“Ngat ma pe twero timo kica bot jo mukene nongo tye calo iwacci oturo pem ma myero en oti kwede.” Lok magi pa lakwed lok me tekwaro, Edward Herbert ma okwo i kine ka mwaki 400 angec nyuto gin mumiyo omyero watim kica bot jo mukene: Pien wan bene myero wakwa kica ki bot jo mukene. (Matayo 7:12) Ento, tye tyen lok mo ma pire tek mumiyo omyero watim kica bot jo mukene. Nen kong lok pa lakwena Paulo i Jo Kolocai 3:13.​—Kwan.

Kit ma wan ducu lubalo-ni, i kine mukene wacwero cwiny jo mukene, dok gin bene gicwero cwinywa. (Jo Roma 3:23) Ngo ma waromo timone me gwoko kuc ki jo mukene? Pi teko pa Lubanga, Paulo ominiwa tam ni omyero wadi cwinywa i kom jo mukene ki bene watimigi kica. Tira meno pud konyowa i kareni kit ma onongo konyo kwede i kare ma kicoyo piny cokcok mwaki alip aryo angec. Kong dong wangiyu lok pa Paulo-ni.

“Wudi cwinywu kekenwu, ngat acel acel odi cwinye i kom lawote.” Buk mo acel owaco ni Lukricitayo ginyuto kit man ka ce “gitye atera me diyo cwinygi i kom jo mukene pi balgi nyo kitgi maraco.” Omyero wadiyu cwinywa i kom jo mukene kun bene gidiyo cwinygi i komwa. Man te lokke ni ka wiwa opo ni watye ki kit mogo ma pe yomo cwiny jo mukene, ci pe wabiye ni jami ma pe wamaro ma jo mukene gitimo obal kuc i kinwa. Ento ka jo mukene gutimo bal i komwa kono?

‘Wutim kica ki luwotwu i kinwu kekenwu pi balwu.’ Laco mo ma okwano matut owaco ni nyig lok me leb Grik ma gonye ni “wutim kica” “kitiyo kwede tutwalle me lok i kom timo kica ki cwinywa ducu.” Buk mukene wacci nyig lok man te lokke ni “yomo cwiny ngat moni, tero ngat moni i yo me kica nyo konyo ngat moni.” Omyero wabed atera me timo kica bot jo mukene ki cwinywa ducu kadi bed ni watye ki ‘lok mo i kom luwotwa.’ Ento pingo omyero wabed atera me timo man? Pien wan wamito ni gin bene gutimiwa kica.

“Macalo Rwot [Jehovah] bene ceng otimowu kica.” Tyen lok ma pire tek loyo mumiyo omyero watim kica bot jo mukene aye ni: Lubanga Jehovah timiwa kica. (Mika 7:18) Tam kong manok i kom cwiny me kica ma Lubanga nyuto bot lubalo ka gungut. Jehovah pat ki wan pien en pe timo bal. Kadi bed kumeno, en tye atera me timo kica ki cwinye ducu bot lubalo ka gungut kadi bed ni en pe mito ni gin bene gutim kica bote. Ada, Jehovah aye pud dong lanen maber loyo i timo kica bot lubalo ma gungut!

Cwiny me kica ma Jehovah nyuto nyikowa cok bote dok cuko cwinywa me lubo kite. (Jo Epeco 4:32–5:1) Ber ka wapenye kekenwa ni, ‘Kit macalo Jehovah timma kica ki cwinye ducu-ni, tika ada pore me kwero timo kica bot ngat mukene ma ongut i kom balle ma otimo i koma?’​—Luka 17:3, 4.