HƐ NƆ KAMI NƐ SE BE! Wa Bɔlɔ ɔ wo si kaa e ma ha wɔ neneene wami ngɛ zugba nɛ ɔ nɔ. Se nihi fuu he we si womi nɛ ɔ yi. A deɔ ke, ‘E sa nɛ nɔ fɛɛ nɔ ko nɛ gbo ligbi ko kɛ̃. Jã nɛ Mawu bɔ adesahi.’ Ni komɛ hu susu kaa adesahi ma nyɛ maa hi si kɛ ya neneene, se pi ngɛ zugba nɛ ɔ nɔ. A tsɔɔ kaa ke nɔ ko gbo, nɛ e ya hiɔwe ɔ, e ma ya hi si kɛ ya neneene. Mo hu kɛ o susu kɛɛ?

Loko o ma ha sane bimi nɛ ɔ heto ɔ, mo ha nɛ wa susu sane bimi etɛ nɛ nyɛɛ se nɛ ɔmɛ a heto ɔ he: Ke o hyɛ bɔ nɛ a bɔ adesahi ha a, o susu kaa be enyɛmɛ nɛ e sa kaa adesahi kɛ hi wami mi? Mɛni ji Mawu yi mi tomi ngɛ zugba a kɛ adesahi a he kɛ je sisije? Kɛ e ba lɛ kɛɛ loko adesahi bɔni gbomi?

Ngɛ níhi tsuo nɛ Mawu bɔ ngɛ zugba a nɔ a kpɛti ɔ, adesahi ngɛ slɔɔto kulaa. Ngɛ mɛni blɔ nɔ? Baiblo ɔ tsɔɔ kaa adesahi pɛ ji nihi nɛ Mawu bɔ ngɛ e ‘subai nɔ’ nɛ ‘a ngɛ kaa bɔ nɛ e ngɛ ɔ.’ (1 Mose 1:26, 27) Mɛni enɛ ɔ tsɔɔ? Enɛ ɔ tsɔɔ kaa Mawu bɔ adesahi kɛ su komɛ nɛ lɛ nitsɛ e ngɛ ɔ. Su nɛ ɔmɛ ekomɛ ji suɔmi kɛ dami sane yemi.

Jehanɛ hu ɔ, Mawu bɔ adesahi kɛ nyɛmi nɛ a kɛ susuɔ nɔ́ he, nɛ e ha mɛ nyɛmi nɛ a kɛ leɔ slɔɔto nɛ ngɛ kpakpa kɛ yayami a kpɛti, nɛ a le kaa e sa nɛ huɛ bɔmi nɛ e hi a kɛ Mawu a kpɛti. Enɛ ɔ he je nɛ wa jeɔ Mawu yi ngɛ bɔ nɛ je mluku ɔ kle ha kɛ bɔ nɛ Mawu nibɔ ní ngɛ nyakpɛ ha a he. Jehanɛ hu ɔ, wa bua jɔ ní tɛnimi, la, kɛ asilɛhi a he. Nɔ́ nɛ pe kulaa a, adesahi ngɛ nyɛmi nɛ a kɛ ma nyɛ ma ja Bɔlɔ ɔ. Su nɛ ɔmɛ ha nɛ adesahi je ekpa kulaa ngɛ adebɔ ní kpahi nɛ a ngɛ zugba a nɔ ɔ a he.

Mo susu he nɛ o hyɛ: Ke Mawu suɔ nɛ adesahi nɛ a hi si be kpiti ko kɛkɛ ɔ, jinɛ e ko ha adesahi su kpakpa nɛ ɔmɛ, kɛ nyɛmi nɛ ma ha nɛ a kɛ tsu ní saminya lo? Anɔkuale ɔ ji kaa Mawu ha adesahi su kpakpa nɛ ɔmɛ kɛ nyɛmi nɛ ɔmɛ konɛ wa bua nɛ jɔ ngɛ si himi mi ngɛ zugba a nɔ kɛ ya neneene.

