Kidi onongo kitiyo kwede me rego bel kwon. Man obedo tic pa mon nyo lutic me gangi mapat pat. Mor pa kidi rego onongo obedo gin ma winye nino ducu i kare macon.​—Nia 11:5; Jeremia 25:10.

Cal acweya me lobo Ejipt nyuto kit ma onongo ki rego kwede. I kare ca, bel onongo kionyo i min kidi. Ngat ma mito rego-ni onongo gungu nyo rumu i nge min kidi, mako nyar kidi ki cinge aryo ci cako rego. Ma lubbe ki buk mo acel, kicoyo ni min kidi kacel ki nyar kidi onongo gitye ki kilo aryo ki angwen. Ka kitiyo kwede me lweny, ci romo neko dano.​—Lungolkop 9:50-54.

Rego bel kwon onongo obedo yo me kwo pa dano i kare ca dok meno aye gin mumiyo Baibul ogengo kwanyo kidi rego pa ngat mo keken. “Nwoyo Cik 24:6 waco ni: “Dano mo pe omi gijeng bote min kidi rego nyo nya kidi rego; meno rom ki kwanyo kwo pa dano me ajenga.”

Baibul waco ni Yecu “tye i kor ­Won.” (Jon 1:​18) Lok man nyuto wat macok ki mar madit ma tye i kin Yecu ki Lubanga. Man obedo gin ma onongo timme i tekwaro pa Lujudaya ka gitye ka cam.

I kare ma Yecu tye i lobo, Lujudaya onongo gibedo i kom mabor ma obedo calo kabuto ka gitye ka cam. Ngat acel acel onongo loko wiye tung ka ma cam tye iye kun nongo teno otwenge ma lacam ki gin mo ma kiyubo calo laten wic. Kit ma gibuto kwede weko cinggi tung acuc bed agonya. Buk mo acel waco ni pien dano ducu ma gitye ka cam gibuto ki langetgi tung acam ma nongo gutene atena, man te lokke ni ‘ngat moni nongo obuto i ‘kor’ lawote.”

Obedo twon deyo madit ka ngat moni bedo i kor lawi ot nyo ngat ma olwonge i pacone ka cam. Pi meno, i cam me Kato me agikki ma Yecu ocamo ki lupwonnyene, ‘lapwonnye ma Yecu maro,’ ma en aye lakwena Jon-ni, onongo obedo i kore. Jon onongo romo ‘jenge i kor Yecu’ me penye ki lapeny.​—Jon 13:​23-​25; 21:20.