MWAKI mogo mukato angec, dano gubedo ki ur pi wi lok mo madit ma okati i gajeti akwana me lobo Korea, ma kilwongo ni The Chosun Ilbo. Gageti man openyo ni, “‘Shim Cheong ma Onongo Kite Ber’ dok Pe Ngeyo Lok Kom Yecu-ni​—Tika Ocito i Kapiny?”

Wi lok man ocwero cwiny dano adada pien Shim Cheong obedo dako mo ma jo Korea giboko lok kome dok gimaro adada pien ojalo kwone me gwoko wonne ma onongo wange oto woko-ni. Pi mwaki mapol dong, dano gupakke adada. Ki lok ada, i Korea, “Shim Cheong” kitero macalo anyaka ma omine dok odyero kwone.

Jo mapol gunongo ni pe pore dok cwero cwinygi me wacone ni kibiwango Shim Cheong i mac pienni pe onongo batija macalo Lakricitayo. Ki lok ada, ododo man kiboko mwaki mapol ma peya kicako tito lok kom Kricito i carone.

Lok man ma kicoyo i gajeti-ni onongo bene tye ki bute mo ma kipenyo iye latela dini mo acel. Kipenye ka ce jo ma guto labongo pwonyo lok i kom Yecu gibiwang i mac me kapiny. En ogamo ningo? “Pe wangeyo. Watamo ni Lubanga biparo [pi jo ma kit magi].”

Buk me The New Catholic Encyclopedia waco ni: “Batija pire tek wek ngat moni onong larre. Kit macalo Yecu owaco kwede, ngat moni pe romo donyo i Ker pa Lubanga ka pe kinywale odoco i pii ki cwiny maleng. (Jon 3.5)” Pi lok man, jo mukene gitamo ni dano ma guto labongo nongo batija-ni kibologi i mac me kapiny nyo gideno can i yo mukene ka guto.

Ento, tye dano mapol ma gitamo ni lok man obedo lok me mingo. Dano milion mapol guto ma pe gingeyo lok ada ma i Baibul. Tika opore me wangogi pi naka i mac me kapiny? Baibul kono waco gin ango?

Baibul nyuto ka maleng ni Lubanga paro pi jo ma pe gunongo kare me ngeyo gin ma en mito ki botgi. Tic pa Lukwena 17:30 cuko cwinywa ni: “I kare me kwiya piny Lubanga yam pe oparo pire.” Pi meno, gen ango ma tye i Baibul pi jo ma guto labongo pwonyo lok i kom Lubanga?

Lagamme twero nonge i gin ma Yecu owaco bot latim bal acel ma oto ka ngete. Laco meno owaco bot Yecu ni: “Po pira ka ibidonyo i kerri.” Yecu ogamo ningo? “Ada waco boti tin ni, in ibibedo kweda i Paradic.”​—Luka 23:39-43, NW.

Yecu mono onongo tye ka cikke ni laco-ni bidonyo i polo? Pe. Laco meno onongo pe “ginywale tyen me aryo” i pii ki cwiny, ma obedo gin ma mitte wek ngat moni odony i Ker me polo. (Jon 3:3-6) Ma ka meno, Yecu onongo tye ka cikke ni latim bal-li obikwo doki i Paradic. Kit macalo laco-ni obedo Lajudaya, en onongo nen calo ngeyo lok kom Paradic​—poto me Eden​—ma kiloko i kome i buk mukwongo me Baibul. (Acakki 2:8) Cikke pa Yecu-ni omiye gen matek me cer i lobo ma nongo dong kiloko odoko Paradic.

Ki lok ada, Baibul cikke ni “dano gibicer woko, jo ma kitgi atir wa ki jo ma kitgi pe atir.” (Tic 24:15) “Jo ma kitgi pe atir” aye jo ma pe gulubo cik pa Lubanga pienni onongo pe gingeyo gin ma en mito ki botgi. Yecu bicero latim bal meno ma onongo ‘kite pe atir-ri’ kacel ki dano milion nyo bilion mapol ma guto labongo ngec mo. I ngeye, kibipwonyogi ki cik pa Lubanga i Paradic i lobo kany, ci dong gibibedo ki kare me nyuto ni gimaro Lubanga kun gilubo cikke.

Ka dong kicero jo ma kitgi pe atir, tika kibingolo kop i wigi ma lubbe ki jami ma gutimo i kare mukato angec? Pe. Jo Roma 6:7 waco ni: “Ngat ma oto, balle dong gik woko.” Jo ma kitgi pe atir nongo dong guculo pi balgi ki to. Pi meno, kibingolo kop i wigi ma lubbe ki gin ma gibitimo i nge cerogi, ento pe ma lubbe ki gin ma gutimo i kare me kwiya piny ma peya guto. Adwogi maber ango ma gibinongone?

I nge cero jo ma kitgi pe atir, gin gibibedo ki kare me pwonyo cik pa Lubanga ka kiyabo buk mogo. Kibingolo kop i wigi ma lubbe ki “gin ma yam gin gutiyo,” ka gulubo cik pa Lubanga nyo pe. (Niyabo 20:12, 13) Pi jo mapol ma kitgi pe atir, man bibedo tyen me acel botgi me nongo kwo ma pe tum kun gipwonyo dok gitimo miti pa Lubanga.

Pwony man me Baibul-li okonyo dano mapol me bedo ki niye i kom Lubanga odoco. Yeong Sug tye ngat acel i kine. En odongo i paco ma jone Lukatoli. Jo mukene i pacogi gubedo padi. En odonyo i konven ki gen ni ebibedo core. Lacen, ki cwercwiny, en oa woko pi jami ma obedo ka neno timme kunnu. Medo i kom meno, en onongo pe ye pwony man ni mac me kapiny tye, pien en otamo ni uno dano i mac pe tye atir dok pe nyuto mar.

Lacen, Lacaden pa Jehovah onyuto bot Yeong Sug lok man ma tye i Baibulli: “Jo makwo gingeyo ni gibito, ento jo ma dong guto woko pe gingeyo gin mo, dok bene pe dong gitye ki bakacic ma gibilimo.” (Latitlok 9:5) Lacaden-ni okonye me niang ni kwarine pe gitye ka wang i mac me kapiny. Ma ka meno, gin gunino woko kun gikuro nicer.

Pien Yeong Sug onongo ngeyo ni jo mapol peya guwinyo lok ada ma i Baibul, en ojolo lok pa Yecu ma tye i Matayo 24:14: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” En dong kombeddi tito lok me kwena maber-ri dok nywako genne ma jenge i Baibulli ki jo mukene.

Baibul waco ni “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.” (Tic pa Lukwena 10:34, 35) Man miyo wan ducu wabedo ki gen ni Lubanga ngolo kop atir pien en “maro kit ma atir ki ngolo kop atir.”​—Jabuli 33:5.