A Na Kaa Nyɛmimɛ Ɔmɛ Je Suɔmi Kpo Kɛ Tsɔɔ Mɛ
YOMARA kɛ e nyɛmimɛ nyumuhi nɛ a tsɛɛ mɛ ke Marcelo kɛ Hiver hi kɔpe nyafii ko mi ngɛ Guatemala. Yomara kɛ Odasefo ɔmɛ bɔni Baiblo ɔ kasemi, nɛ bɔɔbɔɔbɔɔ ɔ, e nyɛminyumu ɔmɛ hu ba piɛɛ e he nɛ a bɔni Baiblo ɔ kasemi. Se nyagba ko ngɛ. Nyagba a ji kaa mɛ nihi etɛ ɔmɛ tsuo a hɛngmɛ yu, nɛ a li bɔ nɛ a kaneɔ hɛ yuyuili a womihi hulɔ. Enɛ ɔ he ɔ, nɔ nɛ e kɛ mɛ kaseɔ Baiblo ɔ kaneɔ kuku ɔmɛ kɛ ngmami ɔmɛ kɛ haa mɛ.
Jehanɛ hu ɔ, e he wa ha mɛ kaa a maa ya asafo mi kpehi, ejakaa e ma bi nɛ a nyɛɛ hɛngmɛfia 40 loko a ma nyɛ maa ya Matsɛ Yemi Asa nɛ e kɛ a he kɛ we ɔ nɔ. Se a nyɛ we jã peemi. Enɛ ɔ he ɔ, nyɛmimɛ nɛ a ngɛ asafo ɔ mi ɔ to blɔ nya konɛ a ya ngɔ mɛ kɛ ba kpe ɔmɛ tsuo nɛ a peeɔ ɔ. Benɛ a bɔni mɛ sukuu bi a ní tsumi hami ngɛ otsi kpɛti kpe ɔ mi ɔ, nyɛmimɛ ɔmɛ yeɔ bua mɛ nɛ a kaseɔ a ní peemi ɔ kɛ woɔ a yi mi.
Ngɛ May 2019 ɔ mi ɔ, a bɔni asafo mi kpehi peemi ngɛ a kɔpe ɔ mi. Jamɛ a be ɔ, nyɛminyumu ko kɛ e yo nɛ a ji blɔ gbali ɔ hia kɛ ba kɔpe ɔ mi. Nyɛminyumu ɔ kɛ e yo ɔ kɛ pee oti kaa a maa tsɔɔ Yomara kɛ e nyɛmimɛ ɔmɛ bɔ nɛ a ngmaa nɛ a kaneɔ hɛ yuyuili a womihi ha, be mi nɛ mɛ nitsɛmɛ po a li kanemi. A ya hla hɛ yuyuili a womihi bɔ nɛ pee nɛ mɛ nitsɛmɛ nɛ a kase, nɛ a le bɔ nɛ a maa tsɔɔ ni kpahi ha.
Marcelo nɛ e ngɛ sane heto hae ngɛ asafo mi kpe sisi
Ngɛ nyɔhiɔ komɛ a se ɔ, Yomara kɛ e nyɛmimɛ ɔmɛ bɔni hɛ yuyuili a womihi kanemi, nɛ enɛ ɔ ha nɛ huɛ bɔmi kpakpa nɛ ngɛ a kɛ Yehowa a kpɛti ɔ mi ba wa wawɛɛ. a Amlɔ nɛ ɔ, Yomara, Marcelo, kɛ Hiver ngɛ sɔmɔe kaa daa blɔ gbali. Jehanɛ hu ɔ, Marcelo ngɛ sɔmɔe kaa asafo mi sɔmɔlɔ. Ngɛ otsi ɔ mi ɔ, a kɛ a be tsuo sɔmɔɔ Yehowa. Akɛnɛ a kɛ kã sɔmɔɔ Yehowa he je ɔ, ni kpahi hu kase a nɔ hyɛmi nɔ́ ɔ.
Yomara kɛ e nyɛmimɛ ɔmɛ a bua jɔ kaa nyɛmimɛ nɛ a ngɛ asafo ɔ mi ɔ je suɔmi mi nɛ a ye bua mɛ. Yomara de ke, “Kɛ je kekleekle be nɛ waa kɛ Odasefo ɔmɛ kpe ɔ, a je Kristofohi a suɔmi kpo kɛ tsɔɔ wɔ.” Marcelo hu de ke, “Wa ngɛ huɛmɛ kpakpahi fuu ngɛ asafo ɔ mi, nɛ wa piɛɛ nyɛmimɛ nɛ a ngɛ je kɛ wɛ nɛ suɔmi kɛ kake peemi ngɛ a kpɛti ɔ he.” Yomara kɛ e nyɛminyumu ɔmɛ ngɛ blɔ hyɛe wawɛɛ kaa e be kɛe nɛ Yehowa ma ha nɛ zugba a nɔ tsuo nɛ plɛ pee paradeiso.—La 37:10, 11; Yes. 35:5.
a A pee womiyo nɛ ji, Learn to Read Braille ɔ konɛ a kɛ ye bua nihi nɛ a hɛngmɛ yu loo nihi nɛ a hyɛ we nɔ kpakpa ko ɔ nɛ a nyɛ nɛ a kase bɔ nɛ a ngmaa hɛ yuyuili a womihi nɛ a kaneɔ ha.
