Baibul tye buk mo ma pud dong ngene loyo i lobo. Pingo? Niang iye yot pien loko i kom dano ma gukwo i kare ca ki kit ma onongo gikubbe kwede ki luwotgi medo ki Lubanga. Lok i kom jo magi tye ki pwony ma niang iye yot dok kitiyo ki lok ma kiromo gonyone i leb miya ki miya ma dano ducu gitwero niang i kabedo ki dong kare mo keken. Ki dong cik ma igi lac me Baibul gitiyo kare ducu.

Ma dong pire tek loyo aye ni Baibul pe loko i kom Lubanga keken ento bene oa ki bot Lubanga. Baibul bene nyuto nying Lubanga, kite, ki dong yubbe pi lobo ki dano. Baibul bene tito kit ma Catan opyem kwede i kom Lubanga pi kare malac. Ento pyem man bigik i yo maber kun Jehovah nyuto ka maleng ni Catan lagoba ki dok tyeko jo maraco woko. Kwano Baibul ki cwiny matir twero miyo wabedo ki niye kacel ki gen.

I Baibul, watwero nongo ngec ma pe nonge ka mo keken. Me labolle, Baibul tittiwa lok ada madok i kom jami mogo macalo magi:

• Kit ma wacako bedo kwo kwede ki dok gin mumiyo watye ka deno can

• Yub ma Lubanga oketo me laro dano

• Gin ma Yecu otimo piwa

• Gin ma bitimme i kom loboni kacel ki dano i kare me anyim

Pingo pe inen kong wiye wiye pwony ma gilubo man wek inge kwena ma tye i Baibul?