1-3. Gen ma Paulo onongo tye kwede i kom Jehovah ojing odoko matek nining? (Nen cal ma tye i pot karatac man.)

 ONONGO pe yot me bedo Lakricitayo i lobo Roma i cencwari me acel. Kiuno lulub kor Kricito pienni kibedo ka kok i komgi ni gin aye guwango boma me Roma i 64 K.M. ki dok ni gidag dano. Ka onongo ibedo Lakricitayo i kare meno, oromo bedo ni onongo ibibedo ki lworo nino ducu ni kibimaki dok kibiuni. Twero bedo ni omege kacel ki lumege mogo lee mager omwodogi nyo kiguro i kom yat ci kiwangogi ma kwo wek gubed mac lameny piny i dyewor.

² Twero bedo ni i kare meno ma kwo tek tutwal-li aye kitweyo iye lakwena Paulo i buc pi tyen me aryo i Roma. Tika Lukricitayo luwote gumiye kony? Paulo nen calo obedo ki par madit i kare meno pien ocoyo bot Temceo ni: “I pidona mukwongo, dano mucung pira obedo pe. Jo ducu guringo gutenya woko liyak. Lubanga myero pe okwan lok man i wigi.” Kadi bed kit meno, Paulo owaco ni kare ducu kibedo ka miye kony, pe kiweke ata. En ocoyo ni: ‘Ento Rwot ocung ka ngeta, ka dong omiya teko.’ Ada, Rwot Yecu omiyo teko ma Paulo onongo tye ka mitone. Ento teko meno okonyo Paulo nining?  Paulo ocoyo ni: ‘Kilara kit meno ki i dog labwor.’​—2 Tem. 4:16, 17. *

³ Paulo wiye opo i kom kit ma Jehovah okonye kwede i kare mukato angec. Pi meno, en obedo ki gen ni Jehovah bimiye kero me kanyo kwo matek ma etye iye-ni kacel ki atematema mo keken ma bibino i anyim. En onongo pe ki akalakala mo keken ma omiyo en ocoyo ni: ‘Rwot bikonya miyo aa woko ki i gin maraco ducu.’ (2 Tem. 4:18) Ada, Paulo oniang ni kadi bed dano pe gitye ka miye kony muromo, en obedo ki gen ni Jehovah gin ki Yecu gubimiye kony.

4, 5. (a) Anga ma kare ducu romo mini kony ma imito? (b) In itwero jingo watti ki Jehovah nining?

⁴ Tika i kine mukene inongo ni itye ka tute ki pekoni keni labongo ngat mo ma konyi? Oromo bedo ni ipe ki dog tic, kitye ka keto lyeto i komi ki i cukul, two, nyo itye ka kemme ki peko mo ma tye ka yelo wi. Gwok nyo ipenyo jo mukene ni gukonyi ento pe gumini kony ma ipenyo pire-ni. Ki lok ada, peko mukene dano adana pe gitwero miniwa kony me cobone. Ci dong, gin ango ma ibitimo? Baibul wacciwa ni: “Gen Rwot [Jehovah.]” (Car. 3:5, 6) Ento tika itwero bedo ki gen ni en bikonyi? Twere! Kony ma Jehovah miyo tye ada kit ma labol mogo ma kicoyogi i Baibul waco kwede.

⁵ Pi meno, ma ka bedo ki kec cwiny ka dano pe gitye ka mini kony muromo, nen kare meno kit ma Paulo oneno kwede​—macalo kare me jenge i kom Jehovah ki cwinyi ducu ki dok neno kit ma en ogwoki kwede. Man biweko ibedo ki gen madit i kome dok watti ki en bijing doko matek.

6. Pingo twero bedo tek tutwal me geno Jehovah ka watye i peko?

⁶ Oromo bedo ni itye ki peko mo ma tye ka cwero cwiny adada. Twero bedo ni itimo jami ducu ma mitte me cobo peko meno dok bene ilego bot Jehovah wek okonyi. Tika iromo bedo ma cwinyi opye mot pien igeno ni en bikonyi? Iromo bedo ki gen! (Kwan Jabuli 62:8; 1 Petero 5:7.) Ka wamito dongo wat macok ki Jehovah, ci omyero wapwony kit me bedo ki gen i kome. Ada, bedo ki gen ni Jehovah bimini jami ma imito romo bedo tek adada. Pingo? Tyen lok acel tye ni Jehovah kare ducu pe gamo lega cutcut.​—Jab. 13:1, 2; 74:10; 89:46; 90:13; Ibru 1:2.

