Lapeny me 2: Ngo ma Bitimme ka Ato?
ROMAN onongo pud latin awobi matidi i kare ma lawote oto i can me mutoka. En owaco ni “to pa lawota-ni obalo wiya adada, dok pi mwaki mapol i nge can man, abedo ka penye kekena ni ngo ma timme i komwa ka wato.”
Pingo wapenyo lapeny man?
To nen calo onongo myero obed pe. Dano ducu pe gimito to. Jo mapol gilworo gin ma timme i nge to.
Lagam ango ma dano gimiyo?
Jo mapol giye ni gin mo i komwa medde ki kwo i nge to. Giye ni jo ma kitgi atir gicito i polo, ki lubal kibipwodogi pi naka pi balgi. Jo mukene gitamo ni ka dano oto pe medde ki kwo dok motmot wi dano wil woko i komgi matwal.
Lagamgi-ni nyuto gin ango?
Lagam me acel-li cimo ni i nge to, ngat moni ada nongo peya oto. Lagam me aryo-ni nyuto ni tyen lok me kwo pe wacel. Jo ma gitamo ni tyen lok me kwo pe-ni pol kare gijalo kwogi kun giwacci: “Wacamu, wamatu, pien diki wabito woko.”—1 Jo Korint 15:32.
Baibul mono pwonyo gin ango?
Baibul pe pwonyo ni gin mo i komwa medde ki kwo i nge to. Lubanga oweko Kabaka Solomon ocoyo ni: “Jo makwo gingeyo ni gibito, ento jo ma dong guto woko pe gingeyo gin mo.” (Latitlok 9:5) Jo ma “pe gingeyo gin mo” nongo pe gitye ki ngec mo matwal i kom gin ma timme ka ma orumogi. Pe giromo tamo nyo timo gin mo. Pi man, jo muto pe giromo konyo nyo wano jo makwo.
To pe obedo yub pa Lubanga kit ma jo mapol gitamo kwede. En ocweyo dano mukwongo, Adam, me kwo pi naka i paradic i lobo kany. Lubanga oloko i kom to kicel keken i kare ma en otito pi pwod ma Adam binongone ka pe obedo lawiny. En ogengo Adam ni pe ocam nyig yat mo acel ma onongo tye i poto, dok owacce ni ka ocamo ci ‘bito.’ (Acakki 2:17) Ka Adam gin ki Kawa onongo gubed luwiny, ci gin kacel ki likwayogi ma lugen bot Lubanga-ni onongo gibikwo pi naka.
Adam okwero lubo cik pa Lubanga. Pi man, en oto pien otimo bal dok pe obedo lawiny bot Lubanga. (Jo Roma 6:23) Pe tye gin mo ki i kom Adam ma omedde ki kwo i kare ma en oto. Ma ka meno, Adam oto matwal. Lubanga owaco bot Adam ni: “Ibicamo kwon ki kwok ma cwer ki i tur nyimi, nio ka ibidok i ngom, kit ma con gikwanyi ki iye; in apwa, dok bene ibidok i apwa.” (Acakki 3:19) Walako bal kacel ki to ki bot Adam pien wan ducu likwayone.—Jo Roma 5:12.
Kadi bed Adam oyero gin marac, Lubanga pud bicobo Yubbe me pongo lobo ki likwayo pa Adam. (Acakki 1:28; Icaya 55:11) Cokcok-ki, Jehovah bicero jo mapol ma guto. Kun loko pi kare meno, lakwena Paulo owacci: “Atye ki gen ni dano gibicer woko, jo ma kitgi atir wa ki jo ma kitgi pe atir.”—Tic pa Lukwena 24:15.
Pi ngec mapol i kom to, nen dul me 6 i buk me Baibul Mono Ada Pwonyo Gin Ango? Tye ma iromo kwanyone ki i kabedowa me intanet i www.isa4310.com
