Maako Sane Kpakpa a 2:1-28
2 Se ligbi komɛ a se ɔ, e kpale kɛ ya Kapenaum, nɛ nihi nu he kaa e ngɛ we mi.
2 Nɛ nihi babauu ba bua a he nya ngɛ lejɛ ɔ hluu po kaa a nɛ blɔ ngɛ sinya a nya tete, nɛ e bɔni munyu tumi kɛ bɔni mɛ tsɔɔmi.
3 Nɛ nyumuhi eywiɛ tloo nɔ ko nɛ e hule* kɛ ba e ngɔ.
4 Se a nyɛ we nɛ a kɛ lɛ nɛ su Yesu ngɔ, ejakaa nimli ɔmɛ a he hiɛ, lɔ ɔ he ɔ, a ya hia tsu ɔ yi mi ngɛ Yesu yi nɔ tutuutu, nɛ benɛ a je puɔ ngɛ lejɛ ɔ, a ngmɛɛ hiɔtsɛ ɔ kɛ sa a nɛ e hwɔɔ si ngɛ nɔ ɔ tsuo he bɔɔbɔɔbɔɔ kɛ ba zugba.
5 Benɛ Yesu na hemi kɛ yemi nɛ a ngɛ ɔ, e de nɔ nɛ e hule* ɔ ke: “Bi, a ngɔ o he yayami ɔmɛ kɛ pa mo.”
6 Jamɛ a be ɔ mi ɔ, womi ngmali komɛ ngɛ lejɛ ɔ, nɛ a hii si nɛ a ngɛ susue ngɛ a tsui mi ke:
7 “Mɛni he je nɛ nyumu nɛ ɔ ngɛ munyu tue jã a? E ngɛ musu bɔe. Mɛnɔ ma nyɛ maa ngɔ yayami kɛ pa kaa ja Mawu pɛ?”
8 Se amlɔ nɔuu ɔ, Yesu mumi ɔ ha nɛ e yɔse kaa a ngɛ ní nɛ ɔmɛ susue ngɛ a kpɛti, enɛ ɔ he ɔ, e de mɛ ke: “Mɛni he je nɛ nyɛ ngɛ ní nɛ ɔmɛ susue ngɛ nyɛ tsui mi ɔ?
9 Demi nɛ a ma de nɔ nɛ e hule* ɔ ke, ‘A ngɔ o he yayami ɔmɛ kɛ pa mo,’ kɛ ‘Tee si nɛ o ngɔ o sa a nɛ o nyɛɛ’ ɔ, te nɛ lɛ e demi ngɛ gbɔjɔɔ?
10 Se bɔ nɛ pee nɛ nyɛɛ le kaa nɔmlɔ Bi ɔ ngɛ he blɔ kaa e ngɔɔ yayamihi kɛ paa ngɛ zugba a nɔ ɔ—” e de nɔ nɛ e hule* ɔ ke:
11 “I ngɛ mo dee ke, Tee si, ngɔɔ o sa a, nɛ o ho o we mi ya.”
12 Kɛkɛ nɛ e te si nɛ amlɔ nɔuu ɔ, e wo e sa a nɛ e nyɛɛ kɛ be ngɛ mɛ tsuo a hɛ mi kɛ ho. Enɛ ɔ pee mɛ tsuo nyakpɛ, nɛ a wo Mawu hɛ mi nyami, nɛ a de ke: “Wa nɛ nɔ́ nɛ ɔ eko hyɛ.”
13 E kpale je kpo kɛ ho wo ɔ nya ya, nɛ asafo kuu ɔ tsuo ya nɔ nɛ a ngɛ e ngɔ bae, nɛ e bɔni mɛ ní tsɔɔmi.
14 Nɛ benɛ e bee ɔ, e hɛ ngmɛ gba Levi nɛ ji Alfeo binyumu ɔ nɔ nɛ e hii si ngɛ tó tsumi he ɔ, nɛ e de lɛ ke: “Ba pee ye se nyɛɛlɔ.” Kɛkɛ nɛ e te si nɛ e nyɛɛ e se.
15 Pee se benɛ Yesu ngɛ ní yee ngɛ Levi we ɔ mi ɔ, tó tsuli kɛ yayami peeli babauu piɛɛ e kɛ e kaseli ɔmɛ a he kɛ ngɛ ní yee, ejakaa a kpɛti nihi fuu ngɛ e se nyɛɛe.
