Angagi ma Gitye ka Tito Kwena Maber-ri?

“ . . . gibitito i wi lobo ducu.”​—MATAYO 24:14.

LUCADEN PA JEHOVAH gitye ka tito kwena maber-ri i twok lobo ducu. Gitye ka timo man i yo mapol mapat pat. Yo acel i kingi aye . . .

Lok ma Kiloko. Calo Yecu ki lupwonnyene, Lucaden pa Jehovah gitero kwena maber-ri bot dano. (Luka 8:1; 10:1) Gin pe gikuro ni dano aye obin botgi. Miyo caden bot dano i kom Ker pa Lubanga obedo gin ma Lucaden ducu—ma welgi romo milion abiro kulu-ni—ginywako iye. Gipwonyo i ot ki ot, i teng gudo, ki cim, ki dong yo mukene. I mwaka mukato-ni, Lucaden magi gucwalo cawa makato bilion acel ki nucu kulu i tic man.

Pe gipwonyo dano lok kom Ker pa Lubanga keken, ento bene ‘gin ducu ma Yecu ociko.’ (Matayo 28:20) Kare ki kare gikwano Baibul ki dano makato milion aboro ki i pacigi labongo kit cul mo.

Lucaden magi gitye ka tito kwena i twok lobo ducu—i lobe ma romo 236. Gitito lok me kwena bot dano ducu ma gia ki i kabedo mapat pat. Gitito lok me kwena i caro ki i boma madongo, i bunga me Amazon ki Siberian taiga, i aro me Afrika kacel ki godi me Himalaya. Pe kiculogi pi tic man; gin gitiyo ki cente kacel ki cawa ma megi kun mar pi Lubanga ki pi jirani aye miyo gitimo man. Yo me aryo ma gitito kwede pi kwena maber-ri aye . . .

Jami ma Kicoyogi. Magajin man ma kilwongo ni Wi Lubele Tito pi Ker pa Jehovah, dong kitye ka goyone i leb ma romo 185 dok kitye ka cwalo woko kopi ma wele romo milion 42 pi magajin acel acel. Awake! ma bene tito pi Ker-ri, kitye ka goyone i leb ma romo 83 dok kitye ka cwalone woko i wel makato milion 40 kulu pi magajin acel acel.

Bukke, brocuwa, trak, CD/MP3 ki DVD ma gitito pwony me Baibul gitye nonge i leb makato 540 kulu. Lucaden guyubo dok gupoko jami magi i wel makato bilion 20 kulu i mwaka apar mukato angec, ma te lokke ni ngat acel acel ma kwo onongo twero nongo gin adek adek kulu!

Lucaden pa Jehovah bene gugoyo Baibul i leb mapol mapat pat. New World Translation of the Holy Scriptures ma Lucaden gugonyo, gugoyo ducu nyo i bute keken, ka dok gupoko dong tye nonge i leb 96. Kopi makato milion 166 dong kityeko pokone. Yo me adek ma Lucaden ginywako kwede ki kwena me Ker-ri aye . . .

I Cokke pa Lukricitayo. Cokke ma timme i Ot me Ker cabit ki cabit-ti pe obedo tic mamua me dini, ento kiyubogi me pwony. Kimiyo  pwony ma lokke nongo a ki i Baibul, dok bene kikwano Baibul kun kitiyo ki magajin me Wi Lubele ki bukke mukene. I cokke magi, Lucaden bene gipwonyo kit me bedo jo mucwiny i tito kwena maber-ri.

Lucaden gikwano en pwony acel-li i kacokke 107,000 i twok lobo ducu, man miyo ginote kacel. Cokke man tye pi ngat mo keken. Tye labongo cul mo. Ada, jami magi ducu konygi bedo pe ka Lucaden pe gilubo pwonyogi-ni. Yo me angwen ma gitito kwede pi kwena maber-ri aye . . .

Lanen ma Megi. Gitute me bedo lanen maber i kit ma Lukricitayo myero gukwo kwede, gitemme ki tekgi me tero jo mukene kit ma gimito ni kitergi kwede. (Matayo 7:12) Kadi bed ni gitye ki roc dok i cawa mogo gibalo, gin gitero dano i yo me mar ki cwinygi ducu kun pe ginywako kwedgi kwena maber-ri keken, ento gikonyo bene i yo mapol mapat pat kit ma gitwero.

Lucaden pa Jehovah pe gitye ka temme me loko dano ki tito kwenagi-ni. Ento, ka kityeko tic meno i yo ma Jehovah nongo ni dong oromo, ci agikki piny dong bibino kit ma Yecu owaco kwede. Man twero kelo adwogi ango pi lobo ki pi dano ma gikwo iye?

[Cal ma tye i pot karatac 7]

Kwena maber-ri Lucaden pa Jehovah gitye ka titone i twok lobo ducu