Ngɛ Baiblo ɔ mi ɔ, munyu nɛ a tsɔɔ sisi ke “gbogboehi a si temi” ɔ je Hela munyungu nɛ ji a·naʹsta·sis ɔ mi. Munyungu nɛ ɔ sisi ji “si temi” aloo “si temi kɛ da si ekohu.” Ke a ke a tle nɔ ko si ɔ, e tsɔɔ kaa e tsiɛɛ nɔ ɔ kɛ je gbeje kɛ ba wami mi ekohu kaa bɔ nɛ e ngɛ loko e gbo ɔ.​—1 Korinto Bi 15:12, 13.

 E ngɛ mi kaa a kɛ munyu nɛ ji “gbogbohi a si temi” ɔ tsu we ni ngɛ Hebri Ngmami nɛ a pɔɔ lɛ tsɛ mi ke Somi Momo ɔ mi mohu lɛɛ, se munyuhi komɛ ngɛ Somi Momo ɔ mi nɛ tsɔɔ kaa nihi maa kpale kɛ ba wami mi ekohu. Kaa nɔ hyɛmi nɔ́ ɔ, Mawu gu gbalɔ Hosea nɔ kɛ wo si ke: ‘Ma kpɔ mɛ kɛ je Gbeje; ma he mɛ kɛ je gbenɔ dɛ mi.’​—Hosea 13:14; Hiob 14:13-​15; Yesaya 26:19; Daniel 12:​2, 13.

 Jije a ma tle nihi nɛ a gbo ɔ si kɛ ya? A tleɔ ni komɛ si kɛ yaa hiɔwe konɛ a ya piɛɛ Kristo he kɛ ye matsɛ. (2 Korinto Bi 5:1; Kpojemi 5:​9, 10) Baiblo ɔ tsɛɛ lɛ ke “ni gbogboehi a si tlemi kekleekle nɔ́.” Enɛ ɔ tsɔɔ kaa gbogboehi a si temi kpa maa ya nɔ ngɛ lɔ ɔ se. (Kpojemi 20:5 ) Gbogboehi a si temi nɛ maa nyɛɛ se ɔ ji nihi nɛ a ma tle mɛ si kɛ ba wami mi ngɛ zugba a nɔ. Ni gbogboehi tsuo nɛ a ma tle mɛ si kɛ ba wami mi ɔ a mi hiɛhiɛɛ maa hi zugba a nɔ.​—La 37:29.

 Mɛni blɔ nɔ a maa gu kɛ tle nihi nɛ a gbo ɔ si? Mawu ha Yesu he wami nɛ e kɛ tle ni gbogboe ɔmɛ si. (Yohane 11:25) Yesu ma tle nihi tsuo nɛ a ngɛ “yɔkɔ ɔmɛ a mi” ɔ si kɛ ba wami mi ekohu. Bɔ nɛ nɔ ɔ ngɛ ha, e ní peepee kɛ bɔ nɛ e susuɔ níhi a he ha loko e gbo ɔ maa hi jã nɔuu. (Yohane 5:​28, 29) Nihi nɛ a ma tle mɛ si kɛ ya hiɔwe ɔ ma ná mumi mi nɔmlɔ tso, nɛ nihi nɛ a ma tle mɛ si kɛ ba wami mi ngɛ zugba a nɔ ɔ ma ná he lo nɔmlɔ tso kpakpa.​—Yesaya 33:24; 35:​5, 6; 1 Korinto Bi 15:42-​44, 50.

 Mɛnɔmɛ nɛ a ma tle mɛ si? Baiblo ɔ tsɔɔ kaa “adesahi tsuo maa te si kɛ je gbeje hwɔɔ se, ni kpakpahi jio, yayami peeli jio.” (Bɔfo Ɔmɛ A Ní Tsumi 24:15) Ni kpakpahi nɛ a ma tle mɛ si ɔ a ti ni komɛ ji anɔkualetsɛmɛ komɛ kaa Noa, Sara kɛ Abraham. (1 Mose 6:9; Hebri Bi 11:11; Yakobo 2:​21) Yayami peeli nɛ a ma tle mɛ si ɔ a ti ni komɛ ji nihi nɛ a kɛ Mawu blɔ tsɔɔmi tsu we ní ejakaa a ná we he blɔ nɛ a kase Mawu mlaa amɛ konɛ a kɛ tsu ní.

 Se yiwutsotsɛmɛ nɛ kplii a tsui nɛ a kua tsakemi nɛ a gbo ɔ lɛɛ a be mɛ si tlee. Ke nihi kaa jã gbo ɔ, a hɛ mi kpata pɛsɛpɛsɛ. Hɛ nɔ kami ko kulaa be ha mɛ kaa a maa kpale kɛ ba wami mi ekohu.​—Mateo 23:33; Hebri Bi 10:26, 27.