Ni komɛ deɔ ke, pi Mawu yi mi tomi ji kaa adesahi nɛ a hi si ngɛ zugba a nɔ kɛ ya neneene. A deɔ ke Mawu bɔ zugba a konɛ adesahi nɛ a hi nɔ be bɔɔ ko kɛkɛ. Jamɛ a be bɔɔ mi nɛ Mawu kɛ maa le adesahi nɛ a ma nyɛ maa ya hiɔwe nɛ a kɛ Mawu nɛ ya hi si kɛ ya neneene. Se ke munyu nɛ ɔ ji anɔkuale ɔ, lɛɛ anɛ enɛ ɔ tsɔɔ we kaa Mawu ji nɔ nɛ ngɔ ní yayamihi kɛ ngɛ bae, nɛ lɛ ji nɔ nɛ e ha nɛ yi wu tso ní peepee hyi zugba a nɔ ɔ lo? Munyu nɛ ɔ kɛ bɔ nɛ  Mawu ngɛ ha tutuutu ɔ kɔ we kulaa. Baiblo ɔ de ngɛ Mawu he ke: “Nyɛ Mawu ɔ yeɔ e siwo nɔ; yayami ko be e he; nɔ́ nɛ da, kɛ nɔ́ nɛ sa pɛ e peeɔ.”​—5 Mose 32:4.

Baiblo ɔ tsɔɔ Mawu yi mi tomi ngɛ zugba a he kɛ je sisije ɔ ngɛ ngmami nɛ nyɛɛ se ɔ mi. Ngmami ɔ de ke: “Hiɔwe ɔ tsuo e nɔ́, se zugba a lɛɛ e ngɔ kɛ ha nimli adesahi.” (La 115:16) Niinɛ, Mawu bɔ zugba nɛ e nɔ ngɛ fɛu kaa adesahi nɛ a hi nɔ kɛ ya neneene, nɛ e to níhi tsuo nɛ maa hia wɔ konɛ wa nyɛ nɛ waa hi si ngɛ zugba a nɔ kɛ bua jɔmi kɛ ya neneene ɔ he blɔ nya.​—1 Mose 2:8, 9.

“Hiɔwe ɔ tsuo e nɔ́, se zugba a lɛɛ e ngɔ kɛ ha nimli adesahi.”​—La 115:16

Jehanɛ hu ɔ, Baiblo ɔ tsɔɔ Mawu yi mi tomi ngɛ adesahi a he ɔ mi heii. Mawu fã Adam kɛ Hawa ke a ‘fɔ babauu nɛ a hiɛ; nɛ a hyi zugba a nɔ tsuo, nɛ a ye zugba a tsuo nɔ, nɛ a ye zugba a nɔ lohwe ɔmɛ tsuo a nɔ.’ (1 Mose 1:28) Enɛ ɔ ji he blɔ nɛ se be nɛ a ná nɛ a kɛ maa hyɛ zugba a nɔ saminya. E ji he blɔ nɛ a kɛ ma bli paradeiso zugba a mi hulɔ! Niinɛ, Adam kɛ Hawa ngɛ hɛ nɔ kami kaa a kɛ a sisi bimɛ maa hi si ngɛ paradeiso mi ngɛ zugba a nɔ kɛ ya neneene, se pi hiɔwe.

Mɛni he je nɛ wa gboɔ mɔ? Baiblo ɔ tsɔɔ kaa Mawu bɔfo ɔmɛ a kpɛti nɔ kake nɛ pee se ɔ a ba le lɛ kaa atuã tsɔlɔ Satan Abosiami ɔ bɔ mɔde kaa e ma puɛ blɔ nya nɛ Mawu to kɛ ha Adam kɛ Hawa a. Ngɛ mɛni blɔ nɔ?

