Dɛbi, Baiblo ɔ tsɔɔ we kaa Maria lɛ fɔ Mawu, nɛ Baiblo ɔ de we kaa e sa nɛ Kristofohi nɛ a ja Maria loo a wo e hɛ mi nyami ngɛ blɔ ko nɔ hulɔ. * Mo susu he nɛ o hyɛ:

•   Maria de we ngɛ Baiblo ɔ mi he ko ke lɛ nɛ e fɔ Mawu. Mohu ɔ, Baiblo ɔ tsɔɔ kaa lɛ nɛ e fɔ “Mawu Bi ɔ”, se pi Mawu nitsɛ.​—Maako 1:1; Luka 1:​32.

•   Yesu Kristo de we hyɛ kaa Maria ji Mawu yayo, nɛ e de we hu kaa e sa nɛ a ja Maria hulɔ. Be nɛ yo ko ka kaa e maa wo Maria hɛ mi nyami akɛnɛ lɛ nɛ e fɔ Yesu he je ɔ, Yesu dla e juɛmi. E de ke: “Ohoo, mohu ɔ, nihi nɛ a nuɔ Mawu munyu ɔ nɛ a yeɔ nɔ ɔ, mɛ lɛ a ngɛ bua jɔmi!”​—Luka 11:27, 28.

•   Munyu nɛ ji “Mawu Nyɛ” kɛ “Theotokos” ɔ be Baiblo ɔ mi.

•   Munyu nɛ ji “Hiɔwe Manyɛ” nɛ a kɛ tsu ní ngɛ Baiblo ɔ mi ɔ kɔ we Maria he, mohu ɔ, e ji lakpa yo mawu ko nɛ Israel bi nɛ a je Mawu se ya ja a biɛ. (Yeremia 44:15-​19) Eko ɔ, “Hiɔwe Manyɛ” nɛ ɔ ji Babilonia bi a yo mawu nɛ a tsɛɛ ke Ishtar (Astarte) a nɛ.

•   Kristofohi nɛ a hi si ngɛ kaseli ɔmɛ a be ɔ mi ɔ ja we Maria, nɛ a nguɛ hɛ mi nyami kɛ ha lɛ. Yi nɔ sane ngmalɔ ko tsɔɔ kaa Kristofohi nɛ a hi si ngɛ kaseli ɔmɛ a be ɔ mi ɔ “ja we Maria ngɛ blɔ ko blɔ ko nɔ, nɛ a wui Maria hɛ mi nyami ngɛ blɔ ko nɔ hulɔ nɛ́ nihi ko ná susumi kaa e ji yo mawu ko nɛ a ngɛ jae.”​—In Quest of the Jewish Mary.

•   Baiblo ɔ tsɔɔ kaa Mawu ngɛ kɛ je neneene kɛ yaa neneene. (La 90:​1, 2; Yesaya 40:28) Akɛnɛ Mawu be sisije he je ɔ, e be nyɛe maa hi nyɛ. Jehanɛ se hu ɔ, Maria be nyɛe maa ngɔ Mawu hɔ; ejakaa Baiblo tsɔɔ kaa hiɔwe se lokoo po kpi Mawu.​—1 Matsɛmɛ 8:​27.

Maria​​—Yesu Nyɛ, se pi “Mawu Nyɛ”

 Maria ji Yuda no, nɛ Matsɛ David bi ji lɛ. (Luka 3:23-31) E ngɛ hemi kɛ yemi nɛ e yeɔ Mawu gbeye, enɛ ɔ he je ɔ, Yehowa ná e he bua jɔmi babauu. (Luka 1:28) Mawu hla lɛ kaa e ba pee Yesu nyɛ. (Luka 1:31, 35) Pee se ɔ, Maria kɛ Yosef fɔ bimɛ kpahi hulɔ.​—Maako 6:3.

 E ngɛ mi kaa Baiblo ɔ tsɔɔ kaa pee se ɔ, Maria ba pee Yesu kaselɔ mohu lɛɛ, se lɔ ɔ se ɔ, Baiblo ɔ tui e he munyu tsɔ.​—Ní Tsumi 1:14.