Tika ilego nino ducu? Dano mapol gilego, kadi wa jo ma giwacci Lubanga pe. Ento pingo dano gilego? Ma lubbe ki kwed mo ma kitimo i lobo France, nucu pa anywaline gilego “wek giwiny maber.” Calo dano mapol ma i Ulaya, gin pe gilego me miyo woro bot Lubanga. Ki tungcel, luye mogo gilego bot Lubanga ka ce peko odiyogi, kun nongo gitye ka geno ni en bigamo legagi oyotoyot.​—Icaya 26:16.

In kono? Tika itamo ni lega obedo mere gin ma konyi wek wi opye mot? Ka iye ni Lubanga tye, tika dong ineno adwogi ma lega okelo i kwoni? Onyo mono itamo ni legani pol kare pe kigamo? Baibul twero konyi pe me neno lega calo gin ma weko iwinyo maber keken, ento macalo yo ma pire tek me nyiko cok bot Lubanga.