1-2. (a) Pingo lakwena Paulo owaco ni mar aye kit “ma pire dit ma katogi ducu”? (b) Lapeny mene ma wabinyamogi?

 I KARE ma lakwena Paulo obedo ka nyamo lok madok i kom niye, gen, ki mar, en odolo te lokke ki waco ni, “[kit] ma pire dit ma katogi ducu en aye mar.” (1 Kor. 13:13) Pingo Paulo owaco kit meno? I kare me anyim, pe dong bimitte ni wabed ki niye i kom cikke pa Lubanga ma kwako lobo manyen pien nongo jami ma wabedo ka genogi dong gucobbe woko. Ento kare ducu bimitte ni wabed ki mar pi Jehovah ki pi dano. Ki lok ada, marwa pigi bimedde ki dongo pi naka.

² Kit macalo bimitte ni wabed ki mar kare ducu, wabinyamo lapeny adek. Me acel, pingo omyero wamar luwotwa? Me aryo, wanyuto mar pi luwotwa nining? Me adek, watwero weko marwa pi luwotwa dongo matek nining?

3. Tyen lok ango ma watye kwede me nyuto mar pi luwotwa?

³ Pingo pire tek ni wamar luwotwa? Ka wamaro utmegiwa, wanyuto ni wabedo Lukricitayo me ada. Yecu owaco bot lukwenane ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:35) Medo i kom meno, nyuto mar pi luwotwa konyowa me bedo ma waribbe. Paulo owaco ni mar “tweyo jami ducu, ribogi kacel.” (Kol. 3:14) Ento tye dok tyen lok mukene ma pire tek mumiyo omyero wamar luwotwa. Lakwena  Jon ocoyo bot luye luwote ni: “Dano ma maro Lubanga myero omar ominne bene.” (1 Jon 4:21) Ka wanyuto mar pi luye luwotwa, wanyuto bene ni wamaro Lubanga.

4-5. Mi labol ma nyuto kit ma marwa pi Lubanga kubbe kwede ki marwa pi luwotwa.

⁴ I yo ma nining ma marwa pi Lubanga kubbe kwede ki marwa pi omegiwa ki lumegiwa? Me labolle, nen kong kit ma adunuwa kubbe kwede ki dul komwa mukene-ni. Ka daktar obongo ngut cingi, en twero niang ka adununi tye ka gone matek nyo ma goro. Pwony ango ma watwero nongo ki i labol man?

⁵ Ka daktar obongo ngut cingwa, ci en twero niang ka ce adunuwa tye ka tic maber. I yo acel-lu, watwero niang ka marwa pi Lubanga tye matek ki ngiyo kit ma marwa pi luwotwa tye kwede. Ka waniang ni marwa pi luye luwotwa okwe woko, ci man twero nyuto ni marwa pi Lubanga bene tye ka kwe woko. Ento, ka kare ducu wanyuto mar pi luye luwotwa, man nyuto ni marwa pi Lubanga bene tye matek.

6. Ka marwa pi omegiwa ki lumegiwa odoko goro, pingo man obedo peko madit? (1 Jon 4:​7-9, 11)

⁶ Ka marwa pi omegiwa ki lumegiwa tye ka doko goro, ci man obedo peko madit. Pingo? Pien man nyuto ni watwa ki Jehovah bene tye ka doko goro. Lakwena Jon onyuto man ka maleng i kare ma opoyo wiwa ni: “Ngat ma pe maro ominne ma en oneno kome, pe twero maro Lubanga ma pe oneno kome.” (1 Jon 4:20) Pwony ango ma wanongo? Cwiny Jehovah bedo yom i komwa keken ka “wamarre kekenwa.”​—Kwan 1 Jon 4:​7-9, 11.

7-8. Tit kong yo mogo ma watwero nyuto kwede marwa pi luwotwa.

⁷ Tyen mapol i Lok pa Lubanga, wanongo cik man ni “wumarre kekenwu.” (Jon 15:​12, 17; Rom. 13:8; 1 Tec. 4:9; 1 Pet. 1:22; 1 Jon 4:11) Ento mar obedo gin ma wawinyo ki i cwinywa ma jo mukene pe gitwero nenone. Dong, watwero nyuto marwa pi omegiwa ki lumegiwa nining? Watimo man i lokwa kacel ki ticwa.

⁸ Tye yo mapol ma watwero nyuto ki omegiwa ki lumegiwa ni wamarogi. Nen kong labol mogo: “Ngat man olok lok me ada bot lawote.” (Jek. 8:16) “Wubed ki kuc [i kinwu] kekenwu.” (Mar. 9:50) ‘Dano acel acel myero omi deyo bot lawote.’ (Rom. 12:10) “Wujolle kekenwu.” (Rom. 15:7) ‘Wumedde ki timo kica ki luwotwu.’ (Kol. 3:13) “Wuting peko pa luwotwu.” (Gal. 6:2) “Wukwe cwinywu kekenwu.” (1 Tec. 4:17b) “Ngat acel acel okony lawote me dongo.” (1 Tec. 5:11) “Ngat acel acel myero oleg Lubanga pi lawote.”​—Yak. 5:16.

