In Tika Itye Ka Weko Jehovah Bedo Dul Ma Kipoki?

“Wukwong keto cwinywu i kom kerre, ki nongo kit ma atir ma en tye kwede, ci jami magi ducu gibimedo botwu.”​—MAT. 6:33.

1, 2. (a) ‘Luicrael pa Lubanga’ ma kiloko i komgi i Jo Galatia 6:16 cung pi angagi? (b) I Matayo 19:28, ‘kaka apar wiye aryo me Icrael-li’ cung pi ngagi?

 NGO ma bino i wi ka ikwano nying ni Icrael i Baibul? Tika itamo i kom Yakobo wod pa Icaka, ma kiloko nyinge ni Icrael? Nyo itamo i kom likwayone, jo me lobo Icrael macon? Luicrael me cwiny kono? Ka kiloko i kom Icrael i yo me cwiny, pol kare nongo kiloko i kom ‘Luicrael pa Lubanga,’ jo 144,000, ma kiwirogi ki cwiny maleng me doko luloc ki lulamdog i polo. (Gal. 6:16; Yabo. 7:4; 21:12) Nen kong kit ma kiloko kwede i kom kaka 12 me Icrael i Matayo 19:28.

² Yecu owaco ni: “I kare ma Lubanga oketo lobo manyen, ka Wod pa dano bibedo i wi komkerre me deyo, wun jo ma dong wulubo kora bene wubibedo i wi komker apar wiye aryo, kun wungolo kop i kom kaka apar wiye aryo me Icrael.” I tyeng man, ‘kaka apar wiye aryo me Icrael-li’ aye jo ma lupwonnye pa Yecu ma kiwirogi-ni gibingolo kop i komgi dok gin gibinongo kwo ma pe tum i Paradic i lobo kany. Gin gibinongo mot ki i tic pa jo 144,000 macalo lulamdog.

3, 4. Lanen maber ango ma jo ma kiwirogi ginyuto?

 ³ Calo lulamdog ki Lulevi me kare ca, jo ma kiwirogi gineno tic ma gitiyo-ni macalo mot. (Wel 18:20) Jo ma kiwirogi-ni gingeyo ni pe kibimiyo botgi ngom mo me bedo meggi i lobo. Ma ka meno, gitye ka kuro me bedo luloc ki lulamdog i polo kacel ki Yecu Kricito. Jo ma kiwirogi gibimedde ki ticgi pi Jehovah kit ma kinyuto kwede i lok ma wakwano i Niyabo 4:10, 11 i kom jo ma kiwirogi ka dong gitye i polo.​—Ejek. 44:28.

⁴ Ka pud gitye i lobo, jo ma kiwirogi-ni gikwo i yo ma nyuto ni Jehovah aye dul ma kipokigi. Mot me tic pi Lubanga pire tek botgi adada. Gin giketo niyegi i kom ginkok dok gilubo kor Kricito kare ducu, ma weko ‘gimoko matek i lwongogi.’ (2 Pet. 1:10) Kit me kwogi kacel ki kerogi pe rom. Kadi bed kumeno, gin pe gitiyo ki gorogi me gengo ngegi wek giti tic manok i tic pa Lubanga. Ento, giketo tic pa Lubanga bedo mukwongo botgi, kun gitimo jami ducu ma twere. Dok ginyuto lanen maber bot jo ma gitye ki gen me kwo i paradic i lobo.

