Lucaden pa Jehovah dong gutiyo ki Baibul mapat pat ma kigonyo i kwangi. Ento, watye ki pwoc i kom Baibul me New World Translation of the Holy Scriptures ma kigonyo i leb mapat pat pien tiyo ki nying Lubanga, kigonyo kakare, dok niang iye yot.

•   Tic ki nying Lubanga. Lugo Baibul mogo pe gimiyo deyo bot Ngat ma omiyo kicoyo Baibul. Me labolle, Baibul mo acel ma kigonyo ryeyo nying dano makato 70 ma olo gunywako i yubone. Ento, i Baibul acel-li kikwanyo woko nying Ngat ma omiyo kicoyo lok ma iye—Lubanga Jehovah!

   Ki tungcel, Baibul me New World Translation dwoko nying Lubanga i kabedo alip mapol ka ma onongo tye iye con, ento pe kiryeyo nying jo ma i komitti ma gugonyo.

•   Kigonyo kakare. Baibul mogo kigonyo i yo ma pe rwatte ki Ginacoya mukwongo. Me labolle, i Baibul mo acel, kigonyo Matayo 7:13 kuman: “Wudony ki i doggola mading, pien doggola ma tero dano i kapiny lac dok yone bene yot me wot iye.” Ento, Ginacoya mukwongo tiyo ki nyig lok ni “to,” ento pe “kapiny.” Twero bedo ni jo ma gugonyo gutiyo ki nyig lok ni “kapiny” pien onongo gitamo ni jo maraco gibiwang matwal i mac me kapiny. Ento, Baibul pe cwako tam meno. Ma ka meno, Baibul me New World Translation kigonyo kakare ni: “Wudony ki i dogcel mading, pien dogcel ma tero dano i to lac dok yone bene lac.”

•   Niang iye yot. Baibul ma kigonyo maber pe myero obed ma rwatte ki Ginacoya mukwongo keken, ento bene myero obed ma niang iye yot. Nen kong labol acel. I Jo Roma 12:11, lakwena Paulo otiyo ki lok mo ma gonye atir atir ni “cwiny ma tye ka yenyo.” Kit macalo niang i lok meno tek, Baibul me New World Translation gonyo tyeng meno i yo ma niang iye yot. Waco ni Lakricitayo myero obed “ma kome mit pi cwiny maleng.”

 Medo i kom tic ki nying Lubanga, bedo ki lok ma kigonyo kakare, ki dong bedo ma niang iye yot, Baibul me New World Translation dok pat adada i yo mukene: Kipoko labongo cul mo. Macalo adwogine, dano milion mapol gitwero kwano Baibul i leb ma meggi—kadi wa jo ma gipe ki kero me wilo Baibul.