CIK ma kimiyo bot Moses onongo ye ni i kine mukene, ngat moni twero kwonge, me labolle en twero wacone ni, “Akwonge boti i nying Lubanga,” nyo ni “Akwonge pi gin man i nying Jehovah.” Ento i kare ma Yecu tye i lobo, dano onongo gimaro kwongo kwong adada dok Lujudaya onongo gikwonge pi gin mo keken ma giwaco. Onongo gitimo man wek dano guye lokgi, ento Yecu okwero tim meno tyen aryo kulu. En owaccigi ni: ‘Wuwek lokwu ni Iyo obed ni iyo nyo Pe obed ni pe.’​—Matayo 5:33-37; 23:16-22.

Ma lubbe ki Theological Dictionary of the New Testament, Talmud konyowa me niang ni onongo obedo kit pa Lujudaya me kwonge ni lokgi tye ada. Pien Talmud tito ka maleng cikke mene ma opore ni kigwok ki mene ma kiromo turone.

Pe Yecu kene aye ma okwero tim meno. Me labolle, laco mo ma coyo coc me tekwaro pa Lujudaya ma nyinge Flavius Josephus ocoyo lok i kom gurup pa Lujudaya mogo ma bene gukwero tim me kwonge-ni woko. Gurup pa Lujudaya meno onongo gitamo ni kwongo kwong rac makato loko lok goba woko. Gitamo ni ka ngat moni myero kong okwonge wek dano guye lokke, ci ngat meno nongo tye lagoba. Jewish apocryphal writing Wisdom of Sirach, nyo Ecclesiasticus, (23:11) bene waco ni: “Ngat ma maro kwonge nongo konye pe maloyo.” Yecu okwero tim me kwongo kwong ma tere pe. Ka wawaco lok ada kare ducu, ci pe bimitte ni wakwonge wek dano guye lokwa.