Nong Pwony Ki I Lok Pa Lubanga

Ngo ma Bitimme i Kom Dini?

Pwony man nyamo lapeny mogo ma gwok nyo ibedo ka tamogi dok nyutti ka ma itwero kwano iye lagamgi ki i Baibulli. Lucaden pa Jehovah cwinygi bibedo yom me nyamo lagam magi kwedi.

1. Tika dini ducu giber?

I kin jo ma ginonge i dul dini mapol ata-ni tye iye jo ma cwinygi tye atir ma gimito yomo cwiny Lubanga. En nenogi dok bene paro pigi. Tye me cwercwiny ni jo mogo gitiyo ki dini me timo jami maraco. I kare mukato angec, lutela dini mogo guuno lumonegi. (2 Jo Korint 4:3, 4; 11:13-15) I karewa-ni bene jo ma gipoko lok angeya giwaco ni lutela dini mogo gicwako tim aranyi ma kibolo i kom lwak, gicwako lweny, nyo ginywaro lutino.​—Kwan Matayo 24:3-5, 11, 12.

Baibul nyuto ni dini tye opokke i dul aryo—dini me ada ki dini me goba. Dini me goba pe tito lok ada madok i kom Lubanga. Ento kadi bed kumeno, Lubanga Jehovah gire mito ni dano gunge lok ada madok i kome.​—Kwan 1 Temceo 2:3-5.

2. Ngo ma bitimme i kom dini?

Lubanga pe mito ni jo ma gitimme ni gimaro en ento pe gitito lok ada i kome-ni, gubwol dano. Ki lok ada, lutek kom me dini magi gimaro mako lurem ki lobo ma Catan Larac aye loyo-ni. (Yakobo 4:4; 1 Jon 5:19) Baibul lwongo dul dini ma gimiyo cwakgi ducu bot gamente pa dano ma ka Lubanga-ni ni dako ma lakwele. Baibul lwongo dako ma lakwele-ni ki nying ni “Babilon Madit,” ma lubbe ki boma mo macon ka ma tim me dini goba ocakke iye i nge Pii Aluka. Cok dong, cokcok-ki Lubanga biweko ot oyo gik woko bot dini ma bwolo dano dok giketo can i kom dano.​—Kwan Niyabo 17:1, 2, 5, 17; 18:8, 23, 24.

  3. Lubanga mono bikelo yomcwiny i lobo nining?

Ngolo kop ma tye ka bino i kom dini goba-ni aye dong tye kwena maber atika. Dano ducu ma i wi lobo gibiwinyo agonya. Dini goba mo pe dok bibwolo nyo poko ki dano wacel. Dano ducu gibiribbe i woro Lubanga acel me ada.​—Kwan Icaya 11:9; Niyabo 18:20, 21; 21:3, 4.

4. Jo ma cwinygi atir myero gutim gin ango?

Jehovah wiye pe owil i kom jo ma cwinygi atir ma gitye i dini goba mapol ata i lobo-ni. En tye ka cokogi ducu kacel kun pwonyogi ki lok me ada.​—Kwan Mika 4:2, 5.

Jehovah jolo i dulle jo ducu ma gimito tic pire. Kadi bed luremwa ki wadiwa cwinygi wang i komwa ka wacako tic pi Jehovah, adwogi mabeco ma wanongo pol ma lapore pe. Wabedo ki wat maber ki Lubanga, “paco” manyen mupong ki mar, ki dong gen me nongo kwo ma pe tum.​—Kwan Marako 10:29, 30; 2 Jo Korint 6:17, 18.

Pi ngec mukene, nen dul me 15 ki 16 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.

[Ka ma cal oa ki iye i pot karatac 26]

The Complete Encyclopedia of Illustration /​J. G. Heck