Lubanga ocikke bot lanebi Abraim ni lakware mo acel bikelo mot bot “rok ducu ma i lobo.” (Acakki 22:18) Anga ma lakwaro man onongo bibedo?

Cokcok mwaki 2,000 angec, Lubanga omiyo bot Yecu, ma obedo lakwar Abraim, teko me timo tango. Tango magi onyuto ni cikke ma Lubanga omiyo ki Abraim ducu bicobbe pi Yecu.​—Jo Galatia 3:14.

Tango ma Yecu otimo okonyo dano me niang ni en aye obedo ngat ma Lubanga bitic kwede me kelo mot bot dano, dok gunyutu kit ma Lubanga bigoyo kwede laane i kom dano pi naka. Nen kong kit ma tango mogo ma Yecu otimo onyutu kwede kite.

Kica​—Yecu ocango lutwo.

I kare mo, ladobo mo olego Yecu ni ocange. Yecu oryeyo cinge ogudo kome kun wacce ni, “Amito!” Cutcut, dobone ocang woko.​—Marako 1:40-42.

Yot cing​—Yecu opito jo ma kec nekogi.

Yecu onongo pe mito ni dano gucit ki kec. Tyen aryo mapatpat, en opito dano alip mapol i yo me tango kun nyayo mugati ki rec mo manok. (Matayo 14:17-21; 15:32-38) I nge cam, onongo gin ducu guyeng dok cam odong madwong ata.

Paro pi dano​—Yecu ocero jo muto.

Yecu ocero wod pa dato mo ma onongo dong pe tye ki ngat mo keken ma bigwoke pien “kica omake i kome.”​—Luka 7:12-15.