Ka imito ngeyo ngat mo maber, twero bedo me kony ka ingeyo bene jami ma en otimogi con ki ariya ma en owok ki iye. I yo acel-lu ka imito ngeyo Lubanga maber, mitte ni ipwony jami ma en otimo. Ka itimo meno, ci ibibedo ki ur me ngeyo jami mapol ma en otimogi ki ma tye ka konyowa i kare-ni ma bene gudo wa kwowa me anyim.

Lubanga Jehovah obedo Lacwec Madit, dok kite “ma onongo pe nen dong onen, kun gingeye i jami ducu ma en otiyo.” (Jo Roma 1:20) ‘Rwot [Jehovah] oketo lobo ki twerone, dok ocibo lobo ocung matek pi ryekone, ki pi niang matut ma en tye kwede omiyo oyaro polo woko.’ (Jeremia 10:12) Jami me aura kacel ki deyo ma tye i kom cwec pa Lubanga nyuto mitine i komwa.

Tam kong kit ma kwowa tye maber kwede pien Jehovah ocweyowa “i kit calle kikome.” (Acakki 1:27) Kadi bed ni rwom pa Lubanga tye lamal katowa i yo ducu, en pud ominiwa kero me poro kite i kwowa. En ominiwa kero me niang jami me cwiny, ma obedo kero me niang tamme kacel ki berre piwa. Ka watute me kwo ma lube ki tam pa Lubanga, ci wabedo ki tyen lok me kwo kacel ki yomcwiny. Ma dong ber loyo, en ominiwa kero me dongo wat macok kwede.

Ka waneno kit ma Lubanga ocweyo ki lobo, man miniwa caden ni en paro piwa. Ma lubbe ki lok pa lakwena Paulo, ‘kare ducu Lubanga obedo ki cadenne ma nyuto ni en tye. En otimowu ber kun cwalo botwu kot mucwer ki i polo, dok miyowu kit cam mapatpat macek ka karegi oromo ma miyo wuyeng ki cam, cwinywu bene bedo yom.’ (Tic pa Lukwena 14:17) Lubanga ominiwa jami mabeco madwong ma kato jami ma mitte me kwo keken. En ominiwa madwong dok jami ma kitgi patpat wek wanong yomcwiny i kwo. Jami magi ducu pud  gubedo abil keken pa jami ma en onongo oyubo piwa.

Jehovah ocweyo lobo wek dano gubed bed iye matwal. Baibul wacciwa ni Lubanga: “Omiyo lobo bot dano,” dok “en yam pe oketo lobo ci oweko woko kun onyobbe atata, en oketo ni dano twero bedo iye.” (Jabuli 115:16; Icaya 45:18) Omiyo ni angagi ma gubed iye dok pi kare ma rom mene? “Jo ma kitgi atir gibicamo lobo, dok gibibedo iye matwal.”—Jabuli 37:29.

Jehovah ocweyo laco ki dako mukwongo, Adam gin ki Kawa, ci oketogi i paradic i lobo kany ‘wek gupur, dok gugwok bene.” (Acakki 2:8, 15) Lubanga ominigi tic aryo ma pire tek dok me yomcwiny: “Wunywal, wunya, wupong lobo, wulo bene.” (Acakki 1:28) Pi meno Adam ki Kawa onongo gitye ki gen me kwo i lobo pi naka. Ki cwercwiny madit, guyero me kwero winyo lok pa Lubanga, pi meno gurwenyo gen me bedo i kin “jo ma kitgi atir” ma “gibicamo lobo.” Kit ma wabineno kwede, timgi-ni pe oloko yub pa Lubanga piwa nyo pi lobo. Me acel, kong waneno gin mukene ma Lubanga otimo.

Baibul bene ki kilwongo ni Lok pa Lubanga. Pingo Jehovah ominiwa Baibul? Mukwongo wek wapwony lok i kome maber. (Carolok 2:1-5) Tye lok ada ni, Baibul pe miyo lagam pi lapeny mogo ma watye kwede i kom Lubanga—dok pe tye buk mo keken ma twero. (Latitlok 3:11) Kadi bed kit meno jami ducu ma tye i Baibul konyowa me ngeyo Lubanga. Kit ma en tero ki dano nyutiwa anga ma en obedo. Wapwonyo bene pingo en maro nyo dag ngat moni. (Jabuli 15:1-5) Wapwonyo kit ma en neno kwede yo me wore, tim me tarwang, ki dong jami me kom. Baibul nyutiwa kit Jehovah ki kome kun wok ki i lok kacel ki tic pa Wode, Yecu Kricito.—Jon 14:9.

