1 Mose 3:1-24
3 Ngɛ nga mi lohwehi tsuo nɛ Yehowa Mawu bɔ ɔ a kpɛti ɔ, sinɔ ji lohwe nɛ e hɛ mi tɛ* pe kulaa. Lɔ ɔ he ɔ, e bi yo ɔ ke: “Anɛ Mawu de niinɛ kaa nyɛ ko ye abɔɔ ɔ mi tso ɔmɛ ekoeko nɔ yiblii lo?”
2 Kɛkɛ nɛ yo ɔ de sinɔ ɔ ke: “Wa ma nyɛ maa ye abɔɔ ɔ mi tso ɔmɛ a yiblii.
3 Se Mawu de ngɛ tso ɔ nɛ ngɛ abɔɔ ɔ kpɛti ɔ yiblii ɔ he ke: ‘Nyɛ ko ye, dɛbi, nyɛ ko ta he; ke pi jã a, nyɛ ma gbo.’”
4 Kɛkɛ nɛ sinɔ ɔ de yo ɔ ke: “Nyɛ be gboe kɔkɔɔkɔ.
5 Ejakaa Mawu le kaa ligbi nɛ nyɛ maa ye e nɔ yiblii ɔ, nyɛ hɛngmɛ ma bli, nɛ nyɛ maa pee kaa Mawu, nɛ nyɛ maa le kpakpa kɛ yayami.”
6 Lɔ ɔ he ɔ, yo ɔ na kaa tso ɔ maa hi yemi, nɛ e peeɔ hɛngmɛ akɔnɔ, ee, tso ɔ ngɛ fɛu. Kɛkɛ nɛ e tsɔ tso ɔ yiblii ɔ eko nɛ e ye. Pee se ɔ, benɛ e huno ɔ ngɛ e kasa nya a, e ha lɛ eko nɛ e ye.
7 Kɛkɛ nɛ mɛ ni enyɔ ɔmɛ tsuo a hɛngmɛ bli, nɛ a yɔse kaa a hɛɛ a he gu. Lɔ ɔ he ɔ, a kpɛ fig bahi nɛ a ngɔ kɛ ha a mlɛ mi.
8 Pee se benɛ gbɔkuɛ nya si kɔɔhiɔ yluduu ko ngɛ fiae ɔ,* nyumu ɔ kɛ e yo ɔ nu Yehowa Mawu gbi benɛ e ngɛ nyɛɛe ngɛ abɔɔ ɔ mi ɔ, nɛ a ya laa a he ngɛ abɔɔ ɔ mi tso ɔmɛ a kpɛti kɛ je Yehowa Mawu hɛ mi.
9 Nɛ Yehowa Mawu tsɛ nyumu ɔ si abɔ nɛ e bi lɛ ke: “Jije o ngɛ?”
10 Nyagbenyagbe ɔ, e de ke: “I nu o gbi ngɛ abɔɔ ɔ mi, se i ye gbeye, ejakaa i hɛɛ ye he gu, lɔ ɔ he ɔ, i laa ye he.”
11 Kɛkɛ nɛ Mawu bi lɛ ke: “Mɛnɔ de mo ke o hɛɛ o he gu? Tso ɔ nɛ i fã mo ke o ko ye e nɔ yiblii ɔ, anɛ o ye e yiblii ɔ eko lo?”
12 Nyumu ɔ de ke: “Yo ɔ nɛ o ngɔ kɛ ba piɛɛ ye he ɔ, lɛ nɛ e ha mi tso ɔ yiblii ɔ eko, nɛ i ye.”
13 Kɛkɛ nɛ Yehowa Mawu bi yo ɔ ke: “Mɛni o pee nɛ ɔ?” Yo ɔ he nɔ ke: “Sinɔ ɔ lɛ sisi mi, nɛ i ye.”
14 Kɛkɛ nɛ Yehowa Mawu de sinɔ ɔ ke: “Nɔ́ nɛ o pee nɛ ɔ he je ɔ, a gbiɛ mo ngɛ we mi lohwehi tsuo, kɛ pu mi lohwehi tsuo a kpɛti. O maa sã si ngɛ o mi mi nɔ, nɛ o maa ye zu o wami ligbi ɔmɛ tsuo.
