La 65:1-13
Kɛ ha la nɔ hyɛlɔ ɔ. La nɛ David po.
65 Oo Mawu, yi jemi ngɛ mo mlɛe ngɛ Zion;Wa maa ye kitahi nɛ wa kã mo ɔ nɔ.
2 Oo sɔlemi Tue Bulɔ, o ngɔ lɛ nimli slɔɔtohi* tsuo maa ba.
3 Ye tɔmi ɔmɛ hiɛ ngɛ ye nɔ tsɔ,Se o kɛ wa tɔmi ɔmɛ keɔ wɔ.
4 Nɔ nɛ o hla nɛ o ngɔ lɛ kɛ ba o kasa nyaKonɛ e ba hi o sɔlemi we ɔ yale ɔ mi ɔ ngɛ bua jɔmi.
Wa maa tɔ kɛ ní kpakpahi nɛ a ngɛ o we ɔ,O sɔlemi we* klɔuklɔu ɔ.
5 O kɛ dami ní peepeehi nɛ a ngɛ gbeye ma ha wɔ heto,Oo Mawu, wa yi wami helɔ;Mo ji zugba a nyagbe he ɔmɛ tsuoKɛ nihi nɛ a ngɛ wo se tsitsaa lokoo ɔ a Hɛ Kɛ Nɔ Fɔmi.
6 O* ngɔ yoku ɔmɛ kɛ ma si kpɛii ngɛ o he wami ɔ nya;O* wo he wami kaa tade.
7 O* jɔɔ wo nɛ gli ɔ he,O jɔɔ e we oslɔkehi nɛ ngɛ kue ɔ, kɛ je ma amɛ a hoo peemi ɔ he.
8 Sawale maa nu nihi nɛ a ngɛ hehi nɛ kɛ ɔ ngɛ o we okadi ɔmɛ a he je;O ma ha nɛ nihi nɛ a ngɛ puje he kɛ ya si pusinɔ he ɔ ma he ose.
9 O hyɛɔ zugba a nɔ,O haa nɛ e baa ní babauu, nɛ e hi saminya.*
Pa nɛ je Mawu ngɔ ɔ hyi tɔ kɛ nyu;O haa mɛ ngma,Ejakaa jã nɛ o pee zugba a.
10 O haa nɛ nyu hyiɔ nyu dɔhi nɛ a gba a mi, nɛ o haa nɛ zugba a nɛ a futu ɔ nɔ daa;O haa nɛ hiɔmi nɛɔ kɛ pueɔ zugba a nɔ konɛ e he nɛ jɔ; o jɔɔ zugba a nɛ níhi waa ngɛ nɔ.
11 O ngɔ o kpakpa peemi ɔ kɛ bu jeha a jlasi;O blɔ ɔ nɔ hyi kɛ ní babauu.*
12 Nga mumu sɔuu lɛ* ngɛ lohwehi a ní yemi hehi nɛ ngɛ nga a nɔ ɔ,Nɛ bua jɔmi ha kpongu ɔmɛ a nɔ.
13 Lohwehi a ní yemi he ɔ hyi tɔ kɛ tohi sɔuu,Nɛ ngma ha dɔgba amɛ a mi.
A heɔ ose kaa kunimi yeli, ee, a laa.
Sisi Ningmahi
^ Ngɛ Hebri gbi mi ɔ, “he lohi.”
^ Aloo “jami he.”
^ Ngɛ Hebri gbi mi ɔ, “E.”
^ Ngɛ Hebri gbi mi ɔ, “E.”
^ Ngɛ Hebri gbi mi ɔ, “E.”
^ Ngɛ Hebri gbi mi ɔ, “o haa nɛ e baa ní kɛ beɔ nɔ.”
^ Ngɛ Hebri gbi mi ɔ, “Zɔ dɛɔ kɛ pueɔ o blɔ ɔ nɔ.”
^ Ngɛ Hebri gbi mi ɔ, “lɛ dɛɔ.”