Satan sisi wa kekle fɔli nɛ ji Adam kɛ Hawa, nɛ a tsɔ atuã kɛ si Mawu. Satan tsɔɔ kaa Mawu ngɔ ní kpakpahi kɛ ngɛ mɛ laae, nɛ ji he blɔ nɛ mɛ nitsɛmɛ a kɛ maa hla nɔ́ nɛ da kɛ nɔ́ nɛ dɛ. Adam kɛ Hawa ya fĩ Satan se, nɛ a tsɔ atuã kɛ si Mawu. Mɛni lɛ je mi kɛ ba? Benɛ be ngɛ mi puee ɔ, a gbo kaa bɔ nɛ Mawu de mɛ ɔ. Hɛ nɔ kami nɛ a ngɛ kaa a maa hi si kɛ ya neneene ngɛ Paradeiso zugba a nɔ ɔ je a dɛ.​—1 Mose 2:17; 3:1-6; 5:5.

Atuã nɛ Adam kɛ Hawa tsɔ ɔ sã a bimɛ tsuo kɛ ba si mwɔnɛ ɔ. Mawu Munyu ɔ de ke: “Kɛ gu adesa kake [Adam] nɔ ɔ, yayami ba je ɔ mi, nɛ gbenɔ gu yayami nɔ kɛ ba, nɛ lɔ ɔ he ɔ, gbenɔ sã adesahi tsuo.” (Roma Bi 5:12) Wa gboɔ, ejakaa wa kekle fɔli ɔmɛ ngɔ yayami kɛ gbenɔ kɛ sã wɔ, pi Mawu nɛ e to kɛ fɔ si kaa wa gbo, aloo nɔ́ ko nɛ Mawu ‘to he blɔ nya’ nɛ wa be sisi nue.

Atuã tsɔmi nyɛ we nɛ e puɛ yi mi tomi nɛ Mawu hɛɛ ngɛ adesahi kɛ zugba a he kɛ je sisije ɔ. Suɔmi nitsɛnitsɛ nɛ Mawu ngɛ, kɛ dami sane nɛ e yeɔ ɔ ha nɛ e to blɔ nya ko konɛ e kɛ kpɔ̃ wɔ kɛ je yayami kɛ gbenɔ dɛ mi. Bɔfo Paulo de ke: “Ejakaa hiɔ nɛ yayami woɔ ji gbenɔ, se nike ní nɛ Mawu kɛ haa ji neneene wami kɛ gu Kristo Yesu, wa Nyɔmtsɛ ɔ nɔ.” (Roma Bi 6:23) Suɔmi nɛ Mawu ngɛ kɛ ha wɔ he je ɔ, “e ngɔ e Bi kake too ɔ [Yesu Kristo] kɛ ha, konɛ nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami.” (Yohane 3:16) Yesu je e suɔmi mi nɛ e ngɔ e he kɛ ha kaa kpɔmi nɔ́, nɛ e kɛ kpɔ̃ níhi nɛ puɛ kɛ gu Adam nɔ ɔ. a

E be kɛe nɛ si nɛ Mawu wo kaa e maa pee zugba a paradeiso ɔ maa ba mi. Ke o kɛ ga womi nɛ nyɛɛ se nɛ Yesu kɛ ha a tsu ní ɔ, o nine maa su paradeiso ɔ nɔ. Yesu de ke: “Nyɛɛ sɛ agbo tokofii ɔ mi, ejakaa agbo nɛ e ngɛ gbajaa a, kɛ blɔ nɛ e bli ɔ kɛ nɔ yaa hɛ mi kpatami mi, nɛ nihi babauu lɛ a ngɛ mi sɛe; se agbo nɛ e ngɛ tokofii, kɛ blɔ nɛ e nɔ nyɛɛmi yee ɔ kɛ nɔ yaa wami mi, nɛ nihi bɔɔ pɛ lɛ a naa jamɛ a blɔ ɔ.” (Mateo 7:13, 14) Ngɛ anɔkuale mi ɔ, o hwɔɔ se si himi daa si ngɛ yi mi kpɔ nɛ o maa mwɔ amlɔ nɛ ɔ nɔ. Mɛni o maa pee?