Maako Sane Kpakpa a 1:1-45
1 Sane kpakpa a nɛ kɔɔ Yesu Kristo, Mawu Bi ɔ he ɔ sisije:
2 Kaa bɔ nɛ a ngma ngɛ gbalɔ Yesaya womi ɔ mi ɔ: “(Hyɛ! i ngɛ ye tsɔlɔ ɔ tsɔe kɛ sɛ o hlami,* e ma dla o blɔ ɔ kɛ ha mo.)
3 Nɔ ko gbi ngɛ pɛe wawɛɛ ngɛ nga a nɔ ke: ‘Nyɛ dla Yehowa* blɔ ɔ! Nyɛ ha nɛ e gbɛjegbɛ ɔmɛ nɛ a da tlɔmɔɔ.’”
4 Yohane Nɔ Baptisilɔ ɔ ngɛ nga a nɔ, nɛ e ngɛ baptisimi nɛ e peeɔ tsui tsakemi kɛ ha yayami pami he okadi ɔ fiɛɛe.
5 Nɛ zugba kpɔhi tsuo nɛ ngɛ Yudea kɛ nihi tsuo nɛ a ngɛ Yerusalɛm ɔ yaa e ngɔ, nɛ e baptisiɔ mɛ* ngɛ Yɔdan Pa a mi, nɛ a jajeɔ a he yayami ɔmɛ ngɛ ma hɛ mi.
6 Jamɛ a be ɔ mi ɔ, tade nɛ Yohane woɔ ɔ, afukpɔngɔ he bwɔmi nɛ a kɛ lo, nɛ e mlɛ mi fimi nɔ́ ɔ hu lohwe he womi nɛ a kɛ pee. Ní nɛ e yeɔ ji baalɛhi kɛ nga nɔ hwo.
7 Nɛ e ngɛ fiɛɛe ke: “Nɔ ko nɛ e nɔ kuɔ pe mi ma ngɛ ye se, nɛ e tokota nɔ kpã tete po, i sɛ nɔ nɛ e sɔɔ si nɛ e pɛneɔ.
8 Imi lɛɛ i ngɔ nyu kɛ baptisi nyɛ, se jamɛ a nɔ ɔ lɛɛ e maa ngɔ mumi klɔuklɔu kɛ baptisi nyɛ.”
9 Ngɛ jamɛ a ligbi ɔmɛ a mi ɔ, Yesu je Nazarɛt ngɛ Galilea kɛ ba, nɛ Yohane baptisi lɛ ngɛ Yɔdan Pa a mi.
10 Benɛ e je kpo ngɛ nyu ɔ mi ɔ, amlɔ nɔuu nɛ e na nɛ hiɔwe nya bli, nɛ mumi ɔ ngɛ si kplee kɛ ma e nɔ kaa lahuɛ.
11 Nɛ gbi ko pɛ kɛ je hiɔwe ke: “Mo ji ye Bi nɛ i suɔ; ye bua jɔ o he.”
12 Nɛ amlɔ nɔuu ɔ, mumi ɔ wo lɛ he wami nɛ e ho nga a nɔ ya.
13 E ya nɔ nɛ e hi nga a nɔ ligbi 40, nɛ Satan ya ngɛ lɛ kae. E kɛ lohwe awi yeli nɛ hi lejɛ ɔ, se hiɔwe bɔfohi ngɛ lɛ sɔmɔe.
14 Benɛ a nu Yohane se ɔ, Yesu je kɛ ho Galilea ya nɛ e ya ngɛ Mawu sane kpakpa a fiɛɛe,
15 nɛ e ngɛ dee ke: “Be nɛ a to ɔ su, nɛ Mawu Matsɛ Yemi ɔ su si ta. Nyɛ tsake nyɛ tsui, konɛ nyɛ ná hemi kɛ yemi ngɛ sane kpakpa a mi.”
