Mawu wo gbalɔ Abraham si kaa e nina amɛ a ti nɔ kake maa ngɔ jɔɔmihi kɛ ba ha “je ma amɛ tsuo.” (1 Mose 22:18) Mɛnɔ ji jamɛ a nina a?

Maa pee jeha 2,000 ji nɛ ɔ, Mawu ha Yesu nɛ ji Abraham nina a he wami nɛ e kɛ pee nyakpɛ ní nguahi. Nyakpɛ níhi nɛ Yesu pee ɔ tsɔɔ kaa je ma amɛ a nine maa su si nɛ Mawu wo Abraham ɔ nɔ kɛ gu Yesu nɔ.​—Galatia Bi 3:14.

Nyakpɛ níhi nɛ Yesu pee ɔ ha nɛ nihi na kaa lɛ ji nɔ nɛ Mawu hla kaa e jɔɔ adesahi tsuo. Jehanɛ se hu ɔ, nyakpɛ ní nɛ ɔmɛ tsɔɔ bɔ nɛ Mawu maa gu e nɔ kɛ jɔɔ adesahi kɛ ya neneene ha. Mo kadi bɔ nɛ nyakpɛ níhi nɛ Yesu pee ɔ ha nɛ wa na su kpakpa komɛ nɛ e ngɛ ɔ ha.

E hɛɛ nihi dɔdɔɔdɔ​—Yesu tsa hiɔtsɛmɛ.

Be ko ɔ, kpititsɛ ko kpa Yesu pɛɛ ke e tsa lɛ. Yesu ta e he nɛ e de lɛ ke: “I suɔ!” Oya nɔuu nɛ kpiti ɔ laa ngɛ e he.​—Maako 1:40-42.

E mi mi jɔ​—Yesu ha nihi nɛ hwɔ ngɛ mɛ yee niye ní.

Yesu sume nɛ hwɔ nɛ ye nihi. E gu nyakpɛ blɔ nɔ nɛ e ngɔ abolo bɔɔ kɛ lo bɔɔ ko kɛ ha nihi akpehi abɔ niye ní. Nɛ pi si kake pɛ nɛ e pee enɛ ɔ. (Mateo 14:17-21; 15:32-38) Benɛ a ye ní ɔ mɛ tsuo a tɔ nɛ niye ní babauu po piɛ ngɛ se.

E ngɛ mi mi sami​—Yesu tle gbogboehi si.

Yesu na yalɔyo ko nɛ e ngɛ aywilɛho yee ngɛ e binyumu nɛ gbo ɔ he, ejakaa lɛ pɛ ji e bi, nɛ e be nɔ ko nɛ maa hyɛ lɛ, enɛ ɔ ha nɛ yo ɔ “he pee lɛ mɔbɔ,” nɛ e tle e binyumu ɔ si.​—Luka 7:12-15.