5. Lukricitayo ducu giromo weko Jehovah bedo dul ma kipokigi nining, dok pingo man romo bedo tek?

⁵ Kadi bed watye ki gen me cito i polo nyo kwo i lobo, omyero kong ‘wakwong kwerre kekenwa, ka wacak tingo yat pa Kricito, walub kwede kore.’ (Mat. 16:24) Dano milion mapol ma gitye ka kuro kwo i Paradic i lobo, gitye ka woro Lubanga kun gilubo kor Kricito kit meno. Pe giyeng ki timo tic manok keken ka guniang ni giromo timo makato meno. Dano mapol gudwoko rwom me kwogi piny ci gudoko painia. Jo mukene gitiyo calo painia pi dwe mapol mwaka ducu. Jo mukene kadi bed pe gitwero bedo painia, ento gitiyo ki kerogi ducu i tic me tito kwena. Jo ma kit meno gitye calo Maliam ma lagen, ma oonyo moo ma ngwece kur i wi Yecu. Yecu owacci: “En otiyo gin maber twatwal i koma. . . . En otiyo gin ma en twero.” (Mar. 14:6-8) Timo jami ducu ma watwero pe romo bedo yot, pien watye ka kwo i lobo ma Catan aye loyo. Ento, watute matek dok waketo genwa ducu i kom Jehovah. Nen kong kit ma waromo timone kwede i yo angwen mapat pat.

Keto pi Ker pa Lubanga Bedo Mukwongo

6. (a) Jo mapol ginyuto ni dul ma kipokigi tye i kwo me kare man nining? (b) Pingo ber me bedo ki cwiny ma Daudi obedo kwede-ni?

⁶ Yecu opwonyo lupwonnyene me keto cwinygi i kom Ker-ri mukwongo ki i kom kit ma atir pa Lubanga. Jo me lobo pol kare giketo cobo mitigi bedo mukwongo kit ma gubedo jo “ma dong gitye ki jami ducu ma igi mito i kwo man.” (Kwan Jabuli 17:1, 13-15.) Kit ma pe giparo pi Lacwecgi-ni, jo mapol giyelle me bedo ki kwo maber, nywalo lutino, ki dong weko ginaleya ka guto. Dul ma kipokigi tye i kwo man. Ento Daudi kitungcel onongo tye ki miti me “bedo ki nying maber” bot Jehovah, kit ma wode owacci wan ducu myero watim-mi. (Latit. 7:1.) Calo Acap, Daudi oneno ni bedo Larem Jehovah ber kato keto mitine me bedo mukwongo i kwone. Cwinye obedo yom me wot kacel ki Lubanga. Lukricitayo mapol i karewa-ni guketo tiyo tic me cwiny anyim makato dog ticgi.

7. Ominwa acel onongo mot ango pi keto pi Ker-ri bedo mukwongo?

⁷ Tam kong i kom Jean-Claude, ma bedo i lobo Central African Republic. En obedo laelda munyomme dok tye ki lutino adek. I lobo meno, nongo tic tek, dok pol pa dano gitimo gin mo keken me gwoko dog ticgi. I nino mo acel, ladit tic ma loyo Jean-Claude owacci en myero ocak tic i dyerwor cakke cawa 12:30 me otyeno, nino abiro i cabit acel. Jean-Claude otito bot laditte ni medo i kom miyo jami me kom bot jo me ode,  myero bene egwokgi i yo me cwiny. En bene owacci etye ki tic me konyo kacokke. Ladit ticce odok iye ningo? “Ka gum okayi me bedo ki dog tic, wi myero owil woko i kom jami mukene-ni ducu, kadi wa dakoni, lutinoni, ki dong pekkini. Omyero idyer kwoni ducu i ticci​—pe gin mo mapat ento ticci. Yer ma imito: dinini nyo dog ticci.” Ka in, onongo ibitimo gin ango? Wi Jean-Claude opo ni ka erwenyo dog ticce, ci Lubanga bigwokke. Pud ebibedo ki tic mapol me atiya i tic pa Lubanga, dok Jehovah bimiyo jami me kom ma mitte pi jo me ode. Pi meno, en ocito i cokke ma bedo i dye cabit. I ngeye, en oyubbe me cito i dog tic kun kalakala ka ebimedde ki tic. I cawa meno, kigoyo cim bote ni ladit ticce-ni kiryemo woko​—ento ominwa-ni pud tye ka medde ki ticce.