7. Pingo Jehovah kare ducu pe gamo legawa cutcut?

⁷ Pingo Jehovah kare ducu pe miniwa gin ma wamito cutcut? Wi myero opo ni en oporo watwa kwede ki wat ma tye i kin latin ki wonne. (Jab. 103:13) Lanyodo pe miyo gin mo keken ma latinne openyo nyo pe dong miyo oyotoyot. Miti pa lutino lokke aloka i cawa mo keken. Mogo myero kong gukur wa i kare ma rwatte. Kadi bed kumeno, man nongo pe yomo cwiny latin nyo dok bene gudo jo mukene. Medo i kom meno, bedo ka miyo gin mo keken ma latin openyo weko wat lokke doko calo pa opii gin ki laditte, ma latin doko ladit. I yo acel-li, Jehovah romo weko kare kato ma peya ogamo legawa pien en ngeyo gin ma wamito. Meno aye gin ma en timo macalo Lacwewa maryek, Laditwa ma lamar ki dong Wonwa me polo. Miyo jami ducu ma wamito cutcut romo balo wat maber  ma tye i kinwa ki en.​—Por ki Icaya 29:16; 45:9.

8. Ngo ma Jehovah ocikke me timone ma lubbe ki peko ma kerowa pe romo cirone?

⁸ Wiwa bene myero opo ni meno Jehovah ngeyo ka ma kerowa gik iye. (Jab. 103:14) Pi meno, en pe wekowa me ciro peko piwa kekenwa ento en konyowa macalo wego ma lamar. I cawa mukene wawinyo ni pe dong waromo medde ki cirone. Ento Jehovah ocikke botwa ni pe ebiweko luticce gideno can ma pe giromo cirone. Ada, en ‘bimiyowa yo ma myero wabwot kwede.’ (Kwan 1 Jo Korint 10:13.) Pi meno, watye ki tyen lok matir me bedo ki gen ni Jehovah ngeyo gin ma waromo cirone.

9. Ngo ma myero watim ka Jehovah pe ogamo legawa cutcut?

⁹ Omyero wadi cwinywa ka walego pi kony ki bot Jehovah ka ce en pe ogamo legawa cutcut. Nge ni meno en bene tye ka diyo cwinye pien en mito larowa. “Rwot [Jehovah] tye ka kuro me nyuto berre botwu; meno omiyo en oyubbe pi timowu kica. Pien Rwot aye Lubanga ma ngolo kop atir, jo ducu ma gibedo kun gikure gitye ki gum [yomcwiny].”​—Ic. 30:18.

10-12. (a) Gin ango ma weko bedo tek tutwal me gwoko dano mo ma kome lit? (b) Bedo ki gen i kom Jehovah gudo watwa ki en nining ka ce kwo tek? Mi lapor.

¹⁰ Ka itye ka wok ki i kwo matek adada, itwero winyo kit ma Paulo owinyo kwede​—ma nongo itamo ni itye nyo cok ki “dog labwor.” Man aye kare ma bedo ki gen i kom Jehovah pe yot ento kun inongo ni keto gen i kome pire tek adada. Me labolle, ket kong ni itye ka twoyo dano mo me odi, ma tye ki two mo ma pe cang. Twero bedo ni meno ilego pi ryeko kacel ki teko. * Ka dong itimo jami ducu ma mitte me cobo pekoni, tika pe inongo kwe cwiny me ngeyone ni meno Jehovah neno can ma itye iye ki dok bene bimini kero me ciro peko kun igwoko geneni?​—Jab. 32:8.

¹¹ Iromo tamone ni Jehovah pe tye ka konyi. Itwero nongo tam mapat pat ki bot ludaktari. Nyo wadi ma itye ki gen ni giromo kweyo cwinyi gin aye dok gitye ka weko kwoni bedo matek. Bed ka lega bot Jehovah wek omini kero ma mitte. Medde ki nyikke cok bote. (Kwan 1 Camuel 30:3, 6.) Ka en ocobo pekoni, ci man bijingo wat ma tye i kinwu.

¹² Linda * oniang ni lok man tye ada i nge mwaki mogo i kare ma obedo ka gwoko lunyodone ma onongo komgi lit ma peya guto. En owaco ni: “I kare ma kom lunyodona lit, cwara, omera matidi, wan ducu wiwa ocung woko ma pe wangeyo gin ma myero watim. I kine mukene wanongo ni ngat ma myero okonywa pe. Ento, tamo i kom gin mukato angec okonyowa me niang kit ma Jehovah ogwokowa kwede. En omiyo botwa kero kacel ki jami ma wamito kadi bed ni onongo wiwa ocung woko ma lubbe ki gin ma myero watim.”