Gin mukene ma oweko Jehovah ominiwa Lokke aye, wek wange tyen lok me kwo dok wabed ki yomcwiny. Jehovah tiyo ki Baibul me tittiwa kit me bedo ki yomcwiny i odiwa, yeng ki jami me kom kacel ki kit ma watwero kanyo kwede ki pekki. Lacen i magajin man, wabineno lagam pi lapeny ma pigi tego i kwo kun watiyo ki Baibul, lapeny calo: Pingo pekki tye mapol i kare-ni? Ngo ma bitimme i anyim? Tittiwa bene gin ma Lubanga otimo me neno ni yubbe mukwongo ocobbe.

Pe tye buk mo mukene calo Baibul—pien Lubanga aye ma oweko ki coyo—tye jami mapol ma nyuto meno. Otero kare ma romo mwaki 1,600 ki co 40 me coyone, kadi bed kit meno, tye ki wi lok acel ma pire tek pien o a ki bot Lubanga. (2 Temceo 3:16) Pe tye coc mo keken ma ka kiporo maconne ki me kare-ni ma girwatte kakare calo coc mapol me Baibul. Mukene ma pire tek bene aye, Baibul obwot ki i cing jo mogo ma gutemme wek pe kigony, kipok, dok kikwan. Kadi bed kit meno en aye odoko buk madwong loyo ma ki tye ka pokone ki goyone i kare-ni. Bedo tye pa Baibul moko ni “lok pa Lubanga bedo matwal.”—Icaya 40:8.  

Gin mukene ma Lubanga otyeko cobone obedo mic ma moko ni yubbe ducu piwa bicobbe. Kit ma kitito kwede con, Lubanga onongo oyubo ni wakwo pi naka i lobo kany. I kare ma Adam okwero winyo lok pa Lubanga en otimo bal, ci orwenyo mot me kwo pi naka, pe pi en keken ento wa pi lutino ma onongo en binywalogi. “Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.” (Jo Roma 5:12) Bedo labongo winy ki bal pa Adam oweko onongo nen ki botwa calo yub pa Lubanga pe bicobbe. Jehovah odok i balgi meno nining?

Jehovah odok iye ma lubbe ki kite. En oweko Adam ki Kawa guculo pi balgi, dok oketo yub ma nyuto marre pi likwayogi. Jehovah otiyo ki ryekone me cobo jemo meno, dok cutcut en otito kit ma ebicobo kwede. (Acakki 3:15) Lubanga onongo  bitic ki Wode Yecu Kricito me kwanyo bal ki to. Meno onongo bikwako gin ango?

Me koko dano ki i adwogi me bal pa Adam, Jehovah ocwalo Yecu i lobo wek opwony dano yo ma cito i kwo ki dok me “miyo kwone me koko jo mapol.” a (Matayo 20:28; Jon 14:6) Yecu onongo twero miyo kwone macalo ginkok pien ma calo onongo Adam pe ki roc, en bene pe ki roc. Ento ka iporo ki Adam, Yecu obedo lawiny nio wa i tone. Kit macalo onongo pe opore ni Yecu oto-ni, Jehovah ocere me dok cen ka kwo i polo. I nge cere, Yecu onongo dong twero timo gin ma Adam pe otimo—miyo kwo ma pe tum bot jo ma luwiny. “Pien macalo pi dano acel ma pe obedo ki winy omiyo dano mapol ata gudoko lubalo, kit meno bene pi winy pa dano acel jo mapol ata gibikwanogi ni kitgi atir.” (Jo Roma 5:19) Pi ginkok pa Yecu, Lubanga bicobo yubbe kacel ki cikkene wek dano gukwo pi naka i lobo kany.

Wapwonyo jami mapol i kom kit ma Jehovah otero kwede adwogi maraco ma jemo pa Adam okelo. Man nyutiwa ni pe tye gin mo keken ma gengo Jehovah ki tyeko yubbe ma ocako; lokke ‘bitiyo gin ma en mito ni oti.’ (Icaya 55:11) Wapwonyo bene ni Jehovah tye ki mar madit piwa. “Gin ma yam onyuto marre botwa en ene, Lubanga ocwalo Wode acel keken i lobo wek omi wabed kwo pire. Man en aye mar, pe ni wan wamaro Lubanga, ento en aye omarowa, ci ocwalo Wode me bedo gin me kwanyo bal woko ki i komwa.”—1 Jon 4:9, 10.

Lubanga “yam pe oweko Wode kikome, ento omiye pi wan ducu,” pi meno oweko watye ki gen ni en “bimiyowa jami ducu” ma en ociko. (Jo Roma 8:32) Gin ango ma Lubanga ociko ni ebitimone piwa? Medde ki kwan.