8, 9. Waromo lubo lanen pa lulamdog ki Lulevi kun waweko Jehovah bedo dul ma kipokiwa nining?

⁸ Jo mukene ma bene gwok nyo onongo gurwenyo dog ticgi guromo penye kekengi ni, ‘Abicobo ticca me miyo jami ma mitte pi jo me oda nining?’ (1 Tem. 5:8) Kadi bed ni gin ma cal ki man otimme i kwoni nyo pe, olo nongo gin mutimme i kwoni miyo itwero bedo labongo akalakala ni ginacama wang ma ononge ka Lubanga obedo dul ma kipoki, dok itero ticci bote calo gin ma pire tek. I kare ma Yecu owaco bot lupwonnyene ni ‘guket cwinygi i kom ker-ri,’ en ominigi gen ni: “Jami magi ducu”​—calo ginacama, amata, nyo aruka​—‘gibimedo botgi.’​—Mat. 6:33.

⁹ Tam kong i kom Lulevi, ma pe kiminigi dul lobo me bedo ginaleyagi. Kit ma woro me ada onongo pire tek botgi-ni, jenge i kom Jehovah pi nongo ginacama onongo mitte, en owaco botgi ni: “An en ame abedo dul ame meri.” (Wel 18:20 Baibul me leb Lango) Kadi bed pe watiyo i ot pa Jehovah calo lulamdog ki Lulevi, waromo lubo cwiny ma gubedo kwede, kun wageno ni Jehovah biminiwa jami ma wamito. Gen ma watye kwede ni Lubanga biminiwa jami ma mitte pire bedo tek medde ameda ka kare me agikki me lobo-ni woto ki nyiko cok.​—Yabo. 13:17.

Keto Kit ma Atir pa Lubanga Bedo Mukwongo

10, 11. Jo mukene guketo gengi i kom Jehovah nining i lok me dog tic? Mi lanen acel.

¹⁰ Yecu bene ocuko cwiny lupwonnyene me ‘kwongo keto cwinygi i kom kit ma atir pa Lubanga.’ (Mat. 6:33) Man te lokke ni omyero waket lubo cik ma Jehovah miyo i kom gin maber ki marac obed anyim makato gin mo keken i kwowa. (Kwan Icaya 55:8, 9.) Wi po ni i kare mukato angec, jo mapol onongo gipuro nyo gicato taa, gipwonyo dano ki diro me lweny, nyo giyubo dok gicato jami lweny. I kare ma gupwonyo lok me ada, polgi guloko ticgi ci gubedo ma gupore pi batija. (Ic. 2:4; 2 Kor. 7:1; Gal. 5:14)

¹¹ Andrew tye lanen acel. I kare ma en ki dakone gupwonyo lok kom Jehovah, gumoko tamgi me tic pire. Andrew onongo tye ki awaka madit pi ticce ento oweko woko. Pingo? Pien en onongo tye lamony ento en omoko tamme me keto kit ma atir pa Lubanga bedo mukwongo. I kare ma Andrew oweko dog tic meno, en onongo tye ki lutino aryo, dok centene onongo romo tere dwe mogo manok keken. I kit me neno pa dano, onongo oromo nen ni en pe ki ‘ginaleya.’ En oyenyo tic, kun geno Lubanga. En ki jo me ode ka guneno jami mutimme i kwogi nio kombeddi, dong giromo mokone ni bad Jehovah pe cek. (Ic. 59:1) Andrew gin ki dakone gubedo ki mot me tiyo ticwa me pwony pi  kare malac pien gudwoko rwom me kwogi piny. En owacci: “Tye kare mogo ma onongo lok me cente, ot, yotkom, ki tiyo weko wabedo ki par, Jehovah kare ducu onongo tye kwedwa. . . . Watwero waco labongo akalakala mo ni tic pi Jehovah aye tic mupore ma dano giromo timone dok keligi adwogi maber.” *​—Latit. 12:13.

