La 68:1-35
Kɛ ha la nɔ hyɛlɔ ɔ. David la. La nɛ a po.
68 Mawu nɛ te si, e he nyɛli ɔmɛ nɛ a gbɛ kɛ fĩa,Nɛ nihi nɛ a nyɛɔ lɛ ɔ nɛ a tu fo kɛ je e hɛ mi.
2 Moo fiee mɛ kɛ ho kaa bɔ nɛ kɔɔhiɔ muɔɔ lasuku kɛ yaa a;Yiwutsotsɛmɛ a hɛ mi nɛ kpata ngɛ Mawu hɛ mi,Kaa bɔ nɛ hwo gbaku sileɔ ngɛ la he ɔ.
3 Se dali lɛɛ, a nya;A bua nɛ jɔ kɛ be nɔ ngɛ Mawu hɛ mi;A nya kɛ bua jɔmi babauu.
4 Nyɛ la kɛ ha Mawu; nyɛ la yi jemi lahi* kɛ ha e biɛ ɔ.
Nyɛ la kɛ ha nɔ nɛ bee ngɛ nga kplanaa a nɔ ɔ.*
Yah* ji e biɛ! Nyɛ nya ngɛ e hɛ mi!
5 Mawu nɛ ngɛ e hi he klɔuklɔu ɔJi nihi nɛ a be tsɛmɛ a tsɛ, kɛ yalɔyihi a he piɛ polɔ.*
6 Mawu haa nihi nɛ a be nɔ ko ɔ we nɛ a hiɔ mi;E jeɔ nihi nɛ a wo mɛ tsu ɔ, nɛ e haa nɛ a yeɔ manye.
Se nihi nɛ a tue mi ti ɔ* maa hi zugba nɛ gbli kadokado nɔ.
7 Oo Mawu, benɛ o nyɛɛ o we bi ɔmɛ a hɛ mi,Benɛ o nyɛɛ kɛ gu nga a nɔ ɔ, (Sela)
8 Zugba a mimiɛ;Hiɔwe nɛ nyu kɛ pue si* ngɛ Mawu he je;Sinai yoku nɛ ɔ mimiɛ ngɛ Mawu, Israel Mawu ɔ he je.
9 Oo Mawu, o ha nɛ hiɔmi nɛ babaaba;O ha o we bi* nɛ pɔ tɔ mɛ ɔ he wami ehe.
10 A hi bo tsuhi a mi;Oo Mawu, o kpakpa peemi ɔ he je ɔ, o ha ohiatsɛmɛ níhi nɛ a hiaa.
11 Yehowa kɛ fami ɔ ha;Yihi nɛ a jajeɔ sane kpakpa a ji tabo ngua.
12 Matsɛmɛ ɔmɛ kɛ a tabo ɔmɛ tu fo, a tu fo!
Yo nɛ a si ngɛ we mi po ná ta yibu ní ɔ eko.
13 E ngɛ mi kaa nyɛ hwɔɔ si ngɛ sito he ɔ ngɛ la amɛ* a kpɛti mohu lɛɛ,Se lejɛ ɔ lɛ nyɛ maa na beleku lahuɛ kɛ e he sika hiɔ pɛlihi,Kɛ e he sika tsu ngmingmiingmi tsɛlihi ngɛ.
14 Benɛ Ope ɔ gbɛ zugba a nɔ matsɛmɛ ɔmɛ kɛ fĩa a,Snoo nɛ ngɛ Zalmon yoku ɔ nɔ.*
15 Bashan yoku ɔ ji Mawu yoku;*Bashan yoku ɔ ji yoku gojogojoohi nɛ a tsa.
16 Nyɛ yoku gojogojoohi nɛ tsa, mɛni he je nɛ nyɛɛ kɛ hɛ tsumiNgɛ yoku ɔ nɛ Mawu hla kaa* e hi he ɔ hyɛe ɔ?
Niinɛ, Yehowa maa hi lejɛ ɔ kɛ ya neneene.
17 Mawu ta zugba lɛ ɔmɛ a yibɔ ji akpe nyɔngmahi abɔ, akpehi akpehi abɔ.
Yehowa je Sinai kɛ ba he klɔuklɔu ɔ.
18 Oo Yah wa Mawu, o kuɔ kɛ ya he nɛ ya hiɔwe;O ngɔ nyɔguɛhi kɛ ho;O ngɔ nimli a mi nike ní kɛ ho,Ee, nihi nɛ a tue mi ti po piɛɛ a he, konɛ a hi a kpɛti.
