a tsɔɔ sisi kɛ ya Hela gbi ɔ mi ɔ nya jeha lafa enyɔ loko a fɔ Kristo. A tsɛɛ Hebri Ngmami ɔ nɛ a tsɔɔ sisi kɛ ya Hela gbi ɔ mi ɔ ke Septuagint. Bɔnɛ a ngmaa Yehowa biɛ ngɛ Hebri gbi ɔ mi ha a je kpo ngɛ Septuagint ɔ ekomɛ a mi.

16. Mo ha nɔ hyɛmi nɔ́ nɛ tsɔɔ bɔnɛ a kɛ Mawu biɛ ɔ tsu ní ha ngɛ kekleekle womi nɛ a pee ngɛ jeha 1640 ɔ mi ɔ.

¹⁶ A ngma Mawu biɛ ɔ ngɛ womi ko nɛ a tsɛɛ ke Bay Psalm Book, nɛ ji kekleekle womi nɛ a pee ngɛ Amerika mahi nɛ England ye a nɔ ɔ mi ɔ mi. A tsɔɔ Baiblo ɔ mi La womi ɔ sisi ngɛ womi nɛ ɔ mi. A pee womi nɛ ɔ ngɛ jeha 1640 ɔ mi. Mawu biɛ ɔ je kpo ngɛ La 1:1, 2 ɔ mi. A ngma ngɛ lejɛ ɔ ke, “nɔ nɛ a jɔɔ lɛ ɔ” nyɛɛ we ngɛ yayami peeli a ga womi nya, “se Iehovah mlaa a mohu nɛ e bua jɔ he ɔ.” Ke o ngɛ hlae nɛ o le babauu kɛ kɔ Mawu biɛ ɔ he ɔ, hyɛ womiyo nɛ ji, The Divine Name That Will Endure Forever a mi.

17, 18. (a) Mɛni ji “anɔkuale”? (b) Mɛni ji ní komɛ nɛ piɛɛ ‘anɔkuale ɔ he sane kpakpa a’ he?

¹⁷ Waa kɛ bua jɔmi sɔmɔɔ ‘Yehowa Mawu anɔkualetsɛ ɔ.’ (La 31:5) Collins Cobuild English Dictionary ɔ tsɔɔ kaa: “Anɔkuale nɛ kɔɔ nɔ́ ko he ɔ ji, níhi nɛ da nɛ a de kɛ kɔ jamɛ a nɔ́ ɔ he, se pi níhi nɛ a po de.” Behi fuu ɔ, Hebri munyu nɛ a tsɔɔ sisi kaa “anɔkuale” ɔ kɔɔ nɔ́ ko nɛ da, nɔ́ ko nɛ e ngɛ mi niinɛ, loo nɔ́ ko nɛ a ma nyɛ maa ngɔ hɛ kɛ fɔ nɔ ɔ he. Hela Munyu nɛ a tsɔɔ sisi ke “anɔkuale” ɔ hu tsɔɔ nɔ́ ko nɛ da aloo nɔ́ ko nɛ e hi.

¹⁸ Yehowa baa Baiblo mi anɔkuale ɔ yi, nɛ e ha nɛ wa ngɛ anɔkuale ɔ he ní babauu kasee. (2 Yoh. 1, 2) Amlɔ nɛ ɔ, wa ngɛ anɔkuale ɔ sisi nue saminya, ejakaa “blɔ nɛ dali nyɛɛɔ nɔ ɔ ngɛ kaa mɔtu pu la nɛ ngɛ kpɛe hluu kɛ yaa si piani.” (Abɛ 4:18) Ngɛ anɔkuale mi ɔ, wa kplɛɛ nɔ́ nɛ Yesu de e Tsɛ ɔ ngɛ sɔlemi mi ɔ nɔ wawɛɛ. E de ke: ‘O munyu ɔ ji anɔkuale.’ (Yoh. 17:17) A ngma ‘anɔkuale ɔ he sane kpakpa a’ nɛ́ Kristofoli a tsɔɔmihi tsuo piɛɛ he ɔ ngɛ Mawu Munyu ɔ mi. (Gal. 2:14) Anɔkuale nɛ ɔ ekomɛ ji níhi nɛ kɔɔ Yehowa biɛ ɔ, Matsɛ nɛ e ji ɔ, Yesu kpɔmi afɔle sami ɔ, gbogboehi a si temi ɔ, kɛ Matsɛ Yemi ɔ he. Nyɛ ha nɛ wa susu bɔnɛ Mawu baa anɔkuale ɔ yi ngɛ mɔde nɛ Satan bɔ kaa e ma ha nɛ anɔkuale ɔ nɛ la a tsuo se ɔ he nɛ waa hyɛ.