12. Ngo ma mitte me keto cik pa Lubanga bedo mukwongo? Mi lapor acel mutimme i kabedowu.

¹² Yecu owaco bot lupwonnyene ni: “Ka ce niyewu obedo calo nyig kodi karadali, ci wubiwaco ki got man ni, Dirre i kabedo ma tye loka ca, kit meno bidirre; ci gin mo pe biloyowu.” (Mat. 17:20) Tika ibiketo cik pa Lubanga bedo mukwongo ka timo meno bimini kwo matek. Ka itye ki akalakala ni pe itwero timone, ci lok bot jo mukene ma i kacokke. Ibinongo ni winyo jami mutimme i kwogi bimiyo iwinyo agonya i yo me cwiny.

Nyuto Pwoc pi Jami me Cwiny ma Jehovah Miyo

13. Ka waketo tek i tic pa Jehovah, gen ango ma myero wabed kwede ma lubbe ki jami me cwiny?

¹³ Ka itero ticci pi Jehovah calo gin ma pire tek, ci itwero bedo labongo akalakala ni en bimiyi jami me kom ki me cwiny, kit ma en omiyo kwede ginacama bot Lulevi-ni. Tam kong i kom Daudi. Kadi bed ni en onongo tye i boro, en obedo ki gen ni Lubanga bimiye jami ma mitte. Wan bene waromo jenge i kom Jehovah kadi bed waneno ni yo ducu olorre woko. Wi myero opo ni i kare ma Acap ‘ocito i ot maleng pa Lubanga,’ en oniang ka ma pekone onongo tye iye. (Jab. 73:17) I yo acel-lu, mitte ni omyero wacit i Wang It me camwa me cwiny. Ka watimo meno, ci wanyuto pwoc pi mot ma watye kwede me tic pi Lubanga kadi bed kwo tek nyo yot. Meno nyuto ni watye ka weko Jehovah bedo dul ma kipokiwa.

14, 15. Ngo ma myero watim ka dero omenyo Ginacoya mogo kun medo niango i komgi, dok pingo?

¹⁴ Ibitimo ngo ka Jehovah, Wang It me dero me cwiny, ominiwa niango i kom ‘lok ma Lubanga okano ka matut’ ma tye i Baibul? (1 Kor. 2:10-13) Watye ki lanen maber i gin ma lakwena Petero owaco i kare ma Yecu owaco bot luwiny En ni: “Ka pe wucamo kom Wod pa dano, wumato remone, pe wutye ki kwo i iwu.” Lupwonnyene mapol ma pe guniang lok man maber, guwacci: “Man lok matek; anga ma twero winyo?” Gin ‘gudok cen i jami ma guweko angec.’ Ento Petero owacci: “Rwot, wabicito bot anga? In itye ki lok me kwo ma pe tum.”​—Jon 6:53, 60, 66, 68.

¹⁵ Petero pe oniang Lok ma Yecu owaco i kom camo Kome ki mato Remone-ni maber. Ento Petero ogeno Lubanga i lok me miyo dero i yo me cwiny. Ka dero me cwiny omenyo lok mo kun medo niango i kome, tika itemo niang tyen lok ma omiyo Ginacoya moni-ni okelo alokaloka me niango i lok meno? (Car. 4:18) Jo me Berea ma gukwo i cencwari me acel, gujolo lok ma “gitito botgi ki cinggi aryo, kun gingiyo ginacoya ma yam gicoyo nino ducu.” (Tic. 17:11) Lubo lanengi-ni bidongo pwocci pi tic ma itiyo pi Jehovah, me weko en bedo dul ma kipoki.