16 Benɛ e ngɛ nyɛɛe ngɛ Galilea Wo ɔ nya a, e na Simon, kɛ Simon nyɛminyumu Andrea nɛ a ngɛ ya fɔe ngɛ wo ɔ mi, ejakaa a ji wo hɛli.
17 Lɔ ɔ he ɔ, Yesu de mɛ ke: “Nyɛ ba nyɛɛ ye se, nɛ ma pee nyɛ wo hɛli nɛ a hɛɛ nimli.”
18 Nɛ amlɔ nɔuu nɛ a je a ya amɛ a he, nɛ a nyɛɛ e se.
19 Benɛ e ya e hɛ mi bɔɔ ɔ, e na Zebedeo binyumu Yakobo, kɛ e nyɛminyumu Yohane nɛ a ngɛ a lɛ mi nɛ a ngɛ a yahi kpɛe,
20 nɛ oya nɔuu nɛ e tsɛ mɛ. Enɛ ɔ he ɔ, a si a tsɛ Zebedeo kɛ apaa yeli ɔmɛ ngɛ lɛ ɔ mi, nɛ a je kɛ ho nɛ a ya nyɛɛ e se.
21 Nɛ a je kɛ ho Kapenaum ya.
Benɛ He Jɔɔmi Ligbi ɔ je sisi pɛ ɔ, e ya kpe he ɔ nɛ e ya bɔni ní tsɔɔmi.
22 Nɛ a nya kpɛ a he ngɛ bɔ nɛ e plɛ kɛ tsɔɔ ní ha a he, ejakaa e tsɔɔ mɛ ní kaa nɔ ko nɛ e hɛɛ blɔ nya, se pi kaa bɔ nɛ a womi ngmali ɔmɛ tsɔɔ ní ɔ.
23 Jamɛ a be ɔ mi nɔuu ɔ, nyumu ko ngɛ a kpe he ɔ nɛ mumi ko nɛ e he tsɔ we ngɛ lɛ kudɔe, nɛ e kpa ngmlaa ke:
24 “Yesu, Nazarɛt no, mɛni sane waa kɛ mo ngɛ? Anɛ o ba konɛ o ba kpata wa hɛ mi lo? I le nɔ tutuutu nɛ o ji. Mo ji Mawu we Nɔ Klɔuklɔu ɔ nɛ!”
25 Se Yesu kã e hɛ mi ke: “Pee kɔ̃, nɛ́ o je kpo ngɛ e mi!”
26 Kɛkɛ nɛ benɛ mumi nɛ e he tsɔ we ɔ ha nɛ si nɔɔmi hiɔ nɔ nyumu ɔ nɔ nɛ e kpã ngmlaa wawɛɛ ta a, e je e mi.
27 Ngɛ anɔkuale mi ɔ, enɛ ɔ pee ni ɔmɛ tsuo nyakpɛ wawɛɛ nɛ a bɔni he ní sɛɛmi. A ngɛ dee ke: “Mɛni ji nɛ ɔ? Tsɔɔmi ehe ko ji nɛ ɔ nɛ! E kɛ he wami fãa mumihi nɛ a he tsɔ we po, nɛ a buɔ lɛ tue.”
28 Enɛ ɔ he ɔ, e he sane gbɛ fĩa he fɛɛ he ngɛ Galilea kpokpa a tsuo nɔ mlamlaamla.
29 Kɛkɛ nɛ a je kpe he ɔ kɛ ho Simon kɛ Andrea a we ɔ mi ya, nɛ Yakobo kɛ Yohane piɛɛ a he.
30 Jamɛ a be ɔ mi ɔ, asla bu Simon nganyɛ ɔ si, enɛ ɔ he ɔ, benɛ Yesu su lejɛ ɔ pɛ nɛ a de lɛ.
31 Benɛ Yesu ya e ngɔ ɔ, e pɛtɛ e nine he, nɛ e wo e nɔ. Asla a po ngɛ e nɔ, nɛ e bɔni mɛ sɔmɔmi.
32 Gbɔkuɛ benɛ pu nɔ si ɔ, ni ɔmɛ ngɛ nihi tsuo nɛ a be he wami, kɛ nihi tsuo nɛ daimoniohi ngɛ a mi ɔ ngɔe kɛ ngɛ e ngɔ bae;
33 nɛ ma a tsuo ba bua a he nya ngɛ sinya a nya haa.