16 Se benɛ womi ngmali ɔmɛ kɛ Farisi bi ɔmɛ na kaa e kɛ yayami peeli kɛ tó tsuli ngɛ ní yee ɔ, a bɔni e kaseli ɔmɛ bimi ke: “Anɛ e kɛ tó tsuli kɛ yayami peeli yeɔ ní lo?”
17 Benɛ Yesu nu nɔ́ nɛ ɔ, e de mɛ ke: “Nihi nɛ a ngɛ he wami ɔ hia we tsopatsɛ, se ni nɛmɛ nɛ a be he wami ɔ lɛɛ a hiaa. I ba konɛ ma ba tsɛ yayami peeli, se pi dali.”
18 Jamɛ a be ɔ mi ɔ, Yohane kaseli ɔmɛ kɛ Farisi bi ɔmɛ haa hwɔ. Lɔ ɔ he ɔ, a ba nɛ a ba bi lɛ ke: “Mɛni he je nɛ Yohane kaseli ɔmɛ kɛ Farisi bi ɔmɛ a kaseli ɔmɛ haa hwɔ, se moo o kaseli ɔmɛ lɛɛ a hɛ hwɔ ɔ?”
19 Kɛkɛ nɛ Yesu de mɛ ke: “Tse nɔ́ ko tsa be nɛ ma ha nɛ ayɛflo huno ɔ huɛmɛ ɔmɛ maa ye kɔmɔ be mi nɛ ayɛflo huno ɔ kɛ mɛ ngɛ ɔ, aloo? Be abɔ nɛ ayɛflo huno ɔ kɛ mɛ ngɛ ɔ, a be nyɛe maa ha hwɔ.
20 Se be ma nɛ a maa ngɔ ayɛflo huno ɔ kɛ je a he, nɛ jamɛ a be ɔ mi loko a maa ha hwɔ.
21 Nɔ ko ngɔɛ bo ehe kɛ ta we tade momo nɛ e woɔ ngɛ e tade nɔ ɔ mi. Ke e ba jã a, bo ehe ɔ nɛ a kɛ ta tade momo ɔ mi ɔ maa hia kɛ je mi, nɛ puɔ ɔ mi ma bli pe kekle ɔ po.
22 Jã kɛ̃ nɛ nɔ ko ngɔɛ wai ehe kɛ wui lohwe he womi wai tɔ momohi a mi. Ke e pee jã a, wai ɔ ma ha nɛ lohwe he womi tɔ ɔmɛ ma pɛ́, nɛ wai ɔ kɛ lohwe he womi tɔ ɔmɛ ma bɔ lɛ. Mohu ɔ, a ngɔɔ wai ehe kɛ woɔ lohwe he womi wai tɔ ehehi a mi.”
23 Jehanɛ ɔ, benɛ e bee ngɛ ngma ngmɔ ko mi ngɛ He Jɔɔmi Ligbi ɔ nɔ ɔ, e kaseli ɔmɛ bɔni ngma amɛ kumi be mi nɛ a yaa a.
24 Lɔ ɔ he ɔ, Farisi bi ɔmɛ bi lɛ ke: “Hyɛ! Mɛni he je nɛ o kaseli ɔmɛ ngɛ nɔ́ ko nɛ mlaa ngmɛ́ blɔ kaa a peeɔ ngɛ He Jɔɔmi Ligbi ɔ nɔ ɔ pee ɔ?”
25 Se e bi mɛ ke: “Anɛ nyɛ kane we nɔ́ nɛ David pee benɛ e he fĩ lɛ nɛ hwɔ ngɛ e kɛ nyumuhi nɛ a piɛɛ e he ɔ yee ɔ gblee lo?
26 Anɛ nyɛ kane we kaa ngɛ osɔfo nɔkɔtɔma Abiatar sane ɔ mi ɔ, David ya sɛ Mawu we ɔ nɛ e ya ye abolo nɛ a kɛ maa Mawu hɛ mi, nɛ́ mlaa ngmɛ́ blɔ kaa nɔ ko yeɔ eko kaa ja osɔfo ɔmɛ pɛ ɔ, nɛ e ha nyumu ɔmɛ nɛ a piɛɛ e he ɔ hu eko lo?”
27 Kɛkɛ nɛ e de mɛ ke: “Nɔmlɔ he je nɛ a to He Jɔɔmi Ligbi ɔ nɛ, se pi He Jɔɔmi Ligbi ɔ he je nɛ a bɔ nɔmlɔ ngɛ.
28 Lɔ ɔ he ɔ, nɔmlɔ Bi ɔ ji He Jɔɔmi Ligbi ɔ po Nyɔmtsɛ.”
