“[Jehovah], imito akok boti pi kare ma rom mene pi kony, ka wek iwiny kokona? Dok kadi akok boti pi tim bwami, in pe ilarowa.” (Kabakuk 1:2, 3) Meno obedo lok pa Kabakuk, laco ma kite ber dok onongo tye ki cwak pa Lubanga. Tika lokke meno onongo nyuto ni en tye ki niye manok? Pe kumeno! Lubanga ocuko cwiny Kabakuk ni en Eciko kare me giko peko.​—Kabakuk 2:2, 3.

Ka in nyo ngat mo ma cok kwedi tye ka deno can, yot adada me tamo ni Lubanga tye ka galle, dok ni en onongo myero okel agikki wacon. Ento Baibul cuko cwinywa ni: “[Jehovah] pe galle agala ki cobo cikkene kit macalo jo mogo gitamo kwede, ento en pud tye ka diyo cwinye i komwu, pien en pe mito ni ngat mo orweny woko matwal, ento mito ni jo ducu guo i ningut.”​—2 Petero 3:9.

Karene dong pe bor! Yecu otito ni tye yalwak mo ma obineno jami ma kitgi dok pat ma obinyuto kare me “agikki piny.” (Matayo 24:3-42) Cobbe pa lok pa Yecu i karewa-ni nyuto ni Lubanga dong cok cobo pekki pa dano. a

Ento Lubanga bikwanyo pekki awene? I kare ma Yecu nongo tye i wi lobo, en onyuto teko pa Lubanga me kwanyo pekki ducu. Kong wane labol mogo.

Can ma Poto Atura: I kare ma Yecu ki lukwenane onongo gitye i yeya i Nam me Galilaya, yamo magwar ocako twago pii ma oweko yeyagi onongo mito mwony woko. Ento Yecu onyuto ni en kacel ki Wonne gitye ki teko i kom cwec. (Jo Kolocai 1:15, 16) Yecu owaco mere ni: “Ling, pye mot.” Adwogine obedo ningo? “Yamo ocako kwe, nam oling mot.”​—Marako 4:35-39.

Two: Yecu onongo ngene matek pi tekone me cango lutwo calo lutowang, lungolo, jo ma tye ki two alili, dobo ki kwai two ducu. En “ocango jo ducu ma onongo komgi lit.”​—Matayo 4:23, 24; 8:16; 11:2-5.

Kec: Yecu otiyo ki teko ma Wonne omine me nyayo dek manok wek odok madwong. Baibul nyuto ni, Yecu opito dano alip mapol kiryo kulu i kare ma tye i ticce me pwony.​—Matayo 14:14-21; 15:32-38.

To: Kit ma kicoyo kwede i Baibul, cer adek ma Yecu otimo-ni onyuto ka maleng ni Jehovah tye ki teko me cero jo muto. Ngat acel i kin jo ma Yecu ocerogi onongo dong oto orii nino angwen kulu.​—Marako 5:35-42; Luka 7:11-16; Jon 11:3-44.