34 Nɛ e tsa nihi fuu nɛ hiɔ slɔɔtoslɔɔtohi ngɛ a he ɔ, nɛ e hia daimoniohi fuu, se e ngmɛ́ daimonio ɔmɛ blɔ nɛ a tu munyu, ejakaa a le kaa lɛ ji Kristo ɔ nɛ.*
35 Makɛ benɛ je mi tsɔ we lolo ɔ, e te si nɛ e je kpo kɛ ho he ko banee ya, nɛ e ya bɔni sɔlemi ngɛ lejɛ ɔ.
36 Se Simon kɛ nihi nɛ a piɛɛ e he ɔ ya hla lɛ wawɛɛ
37 nɛ a ya na lɛ, nɛ a de lɛ ke: “Nɔ fɛɛ nɔ ngɛ mo hlae.”
38 Se e de mɛ ke: “Nyɛ ha nɛ waa ho he kpa ya, waa ho ma amɛ nɛ a kɛ wa he kɛ we ɔmɛ a mi ya, konɛ ma ya fiɛɛ ngɛ lejɛ ɔmɛ hulɔ, ejakaa lɔ ɔ he je nɛ i ba ngɛ.”
39 Nɛ e ya kpa Galilea tsuo, nɛ e fiɛɛ ngɛ a kpe he ɔmɛ, nɛ e hiaa daimoniohi.
40 Kpititsɛ ko hu ba nɛ e ba kpa lɛ pɛɛ, e kpla si po kɛ pee jã, nɛ e de lɛ ke: “Ke o suɔ ɔ, o ma nyɛ ma ha nɛ ye he nɛ tsɔ.”
41 Kɛkɛ nɛ e ní pee lɛ mɔbɔ, nɛ e kpa e nine mi, nɛ e ta e he, nɛ e de lɛ ke: “I suɔ! O he nɛ tsɔ.”
42 Amlɔ nɔuu nɛ kpiti ɔ laa ngɛ e he, nɛ e he tsɔ.
43 Kɛkɛ nɛ e bɔ lɛ kɔkɔ, nɛ e wo lɛ blɔ amlɔ nɔuu,
44 nɛ e de lɛ ke: “Hyɛ nɛ o ko de nɔ ko nɔ ko, mohu ɔ, yaa nɛ o ngɔ o he kɛ ya tsɔɔ osɔfo ɔ, nɛ o ngɔ níhi nɛ Mose tsɔɔ kaa ke kpititsɛ ko he tsɔ ɔ nɛ e ngɔ kɛ ha a kɛ ya ha, konɛ lɔ ɔ nɛ pee odase kɛ ha mɛ.”
45 Se benɛ nyumu ɔ je kɛ ho ɔ, e ya bɔni sane ɔ jajemi wawɛɛ, nɛ sane ɔ gbɛ kɛ fĩa kɛ ya tsitsaa. Enɛ ɔ he ɔ, Yesu nyɛ we nɛ e laa e he kɛ sɛ ma ko mi, se e hi he komɛ banee ngɛ ma amɛ a se. Se kɛ̃ ɔ, a ya nɔ nɛ a ngɛ he slɔɔtoslɔɔtohi jee kɛ ngɛ e ngɔ bae.
Sisi Ningmahi
^ Hela, “nyɛɛ o hɛ mi.”
^ Hyɛ Munyu Komɛ A Sisi Tsɔɔmi.
^ Aloo “e kɛ mɛ woɔ nyu mi.”
^ E ma nyɛ maa pee kaa “a le nɔ nɛ e ji.”