13. Keto gen i kom Jehovah okonyo laminwa mo acel me diyo cwinye i kare ma tye ki peko mapol nining?

¹³ Keto genwa ducu i kom Jehovah bene konyowa ka ce peko ma poto atura otimme. I kare ma laminwa mo ma cware pe obedo Lacaden tye ka pongo fom me keto nyomgi, kinongo ni laminwa-ni ominne tye ki two mo malit adada ma  mako del kom ma kilwongo ni lupus. I nge dwe mogo, dako pa ominne oto woko. Rhonda ocako tic macalo painia marii i kare ma wiye ocako pye mot ki i jami magi ma onongo obalo wiye tutwal-li. I ngeye cutcut, minne bene oto woko. Gin ango ma okonye me diyo cwinye? En otito ni: “Abedo ka lega bot Jehovah nino ducu ni okonya kadi wa imoko tam matinotino. Timo meno omiya abedo ki wat matek ki Jehovah. Man opwonya me jenge i kome ento pe i koma kekena nyo jo mukene. Dok kony ma omiya tye ada​—en omiya jami ducu ma mitte. Macalo adwogine, anongo yomcwiny i tic kacel ki Jehovah.”

14. Gen ango ma Lakricitayo ma watte kiryemo ki i kacokke romo bedo kwede?

¹⁴ Tam kong dok i kom gin mukene matek adada. Ket kong ni watti mo kiryemo woko ki i kacokke. Ma lubbe ki kwanni me Baibul, ingeyo maber adada kit ma myero kiter kwede ngat ma kiryemo ki i kacokke. (1 Kor. 5:11; 2 Jon 10) Ento, lubo cik ma kwako ngat ma kiryemo ki i kacokke i kine mukene pe yot nyo bene tek adada. * Tika iromo bedo ki gen ni Abani me polo bimini kero ma mitte me cung matek kun ilubo tira ma Baibul miyo madok i kom ngat ma kiryemo ki i kacokke? Tika ineno ni man obedo kare maber me jingo watti ki Jehovah wek obed matek kun inyikke cok bote?

15. Pingo Adam pe owinyo dog Jehovah i poto me Eden?

¹⁵ Man kiromo porone ki gin ma otimme i kom Adam nining? Tika en ada  onongo geno ni ka ekwero winyo dog Jehovah ci pud doki ebimedde ki kwo? Pe, pien Ginacoya wacciwa ni meno “yam pe gibwolo” Adam. (1 Tem. 2:14) Pingo dong en okwero winyo dog Jehovah? Adam ocamo nyig yat ma Kawa omine-ni pien en onongo tye ki mar madit i kom dakone. En owinyo dog dakone ma ka winyo dog Lubanga Jehovah.​—Acak. 3:6, 17.

16. Nga ma myero wabed ki mar madit pire ki dok pingo?

¹⁶ Man mono te lokke ni pe myero wabed ki mar i kom wadiwa? Pe! Ento omyero wabed ki mar madit pi Jehovah. (Kwan Matayo 22:37, 38.) Marwa pi Jehovah twero konyo wadiwa kadi bed gitye ka tic pi Jehovah i kareni nyo pe. Pi meno, medde ki dongo marri pi Jehovah dok bene i ket genni i kome. Ka ce cwinyi tye ka cwer pienni kiryemo wati mo ki i kacokke, tit kit ma iwinyo kwede bot Jehovah. * (Rom. 12:12; Pil. 4:6, 7) Ti ki kare man ma cwinyi tye ka cwer-ni me yubo wati ki Jehovah wek odok matek. Man biweko iketo gen ni i kome dok bene inongo adwogi maber ka iwinyo doge.

17. Ka walungo wiwa i tic me tito kwena me Ker-ri, ci wabedo ki gen ni Jehovah bitimo gin ango piwa?

¹⁷ Pingo Jehovah olaro Paulo ki i “dog labwor”? En owaco ni: “Me tuco lok kakare, wek Lurok ducu guwiny.” (2 Tem. 4:17) Wan bene ka walungo wiwa i tic me tito kwena calo Paulo, ci wabibedo ki gen muromo ni Jehovah ‘bimedo’ botwa jami mukene ma wamitogi. (Mat. 6:33) Macalo lutit kwena me Ker-ri, Jehovah “omiyowa lok me kwena maber” dok en terowa ni wan wabedo “lutic kacel” kwede. (1 Tec. 2:4; 1 Kor. 3:9) Ka watiyo tic pa Lubanga ki mit kom, ci bibedo yot botwa me kuro lagam me legawa.

18. Ngo ma romo konyi me dongo genni i kom Jehovah kun iweko wat i kinwu bedo matek?

¹⁸ Pi meno, watiyu ki kare ma watye kwede kombeddi-ni me jingo watwa ki Lubanga. Ka ce gin mo keken weko wabedo ki par, ci omyero wati ki kare meno me nyikke cok bot Jehovah. Ada, ka waketo tamwa ducu ikwano Lok pa Lubanga, walego kare ducu, dok waketo cwinywa i tiyo ticce, ci wabibedo ki gen ni Jehovah romo dok bikonyowa ki i pekowa medo ki jami mukene ma tye anyim.