La 71:1-24
71 Oo Yehowa, o ngɔ lɛ i sa we ngɛ.
Ko ha nɛ ye hɛ mi nɛ pue si kɔkɔɔkɔ.
2 Mo he ye yi wami, nɛ́ o kpɔ̃ mi ngɛ o dami ɔ nya.
Mo ta tue ha mi* nɛ o he ye yi wami.
3 Moo pee o he tɛsa nɛ he wa ha mi,He nɛ ma nyɛ ma ya be fɛɛ be.
Mo fã konɛ a he ye yi wami,Ejakaa mo ji ye tɛsa kɛ ye he piɛ pomi he.
4 Oo ye Mawu, mo kpɔ̃ mi ngɛ yiwutsotsɛ dɛ mi,Ngɛ nɔ nɛ ngɛ mi yi mi wae yaka gu ɔ dɛ mi.
5 Ejakaa mo ji ye hɛ kɛ nɔ fɔmi, Oo Nyɔmtsɛ Matsɛ Yehowa;Kɛ je ye nihe mi tɔɔ nɛ i ngɔ ye hɛ kɛ fɔ o nɔ.
6 I ngɔ ye hɛ kɛ fɔ o nɔ kɛ je ye fɔmi mi tɔɔ;Mo lɛ o je mi kɛ je ye nyɛ fɔmi kotoku mi.
I jeɔ o yi be fɛɛ be.
7 I ba pee kaa nyakpɛ nɔ́ ko kɛ ha nihi fuu,Se mo ji ye wesa he nɛ he wa.
8 Ye nya mi hyi tɔ kɛ o yi jemi;I tuɔ o hɛ mi nyami ɔ he munyu ligbi ɔ tsuo.
9 Ko sake mi kɛ fɔ he ngɛ ye bwɔmi si;Ko kua mi ke ye he wami ta.
10 Ye he nyɛli ɔmɛ tuɔ munyu kɛ siɔ mi,Nɛ nihi nɛ a ngɛ hlae nɛ a gbe mi ɔ* soɔ ye yi nɔ,
11 A deɔ ke: “Mawu kua lɛ.
Nyɛɛ fiee e se nɛ nyɛ ya nu lɛ, ejakaa nɔ ko be nɛ ma kpɔ lɛ.”
12 Oo Mawu, koo je ye he kɛ ya se lokoo.
Ye Mawu, mo ba ye bua mi esɔ.
13 Nihi nɛ a teɔ si kɛ woɔ mi ɔ,*Zo nɛ gbe mɛ nɛ a hɛ mi nɛ kpata.
Nihi nɛ a ngɛ hlae nɛ ma na nɔ́ ɔ,Zo nɛ gbe mɛ nɛ́ a hɛ mi nɛ pue si.
14 Se imi lɛɛ, ma ya nɔ nɛ ma mlɛ;Ma ha nɛ o yi jemi ɔ maa hiɛ.
15 Ye nya maa jaje o dami ɔ,Ye nya maa jaje yi wami hemi níhi nɛ o pee ɔ ligbi ɔ tsuo,Pohu a hiɛ babauu pe bɔ nɛ ye juɛmi maa kpe he.*
16 Ma ba tu níhi nɛ o kɛ o he wami pee ɔ he munyu,Nyɔmtsɛ Matsɛ Yehowa;Ma wo o dami ɔ ta, mo pɛ o dami ɔ.
17 Ye Mawu, o tsɔɔ mi ní kɛ je ye nihe mi tɔɔ,Nɛ kɛ ba si amlɔ nɛ ɔ, i yaa nɔ nɛ i jajeɔ o nyakpɛ ní tsumi ɔmɛ.
18 Ye Mawu, ke i bwɔ, nɛ i puɛ mua po, ko kua mi.
Mo ha nɛ ma tu o he wami* ɔ he munyu kɛ tsɔɔ yi nɔ nɛ nyɛɛ se ɔ,Kɛ o we agboje ɔ he munyu kɛ tsɔɔ nihi tsuo nɛ maa ba a.
19 Oo Mawu, o dami ɔ ya su hiɔwe tɔɔ;O pee ní nguanguahi;Ye Mawu, mɛnɔ lɛ ngɛ kaa mo?
20 E ngɛ mi kaa o ha nɛ i kɛ haomi kɛ amanehlu babauu kpe mohu lɛɛ,Se mo ha mi he wami ekohu;Mo je mi kɛ je zugba a sisi tɔɔ.*
21 Mo ha nɛ ye we agboje ɔ nɛ pue nɔ,Nɛ́ o po ye he piɛ, nɛ o wo ye bua.
22 Kɛkɛ ɔ, ma ngɔ kpã saku kɛ je o yi,Ngɛ o we anɔkuale yemi ɔ he je, Oo ye Mawu.
Ma ngɔ saku kɛ la yi jemi lahi* kɛ ha mo,Oo Israel Nɔ Klɔuklɔu.
23 Ye nya ma he ose be mi nɛ i ngɛ yi jemi lahi lae ha mo ɔ,Ejakaa o he ye yi wami.*
24 Ye lilɛ maa tu o dami ɔ he munyu* ligbi ɔ tsuo,Ejakaa nihi nɛ a ngɛ ye hɛ mi kpatami hlae ɔ, zo maa gbe mɛ, nɛ a hɛ mi ma pue si.
Sisi Ningmahi
^ Aloo “Moo ba si nɛ o bu mi tue.”
^ Aloo “a ngɔ ye klaa a.”
^ Aloo “woɔ ye klaa a.”
^ Aloo “pe bɔ nɛ ma nyɛ ma kane.”
^ Ngɛ Hebri gbi mi ɔ, “o kɔni.”
^ Aloo “kɛ je nyu nɛ mi kuɔ ɔ mi.”
^ Aloo “kɛ fia la.”
^ Aloo “o kpɔ̃ ye klaa.”
^ Aloo “Ye lilɛ ma pue e yi mi tɛ ngɛ o dami ɔ he.”