19, 20. Mɛnɔ ji Nimrod, nɛ mɛni e bɔ mɔde kaa e maa pee se e yi manye?

¹⁹ Ngɛ Nyu Afua a se ɔ, “detsɛ ngua” ko nɛ a tsɛɛ lɛ ke Nimrod ɔ te si kɛ wo Yehowa. (1 Mose 10:9) Akɛnɛ Nimrod te si kɛ wo Yehowa Mawu heje ɔ, Nimrod ba plɛ pee Satan jalɔ. Yesu tu nihi kaa ja nɛ a teɔ si kɛ woɔ Yehowa a a he munyu ke: ‘Nyɛ tsɛ nɛ nyɛ je e mi ji Abosiami; nɛ nyɛ suɔ kaa nyɛ maa pee e suɔmi nya ní. Kɛ je sisije ɔ, e kɛ anɔkuale ɔ yi gblegbleegble.’—Yoh. 8:44.

²⁰ Nimrod ye Babel kɛ mahi nɛ a ngɛ Tigris kɛ Yufrate pa amɛ a kpɛti ɔ a nɔ. (1 Mose 10:10) Eko ɔ, Nimrod lɛ ha nɛ a ma Babel mɔ ɔ nɛ. A je mɔ nɛ ɔ mami sisi ngɛ jeha 2269 L.M.B. Yehowa suɔ nɛ adesahi nɛ a gbɛ kɛ fia zugba a tsuo nɔ, se nihi nɛ a ngɛ Babel mɔ ɔ mae ɔ de ke: “Nyɛ ha nɛ waa po ma ngua ko ngɔ ha wa he, nɛ waa ma mɔ nɛ e yi mi nɛ ya su hiɔwe. Ke wa pee jã a, wa ma ná biɛ, nɛ wa be gbɛe ngɔ fĩa zugba a nɔ tsuo.” Se a nyɛ we nɛ a gbe mɔ ɔ mami nya, ejakaa Mawu ‘tsaka ni ɔmɛ a gbi ɔ nɛ e gbɛ mɛ ngɔ fĩa je ɔ mi tsuo.’ (1 Mose 11:1-4, 8, 9) Satan to e yi mi kaa e maa to jami kake sisi konɛ nɔ tsuaa nɔ nɛ ja lɛ, se e yi manye. Ngɛ adesahi a yi nɔ sane mi tsuo ɔ, Yehowa jami ngɛ manye yee, nɛ daa nɛ ɔ, e ngɛ hɛ mi yae.

21, 22. (a) Mɛni heje nɛ lakpa jami nyɛ we nɛ e ye anɔkuale jami nɔ kunimi gblegbleegble ɔ? (b) Mɛni he wa ma susu ngɛ munyu nɛ wa maa kase kɛ nyɛɛ se ɔ mi?

²¹ Lakpa jami yi anɔkuale jami nɔ kunimi hyɛ. Mɛni heje? Ejakaa wa Tsɔɔlɔ Ngua a baa e Munyu nɛ a ngma a yi nɛ e ha nɛ adesahi le e biɛ, nɛ e ha nɛ nihi ngɛ Baiblo ɔ mi anɔkuale ɔ hu kasee. (Yes. 30:20, 21) Ke wa ja Mawu ngɛ anɔkuale mi ɔ, lɔɔ ma ha nɛ wa ma ná bua jɔmi. Se enɛ ɔ peemi biɔ nɛ wa ha nɛ wa hɛ nɛ hi wa he nɔ ngɛ mumi mi, nɛ waa kɛ wa hɛ nɛ fɔ Yehowa nɔ kulaa, nɛ waa nyɛɛ ngɛ e mumi klɔuklɔu ɔ blɔ tsɔɔmi nya.

²² Ngɛ munyu nɛ nyɛɛ se ɔ mi ɔ, wa maa kase bɔnɛ lakpa tsɔɔmihi plɛ kɛ ba ha a he ní. Wa maa na kaa Ngmami ɔ buɔ tsɔɔmi nɛ ɔmɛ fɔ. Wa maa na hu kaa Yehowa ji Mawu nɛ baa anɔkuale ɔ yi, nɛ nɔ ko kɛ lɛ sɔɛ. Wa maa na bɔnɛ Mawu ha nɛ wa le anɔkuale tsɔɔmihi nɛ a he jua wa a ha. Tsɔɔmi nɛ ɔmɛ tsuo piɛɛ wa mumi mi gbosi ní ɔmɛ a he.