15 Nɛ ma ha nɛ ninyɛ* maa hi o kɛ yo ɔ nyɛ kpɛti, kɛ o nina* kɛ yo ɔ hu nina* a kpɛti. E* maa ywia o yi,* nɛ mo hu o maa kɔ̃* e nane se ja.”
16 E de yo ɔ ke: “Ma ha nɛ o maa na nɔ́ wawɛɛ ngɛ o hɔ ngɔmi mi; nɔ́ nami mi nɛ o ma fɔ o bimɛ ngɛ, nɛ o maa hia o huno ɔ wawɛɛ, nɛ e maa ye o nɔ.”
17 Nɛ Adam* lɛɛ e de lɛ ke: “Akɛnɛ o bu o yo ɔ tue nɛ o ye tso ɔ nɛ i fã mo ke, ‘Koo ye e yiblii’ ɔ he je ɔ, a gbiɛ zugba a ngɛ o he je. O maa na nɔ́ loko zugba a maa ba ní ha mo nɛ́ o ye o wami ligbi ɔmɛ tsuo.
18 E maa puɛ miohi kɛ mio tsohi ha mo, nɛ nga nɔ bahi nɛ o maa ye.
19 O maa nyla o hɛ mi latsa loko o maa ye ní* kɛ yaa si be nɛ o maa kpale kɛ ya zu mi, ejakaa zu mi nɛ a je mo kɛ je. Zu ji mo, nɛ zu mi nɛ o maa kpale kɛ ya.”
20 Enɛ ɔ se ɔ, Adam wo e yo ɔ biɛ ke Hawa,* ejakaa lɛ nɛ e ma ba pee adesahi tsuo a nyɛ.*
21 Nɛ Yehowa Mawu ngɔ lohwe he womihi kɛ pee tade gagaagahi kɛ ha Adam kɛ e yo ɔ konɛ a wo.
22 Lɔ ɔ se ɔ, Yehowa Mawu de ke: “Hyɛ, nɔmlɔ ɔ ba pee kaa wa kpɛti nɔ kake ngɛ kpakpa kɛ yayami lemi blɔ fa mi. Jehanɛ ɔ, bɔ nɛ pee nɛ e ko tsɔ* wami tso ɔ yiblii ɔ hu eko nɛ e ye nɛ e hi si kɛ ya neneene* he je ɔ,—”
23 Kɛkɛ nɛ Yehowa Mawu fiee lɛ kɛ je Eden abɔɔ ɔ mi konɛ e ya hu zugba a nɛ a je lɛ kɛ je mi ɔ.
24 Lɔ ɔ he ɔ, e fiee nɔmlɔ ɔ kɛ je kpo, nɛ e ngɔ kerubhi kɛ klaate nɛ ngɛ tsoe nɛ e ngɛ e he poe kɛ to Eden abɔɔ ɔ puje he konɛ a bu blɔ ɔ nɛ yaa wami tso ɔ he ɔ he.
Sisi Ningmahi
^ Aloo “e le ga.”
^ Ngɛ Hebri gbi mi ɔ, “be nɛ kɔɔhiɔ yluduu fiaa ngɛ ligbi ɔ mi ɔ.”
^ Aloo “pɛ.”
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “ngmɛdu.”
^ Nɛ ji, yo ɔ nina a.
^ Aloo “fia o yi nɔ́.”
^ Aloo “plaa.”
^ E sisi ji “Zugba a Nɔ Nɔmlɔ; Adesa; Nɔmlɔ Adesa.”
^ Ngɛ Hebri gbi mi ɔ, “abolo.”
^ E sisi ji “Nɔ Nɛ E Hɛ Ngɛ.”
^ Ngɛ Hebri gbi mi ɔ, “nɔ fɛɛ nɔ nɛ e hɛ ngɛ ɔ nyɛ.”
^ Ngɛ Hebri gbi mi ɔ, “e ko kpã e nine mi nɛ e tsɔ.”
^ Aloo “kɛ ya daa.”