19 A je Yehowa, nɔ nɛ tlooɔ wa tlomi ɔmɛ daa ligbi ɔ yi,Anɔkuale Mawu nɛ ji wa yi wami helɔ ɔ. (Sela)
20 Anɔkuale Mawu ɔ ji Mawu nɛ heɔ wa yi wami;Nɛ Yehowa nɛ ji Nyɔmtsɛ Matsɛ ɔ jeɔ wɔ kɛ jeɔ gbenɔ mi.
21 Ee, Mawu maa ywia e he nyɛli ɔmɛ a yi,E maa ywia nɔ fɛɛ nɔ nɛ yaa nɔ* ngɛ e fɔ yemi mi ɔ yi.
22 Yehowa de ke: “Ma ngɔ mɛ kɛ je Bashan kɛ ba;Ma ngɔ mɛ kɛ je wo ɔ sisi tɔɔ kɛ ba,
23 Konɛ o nane nɛ wu muɔ,Nɛ́ o gbe ɔmɛ a lilɛ nɛ lɔ he nyɛli ɔmɛ a muɔ.”
24 Oo Mawu, a na o we ako simi ɔ,Ako nɛ ye Mawu ɔ, ye Matsɛ ɔ siɔ kɛ yaa he klɔuklɔu ɔ.
25 Lali ɔmɛ nyɛɛ hɛ mi, la fiali nɛ a ngɛ kpã sakuhi fiae nyɛɛ a se;Yihewi ɔmɛ ngɛ a kpɛti nɛ a ngɛ akasawa fiae.
26 Nyɛ je Mawu yi ngɛ asafo ngua a mi;*Nyɛ nihi nɛ nyɛ je Israel Je He ɔ, nyɛ je Yehowa yi.
27 Lejɛ ɔ nɛ Benyamin, nɛ ji jokuɛ kulaa a baa mɛ si ngɛ,Jã nɛ e ji ngɛ Yuda ma nikɔtɔma amɛ kɛ a we asafo nɛ́ a kpaa ngmlaa a blɔ fa mi,Zebulun ma nikɔtɔma amɛ, kɛ Naftali ma nikɔtɔma amɛ hu piɛɛ he.
28 O Mawu ɔ fã ke o he maa wa.
Oo Mawu, mo nɛ o je ngmlaa ha wɔ ɔ, mo je o he wami ɔ kpo.
29 O sɔlemi we ɔ nɛ ngɛ Yerusalem ɔ he je ɔ,Matsɛmɛ maa ngɔ nike níhi kɛ ba ha mo.
30 Mo kã lohwe awi yeli nɛ a ngɛ glãhi a mi ɔ a hɛ mi,Na kuhi babauu kɛ a bimɛ,Kɛ yaa si be nɛ ma amɛ maa ngɔ sika hiɔ kɛ ba nɛ a ma ba kplã si.*
Se e gbɛɔ mahi nɛ a bua jɔ ta hwumi he ɔ kɛ fĩaa.
31 A maa ngɔ akɔblee* níhi kɛ je Egipt kɛ ba;*Kush maa ngɔ nike níhi kɛ ba ha Mawu esɔesɔ.
32 Oo zugba a nɔ matsɛ yemihi, nyɛ la ha Mawu,Nyɛ la yi jemi lahi* kɛ ha Yehowa, (Sela)
33 Nɔ nɛ e beɔ ngɛ hiɔwe ɔmɛ a mi hiɔwe nɛ ngɛ kɛ je blema a.
Hyɛ! E gbi siɔ, e gbi nɛ he wa a siɔ.
34 Nyɛɛ jaje Mawu he wami ɔ.
E we agboje ɔ ngɛ Israel nɔ,Nɛ e he wami ɔ hu ngɛ bɔku ɔmɛ a mi.
35 Mawu he ngɛ gbeye ngɛ e* jami he ngua a.
Lɛ ji Israel Mawu,Nɔ nɛ haa ma a nyɛmi kɛ he wami ɔ nɛ.
A je Mawu yi.
Sisi Ningmahi
^ Aloo “nyɛɛ fia la.”
^ Baiblo komɛ de ke “ngɛ bɔku ɔmɛ a nɔ ɔ.”
^ “Yah” ji biɛ Yehowa a kpiti pomi.
^ Ngɛ Hebri gbi mi ɔ, “kojolɔ.”
^ Aloo “atuã tsɔli.”
^ Ngɛ Hebri gbi mi ɔ, “Hiɔwe dɛ pue si.”
^ Ngɛ Hebri gbi mi ɔ, “weto ní.”
^ Baiblo komɛ de ke ““to tsu ɔmɛ.”
^ Aloo “E ngɛ kaa nɔ́ nɛ snoo nɛ ngɛ Zalmon.”
^ Aloo “yoku gojoo.”
^ Aloo “Mawu suɔ kaa e pee.”
^ Aloo “nɛ e yaa nɛ e baa.”
^ Ngɛ Hebri gbi mi ɔ, “ngɛ kpe ngua a mi.
^ Ngɛ Hebri gbi mi ɔ, “ma amɛ ma ba naa sika hiɔ nɔ.”
^ Aloo “brɔnz,” jã nɛ e tsɔɔ ngɛ hiɛ ɔ kɛ he kpahi nɛ e je kpo ngɛ ngɛ yi nɛ ɔ mi.
^ Baiblo komɛ de ke “Ma nane mi dali maa je Egipt kɛ ba.”
^ Aloo “Nyɛɛ fia la.”
^ Ngɛ Hebri gbi mi ɔ, “o.”
