Lapeny Pa Lukwan Bukkewa . . .

Kwo ma Pe Tum i Paradic Mono Biolo Dano?

▪ Baibul miniwa gen ni waromo kwo pi naka i Paradic i lobo. (Jabuli 37:29; Luka 23:43) Kwo pi naka i kabedo mamwonya mono biolowa?

Meno lapeny ma pire tek. Jo ma kwedo lok gunongo ni bedo ma nongo ipe ki tic me atima cawa weng romo miyo ngat moni bedo ki par, cwinye tur, dok poto i peko. Jo ma gineno kwo calo konye pe nyo giol woko ki ticgi me nino ducu gibedo labongo tic. Mono kwo pa dano i Paradic konye bibedo pe? Tic me nino ducu mono biologi?

Mukwongo, nge ni Lubanga Jehovah, ma Ocoyo Baibul-li aye miniwa kwo ma pe tum. (Jon 3:16; 2 Temceo 3:16) Kit pa Lubanga ma pire tek aye mar. (1 Jon 4:8) Jehovah marowa adada dok en ominiwa jami mabeco ducu ma watiyo kwedgi i kareni.​—Yakobo 1:17.

Lacwecwa ngeyo ni wek wabed ma cwinywa yom, mitte ni wati tic ma kore nen. (Jabuli 139:14-16; Latitlok 3:12) I Paradic, lutic pe gibitamo ni gitye calo robot ma konygi pe. Ticgi bikeligi adwogi maber wa bot jo ma gimaro bene. (Icaya 65:22-24) Kwo mono twero oli ka itye ki tic maber dok ma itiyo kare ki kare?

Omyero bene inge ni Lubanga Jehovah biyero jo ma myero gukwo i Paradic. En bimiyo mic me kwo ma pe tum-mi bot jo ma gilubo lanen pa Wode, Yecu. (Jon 17:3) I kare ma Yecu tye i lobo, cwinye obedo yom me tiyo miti pa Wonne. En opwonyo lulub kore i lokke ki dong lanenne, ni yomcwiny marii bino ka wamiyo jami ma ka gamone agama. (Tic pa Lukwena 20:35) I Paradic, dano ducu gibikwo kun gilubo cik aryo ma pigi tego​—mar pi Lubanga ki dong luwotwa. (Matayo 22:36-40) Go kong ni itye ka kwo ki jo ma kitgi beco ma gimari dok gimaro ticgi! Itamo ni ibiol ka i kwo kacel ki jo ma kit meno?

Ngo mukene ma kwo i Paradic bikwako? Nino ducu wabibedo ki kare me pwonyo gin mo manyen ma dok i kom Lacwecwa. Jo ma kwedo lok gunongo jami me aura mapol ma dok i kom cwec pa Jehovah. (Jo Roma 1:20) Nio wa tin, pud watye ki ngec manok adada i kom cwec pa Jehovah. Mwaki alip mapol mukato angec, Yubu ma obedo laco ma lagen-ni, otamo i kom ngec ma etye kwede ma lubbe ki cwec pa Lubanga, dok lok ma en owaco pud tye ada. Yubu owaco ni “Nen, man pud doge, pe kom ticce kikome, wawinyo macalo lok ma gikwilo akwila ma winyone tek, ento anga ma niang i kom twerone ka mor calo mor kot?”​—Yubu 26:14.

Kadi bed wakwo pi naka, pe wabingeyo jami ducu ma myero wange i kom Lubanga Jehovah kacel ki ticce. Baibul waco ni Lubanga oketo i cwinywa miti me kwo pi naka. Ento bene wacci pe watwero “ngeyo gin ma Lubanga otiyo nia i acakki nio i agikki.” (Latitlok 3:10, 11) Itamo ni ibiol ki pwonyo jami manyen ma dok i kom Lacwecci?

Kadi wa kombeddi, jo ma gitye ka tic matek me kelo adwogi maber bot jo mukene ki dong keto deyo i kom Lubanga pe ginongo ni giol ki ticgi. Wageno ni ka wamedde kun watiyo matek i tic acel-lu, pe wabinongo ni waol​—kadi bed wakwo pi naka.

[Ka ma cal oa ki iye i pot karatac 14]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/NASA)