 Mɛni be gbogboehi a si temi ɔ maa ba? Baiblo ɔ gba kɛ fɔ si kaa, gbogboehi a si temi kɛ ya hiɔwe ɔ maa ya nɔ ngɛ Kristo bami ɔ mi. Kristo bami ɔ je sisi ngɛ jeha 1914 ɔ mi. (1 Korinto Bi 15:21-​23) Gbogboehi a si temi kɛ ba wami mi ngɛ zugba a nɔ ɔ maa ya nɔ ngɛ Yesu Kristo Jeha Akpe Nɔ Yemi ɔ mi. Ngɛ jamɛ a be ɔ mi ɔ, zugba a tsuo maa pee paradeiso.​—Luka 23:43; Kpojemi 20:​6, 12, 13.

 Mɛni he je e sa nɛ wa he ye kaa ni gbogboehi maa te si? Baiblo ɔ tu gbogboehi a si temi kakaaka nɛɛ nɛ nihi ye he odase ɔ he munyu. (1 Matsɛmɛ 17:17-24; 2 Matsɛmɛ 4:32-37; 13:20, 21; Luka 7:11-17; 8:40-56; Yohane 11:38-44; Bɔfo Ɔmɛ A Ní Tsumi 9:36-42; 20:7-12; 1 Korinto Bi 15:3-6) Lazaro si nɛ Yesu tle ɔ sa kadi mi wawɛɛ, ejakaa e gbo ligbi eywiɛ, nɛ Yesu tle lɛ si kɛ ba wami mi ngɛ nihi babauu a hɛ mi. (Yohane 11:39, 42.) Nihi nɛ te si kɛ wo Yesu ɔ po nyɛ we nɛ a je sane nɛ ɔ he atsinyɛ. Lɔ ɔ he ɔ, a to kaa a ma gbe Yesu kɛ Lazaro tsuo.​—Yohane 11:47, 53; 12:9-11.

 Baiblo ɔ tsɔɔ kaa Mawu ngɛ he wami nɛ e kɛ ma tle nihi nɛ a gbo ɔ si, nɛ e suɔ kaa e maa pee jã hulɔ. Mawu nile ɔ se be, enɛ ɔ he ɔ, e le nihi nɛ e ma tle mɛ si kɛ ba wami mi ɔ a he nɔ́ fɛɛ nɔ́. (Hiob 37:23; Mateo 10:30; Luka 20:37, 38.) Mawu ma nyɛ ma tle nihi nɛ a gbo ɔ si kɛ ba wami mi ekohu, nɛ e suɔ kaa e maa pee jã! Baiblo ɔ tu gbogboehi a si temi nɛ maa ba hwɔɔ se ɔ he munyu ke: Mawu “hɛ ma ja ngɛ e nine nya ní tsumihi a he.”​—Hiob 14:15 NW.

Susumi nɛ dɛ nɛ nihi hɛɛ ngɛ gbogboehi a si temi ɔ he

 Lakpa Munyu: Gbogboehi a si temi ɔ tsɔɔ kaa a ma bla klaa a kɛ nɔmlɔ tso ɔ ekohu.

 Anɔkuale Munyu: Baiblo ɔ tsɔɔ kaa nɔmlɔ adesa ji klaa a nɛ, se pi nɔmlɔ tso ɔ fã ko nɛ hii wami mi ngɛ nɔ ɔ gbenɔ se. (1 Mose 2:7, NW, sisi ningma; Ezekiel 18:4 NW.) Ke a tle nɔ ko si ɔ, pi kaa a maa kpale e klaa kɛ wo e nɔmlɔ tso ɔ mi. Se mohu ɔ, a maa bɔ lɛ ekohu kaa klaa nɛ e hɛ ngɛ.

 Lakpa Munyu: A ma tle ni komɛ si kɛ ba wami mi, se a maa kpale kpata a hɛ mi oya nɔuu.

 Anɔkuale Munyu: Baiblo ɔ de ke “ni nɛmɛ nɛ pee yayami lɛɛ a maa te si, konɛ a kojo mɛ.” (Yohane 5:29) A maa da níhi nɛ a maa pee ke a tle mɛ si ɔ nɔ kɛ kojo mɛ, se pi níhi nɛ a pee loko a gbo ɔ. Yesu de ke: ‘Ni gbogboe ɔmɛ maa nu Mawu Bi ɔ gbi, nɛ ni nɛmɛ nɛ a bu tue ɔ ma ná wami.’ (Yohane 5:25) Nihi nɛ a ‘buɔ tue’ loo a nuɔ níhi nɛ a tsɔɔ mɛ be mi nɛ a tle mɛ si ɔ, a maa ngma a biɛ ngɛ ‘wami womi’ ɔ mi.​—Kpojemi 20:12, 13.

 Lakpa Munyu: Bɔ nɛ nɔmlɔ tso ɔ ngɛ ha nɛ nɔ ɔ kɛ gbo ɔ, jã nɔuu e maa hi nɛ a kɛ maa tle lɛ si.

 Anɔkuale Munyu: Baiblo ɔ tsɔɔ kaa ke nɔ ko gbo ɔ, e nɔmlɔ tso ɔ puɛɔ.​—Fiɛlɔ 3:19, 20.