2 Samuel 1:1-27
1 Saul gbenɔ se benɛ David ya ye Amalek bi ɔmɛ a nɔ kunimi* nɛ e kpale kɛ ba a, David ba hi Ziklag ligbi enyɔ.
2 Ligbi etɛne ɔ, nyumu ko je Saul sito he ɔ kɛ ba kɛ e he tadehi nɛ gba kɛ e yi mi zu. Benɛ e su David ngɔ ɔ, e kplã si ngɛ zugba nɛ e kɛ e hɛ mi bu si.
3 David bi lɛ ke: “Jije o je?” E he nɔ ke: “I tu fo kɛ je Israel sito he ɔ.”
4 David bi lɛ ke: “Kɛ níhi ya nɔ ha kɛɛ? I kpa mo pɛɛ, mo de mi.” Nɛ e he nɔ ke: “Ni ɔmɛ tu fo ngɛ ta a nya, nɛ nihi fuu nɔɔ si nɛ a gbo. Saul kɛ e binyumu Yonatan hu gbo.”
5 Kɛkɛ nɛ David bi niheyo ɔ nɛ e ba bɔ lɛ amaniɛ ɔ ke: “Kɛ o plɛ kɛ le kaa Saul kɛ e binyumu Yonatan gbo kɛɛ?”
6 Niheyo ɔ ha heto ke: “I ya je kpo ngɛ Gilboa Yoku ɔ nɔ tlukaa, kɛkɛ nɛ i na Saul nɛ e kpasa e we akplɔ ɔ, nɛ́ ta zugba lɛhi kɛ okpɔngɔ nɔ hili su e he tã.
7 Benɛ e plɛ e he nɛ e na mi ɔ, e tsɛ mi, nɛ i he nɔ ke, ‘Imi ji nɛ ɔ nɛ!’
8 E bi mi ke, ‘Mɛnɔ ji mo?’ I he nɔ ke, ‘Amalek no ji mi.’
9 Kɛkɛ nɛ e de ke, ‘I kpa mo pɛɛ nɛ o hɛ mo kɛ su ye he nɛ o gbe mi, ejakaa i ngɛ piie wawɛɛ, se i gbo we lolo.’*
10 Lɔ ɔ he ɔ, i su e he nɛ i gbe lɛ, ejakaa i le kaa bɔ nɛ e plaa kɛ fɔɔ si ha a, e yi be wami náe. Lɔ ɔ se ɔ, i je matsɛ pɛɛ* ɔ nɛ ngɛ e yi ɔ, kɛ ga nɛ ngɛ e nine si ɔ, nɛ i ngɔ kɛ ba hiɛ ɔ konɛ ma kɛ ba ha ye nyɔmtsɛ ɔ.”
11 Kɛkɛ nɛ David gba e tade ɔmɛ, nɛ nyumu ɔmɛ tsuo nɛ a piɛɛ e he ɔ hu pee jã.
12 Nɛ a ye aywilɛho wawɛɛ, nɛ a fo ya, nɛ a ha hwɔ kɛ ha Saul, e binyumu Yonatan, Yehowa we bi ɔmɛ, kɛ Israel we ɔ kɛ ya si gbɔkuɛ, ejakaa a nɔ ngɛ klaate nya.
13 David bi niheyo ɔ nɛ ba bɔ lɛ amaniɛ ɔ ke: “Jije no ji mo?” E he nɔ ke: “Nubwɔ ko nɛ e ji Amalek no binyumu ji mi.”
14 Kɛkɛ nɛ David bi lɛ ke: “Mɛni he je nɛ o yi gbeye kaa o ma wo o nine nɔ ngɛ nɔ nɛ Yehowa pɔ lɛ nu ɔ nɔ nɛ o gbe lɛ ɔ?”
15 Kɛkɛ nɛ David tsɛ nihewi ɔmɛ a kpɛti nɔ kake nɛ e de lɛ ke: “Ba nɛ o ba fia lɛ nɔ́.” Enɛ ɔ he ɔ, e fia lɛ nɔ́ nɛ e gbo.
16 David de lɛ ke: “O muɔ ma kpa kɛ bu mo nitsɛ o yi, ejakaa mo nitsɛ o nya ye odase kɛ si o he ke, ‘Imi nitsɛ lɛ i gbe nɔ nɛ Yehowa pɔ lɛ nu ɔ nɛ.’”
17 Lɔ ɔ se ɔ, David la aywilɛho yemi la nɛ ɔ ngɛ Saul kɛ e binyumu Yonatan he
18 nɛ e de ke a tsɔɔ Yuda bi ɔmɛ aywilɛho yemi la a nɛ́ a tsɛɛ ke “Kɛ̃ɛ̃ ɔ.” A ngma la nɛ ɔ ngɛ Yashar womi ɔ mi:
19 “Oo Israel, a gbe o he fɛu ɔ kɛ fɔɔ si ngɛ o yoku ɔmɛ a nɔ.
Hyɛ bɔ nɛ he wali ɔmɛ gbo ha!
20 Nyɛ ko wo nɔ ta ngɛ Gat;Nyɛ ko fiɛɛ ngɛ Ashkelon gbɛjegbɛ ɔmɛ a nɔ,Ke pi jã a, Filisti bi ɔmɛ a biyi ɔmɛ ma nya,Ke pi jã a, nyumu mɔmlɔtɔtsɛmɛ ɔmɛ a biyi ɔmɛ a bua maa jɔ wawɛɛ.
21 Nyɛ Gilboa yokuhi,Bɔ́ aloo hiɔmi nɛ ko nɛ ngɛ nyɛ nɔ,Jã kɛ̃ nɛ yemi kɛ buami klɔuklɔuhi nɛ ko je ngmɔ ɔmɛ a mi kɛ ba,Ejakaa a ble he wali ɔmɛ a tsɛ̃i ɔ ngɛ lejɛ ɔ,A pɔɛ Saul tsɛ̃i ɔ nu hu.
22 Yonatan kɛ̃ɛ̃ ɔ kɛ Saul klaate ɔ du ngɛ he nyɛli ɔmɛ a muɔ mi,Nɛ e gbu he wali ɔmɛ a zɔ ɔ,A yeɔ manye kokooko.
23 Saul kɛ Yonatan, nihi nɛ a suɔ mɛ nɛ a fiɛ we a he,Nɛ a mi gba we ngɛ gbenɔ mi.
A he sɔɔ pe kɔlehi,A he wa pe jatahi.
24 Oo Israel biyihi, nyɛ fo Saul he ya,Nɔ nɛ e wo nyɛ tade tsutsu kɛ afɛu níhi,Nɔ nɛ e ngɔ sika tsu junehi kɛ pue nyɛ tade ɔmɛ a nɔ ɔ.
25 Hyɛ bɔ nɛ he wali gbo ngɛ ta mi ha!
A gbe Yonatan kɛ fɔ si ngɛ o yoku ɔmɛ a nɔ!
26 O gbenɔ ɔ dɔ mi wawɛɛ, ye nyɛminyumu Yonatan;I suɔ o sane wawɛɛ nitsɛ.
Suɔmi nɛ o je kpo kɛ ha mi ɔ nya wa pe yihi a suɔmi.
27 Hyɛ bɔ nɛ he wali gboNɛ́ ta hwumi níhi a hɛ mi kpata ha!”
Sisi Ningmahi
^ Aloo “David ya gbe Amalek bi ɔmɛ.”
^ Aloo “ejakaa ye klaa tsuo ngɛ ye mi loloolo.”
^ Aloo “jlasi.”
