Jo Mukene Giwacci Armagedon Obedo Gin Ango?

“Gucoko luker kacel i kabedo ma gilwongo i leb Ibru ni Armagedon.”​—NIYABO 16:16.

GIN ango ma bino i wi ka iwinyo pi nyig lok ni “Armagedon”? Ka pe gin mo, nen calo icako goyo cal peko mo malit adada ma poto atura. Kadi bed ni nyig lok man ni Armagedon-ni nonge i kabedo acel keken i Baibul, ento kare ki kare lupok ngec kacel ki lutela dini gibedo ka nwoyone teretere.

Tam ma dano gitye kwede i kom Armagedon-ni mono rwatte ki gin ma Baibul pwonyo? Pire tek ni omyero wange lagamme. Pingo? Pien lok ada i kom Armagedon miyo wabedo ki tekcwiny, gen pi anyim, dok gudo kit ma watamo kwede i kom Lubanga.

Nen kong lapeny adek ma gitye piny kany-nyi, ci iporgi ki tam ma dano gitye kwede i kom Armagedon ki dong gin ma Baibul ada pwonyo.

 1. ARMAGEDON MONO OBEDO PEKO MA DANO AYE BIKELONE?

Lupok lok angeya kacel ki lukwed lok gitiyo ki nyig lok man ni ‘Armagedon-ni’ me tito pi peko mo madit ma dano aye bikelone. Me labolle, Lweny me Wi Lobo me I ki II kilwongogi ni gubedo Armagedon. I nge lweny aryo magi, dano gubedo ki tam ni lobo Amerika kacel ki Soviet Union gubicako celle ki bombom me nuclear. Lucwal lok angeya gulwongo lweny man ma onongo myero otimme-ni ni “Armagedon me bombom me nuclear.” I kare-ni, lukwed lok ma gilworo ni wolo kabedo murumowa bikelo alokaloka madit i lobo giwaco ni man bikelo “Armagedon me oro ki cwir.”

Gin mumiyo gitamo kumeno: Dano gitye ki kero me doro kit ma lobo kacel ki kwo ma iye myero obed kwede i anyim. Ka gamente me lobo-ni pe gutimo gin mo, ci lobo biballe matwal.

Gin ma Baibul pwonyo: Lubanga pe biye ni dano gubal lobo. Baibul miniwa gen-ni Jehovah * pe oketo lobo ci “oweko woko kun onyobbe ata.” Ento, en oketo ni dano ‘gubed iye.’ (Icaya 45:18) Ma ka weko ni dano gubal lobo, Lubanga “[bi]nyoto jo a tye a nyoto lobo.”​—Niyabo 11:18, Baibul me leb Lango.

2. ARMAGEDON MONO OBEDO PEKO MA POTO ATURA?

Lucwal lok angeya i kine mogo gitiyo ki nyig lok ni “Armagedon” ka odok i pekki mogo madongo ma poto atura. Me labolle, i mwaka 2010, ripot mo acel oloko i kom “‘Armagedon’ i lobo Haiti.” Ripot-ti onongo tye ka lok i kom deno can, peko, ki dong to ma obino pi oyengyeng malit ma obalo lobo meno. Lumi ripot kacel ki jo ma giyubo vidio gitiyo ki nyig lok man i kom jami ma dong gutimme ento bene ma gilworo ni bitimme i anyim. Me labolle, gutiyo ki nyig lok ni Armagedon me nyuto adwogi marac ma gitamo ni jami ma poto ki i dan polo bikelone i lobo.

Gin mumiyo gitamo kumeno: Armagedon obedo peko ma poto atura dok neko dano ma balgi pe. Pe tye gin mo ma waromo timone macalo dano adana me gwokke ki iye.

Gin ma Baibul pwonyo: Armagedon pe obedo peko ma poto atura dok neko dano lumuku labongo pokone. Ma ka meno, i lweny me Armagedon, kibityeko lutim maraco keken. Baibul cikke ni cokcok-ki “dano marac dong bibedo pe matwal; kadi i ngi i kabedone maber, ibinongo ni en dong pe kunnu.”​—Jabuli 37:10.

3. LUBANGA TIKA BITYEKO LOBO I LWENY ME ARMAGEDON?

Jo mapol ma giwacci gibedo ludini gitamo ni lweny me agikki bibedo i kin jo mabeco ki maraco ma bio wa i tyeko lobowa. I kare ma dul mo me Princeton Survey Research Associates openyo dano mogo i lobo Amerika, dul man onongo ni pacen pa dano 40 giye ni lobo-ni kibityekone woko i “lweny me Armagedon.”

Gin mumiyo gitamo kumeno: Dano pe kicweyogi  me kwo i lobo pi naka, nyo ni lobo myero obed matwal. Lubanga ocweyo dano ki miti ni ka oo kare mo, ci dano ducu myero guto woko.

Gin ma Baibul pwonyo: Baibul waco atir ni Lubanga “[o]keto lobo ocung matek i kom gutine, ma pe biyenge wacel.” (Jabuli 104:5) Ka odok i kom dano, Baibul wacci: “Jo ma kitgi atir gibicamo lobo, dok gibibedo iye matwal.”​—Jabuli 37:29.

Ada, gin ma Baibul pwonyo pe rwatte ki tam ma dano gitye kwede ma lubbe ki Armagedon. Ci dong, lok ada i kom Armagedon tye ningo?

[Lok ma tye piny]