Nyomme i Kin Jo pa Rwot Keken

16. Waromo weko Lubanga bedo dul ma kipokiwa nining ma lubbe ki cik ma tye i 1 Jo Korint 7:39?

¹⁶ Kabedo mukene ma Lukricitayo myero guwek yub pa Lubanga obed i wigi aye me keto i tic cik ma Baibul miyo me nyomme “i kin jo pa Rwot keken.” (1 Kor. 7:39) Jo mapol guyero me bedo labongo nyomme ma ka turo tira man ma Lubanga omiyo-ni. Lubanga jolo jo ma kit meno. Ngo ma Daudi otimo i kare ma owinyo ni etye ka kwo kic kic dok ngat mo ma myero okonye pe? En owaco ni: “Akelo lok me kokona ducu i nyime  dok atitte bene kit can ducu ma atye ka nongone. Ka cwinya dong ool woko.” (Jab. 142:1-3) Lanebi Jeremia, ma obedo lagen i tic pi Lubanga pi mwaki pyere ki wiye labongo nyommi, nen calo owinyo kit meno bene. Iromo kwano lanene man i dul me 8 i buk me God’s Word for Us Through Jeremiah.

17. Lamego mo acel ma peya onyomme olwenyo ki peko me bedo kic kic nining?

¹⁷ Lamego mo i lobo Amerika owaco ni: “Amoko tamma me nyomme. Atye atera me nyomme ka anongo laco mupore pira. Mamana ma pe tye ngat muye-ni otemo bita ni anyom laco mo keken ma mito nyoma. Apenye ka en biye cung pi bal ducu ma bibino ka ce nyoma oballe. I nge kare manok, en oneno ni atye ki tic ma kela cente, agwokke kekena, dok bene cwinya yom. Ci ogiko keto lyeto i koma.” Lamego-ni i cawa mukene winyo ni etye kic kic. En owaco ni: “Atute me keto genna i kom Jehovah. En pe weka ata.” Ngo ma okonye me geno Jehovah? “Lega okonya me niang ni Lubanga kara tye ada dok pe atye kena. Ngat Mamalo Twal ma loyo polo ki lobo-ni nongo tye ka winya, ci ngo ma genga winyo yomcwiny?” Pi geno ni “miyo mot kelo gum [yomcwiny] makato gamo agama,” en owacci: “Atemme me konyo jo mukene, labongo paro ni kibiculo wange. Ka atye ka tam ni, ‘Ngo ma aromo timone me konyo ngat eni?’ Anongo ni cwinya yom.” (Tic. 20:35) Ada, en oketo Jehovah macalo dul ma kipoke, dok en tye ka nongo yomcwiny pi mot me tic pi Lubanga.

18. I yo ango ma Jehovah romo weko ibedo dul ma kipoke?

¹⁸ Kadi bed itye i kit kwo ango, pud iromo weko Lubanga bedo dul ma kipoki. Ka itimo meno, ci kibikwani i kin jone ma cwinygi yom. (2 Kor. 6:16, 17) Meno biweko ibedo dul ma kipoko bot Jehovah, kit ma otimme kwede i kom jo mukene i kare mukato angec. (Kwan Nwoyo Cik 32:9, 10.) Kit macalo Luicrael gudoko dul ma kipoko bot Lubanga ki i kin rok mapol-li, en bene romo weko idoko dul ma kipoke dok gwoki.​—Jab. 17:8.

[Lok ma tye piny]

In Iromo Gamone Ningo?

In iromo weko Jehovah bedo dul ma meri nining

• ka i keto pi Ker pa Lubanga ki nongo kit ma atir ma en tye kwede bedo mukwongo?

• ka inyutu pwoc pi cam me cwiny?

• ka ilubo cik ma Lubanga omiyo me nyomme i kin jo pa Rwot keken?

[Peny me Kwan]

[Boro buk i pot karatac 16]

Jehovah bedo dul ma kipokiwa ka waketo ticce bedo gin ma pire tek botwa

[Cal ma tye i pot karatac 18]

Lanen pa Jeremia cuko cwinywa adada