9. Pingo kweyo cwiny jo mukene obedo yo ma pire tek me nyutigi ni wamarogi? (Nen bene cal.)

⁹ Kong dong wanyamu yo acel me nyuto mar ma kitito pire i paragraf me aboro. Paulo owaco ni: “Wukwe cwinywu kekenwu.” Pingo kweyo cwiny jo mukene obedo yo ma pire tek me nyutigi ni wamarogi? Ma lubbe ki buk mo acel, nyig lok ma Paulo otiyo kwede pi “kwe cwiny” gonnye ni “cung i nget ngat moni me cuko cwinye ka en tye ka kato ki i peko madit.” Pi meno, ka wakweyo cwiny omego mo ma tye i can malit, wakonye me medde ki tic  pi Jehovah ki gen. Dok kare ducu ka wakweyo cwiny omego nyo lamego mo, wanyutte ni wamare.​—2 Kor. 7:​6, 7, 13.

10. Bedo ki cwiny me kica kubbe nining ki kweyo cwiny jo mukene?

¹⁰ Cwiny me kica kubbe macok adada ki miyo kwecwiny. I yo ma nining? Ka ngat moni kica mako i kom lawote ma tye ka deno can, meno tugo cwinye me kweyo cwiny lapeko-ni ki timo gin mo me konye. Dong ka watye ki cwiny me kica, meno konyowa me kweyo cwiny jo mukene. Paulo otito kit ma kica pa Jehovah pi dano tugo kwede Cwinye me kweyo cwinygi. Paulo olwongo Jehovah ni “Won ma lakica, Lubanga ma kweyo cwiny dano ducu.” (2 Kor. 1:3) Ki kany, Paulo otiyo ki nyig lok ni “lakica” me nyuto kit ma kica mako kwede Jehovah i kom jo mukene. Pi meno, kilwongo Lubanga ni Won, nyo Wang It me kica pi kicane ma en nyuto i kom dano. Dok kica meno tugo cwinye me kweyo cwinywa “i can ducu ma walimo.” (2 Kor. 1:4) Kit macalo pii mamit ma mol ki i wang it, kweyo cwiny jo ma orwo pii onekogi, Jehovah bene miyo yweyo ki kwecwiny bot jo ma peko odiyogi. Watwero lubo lanen pa Jehovah me bedo ki cwiny me kica kacel ki kweyo cwiny jo mukene nining? Yo acel me timo meno aye ki dongo kit mogo ma konyowa me bedo lukica ki me kweyo cwiny jo mukene. Kit macalo mene?

11. Ma lubbe ki Jo Kolocai 3:12 ki 1 Petero 3:​8, kit mukene ango ma bikonyowa me maro jo mukene kacel ki kweyo cwinygi?

¹¹ Ngo ma bikonyowa me medde ki maro luwotwa kacel ki ‘medde ki kweyo cwinygi’ nino ki nino? Mitte ni wadong kit mogo calo paro pi luwotwa, mar me omego, ki kica. (Kwan Jo Kolocai 3:12; 1 Petero 3:8.) Kit magi bikonyowa nining? Ka kica makowa i kom utmegiwa dok waparo pigi, ci wabibedo ki miti matek me kweyo cwinygi ka gitye i can. Kit ma Yecu otito kwede, “lok ma ogurre i cwiny dano, en aye dog bene loko. Dano maber kwanyo gin maber ki i kin jamine mabeco ma en okano.” (Mat. 12:​34, 35) Miyo kwecwiny bot omegiwa ki lumegiwa obedo yo ma pire tek ma wanyuto kwede ni wamarogi.

12. (a) Pingo omyero wabed ma wangwa twolo? (b) Lapeny mene ma wabinyamo kombeddi?

¹² Wan ducu “myero wamarre kekenwa.” (1 Jon 4:7) Ento, pire tek ni wiwa opo ni Yecu ociko ni “mar pa jo mapol bikwe woko.” (Mat. 24:12) Yecu onongo pe tye ka waco ni pol pa lupwonnyene gibigiko nyuto mar woko bot luwotgi. Kadi bed kit meno, omyero wabed ma wangwa twolo wek cwiny pa jo me lobo man ma gipe ki mar pe ogudwa. Kong dong wanyamu lapeny man ma pire tek-ki: Ngo ma bikonyowa me ngeyo ka marwa pi utmegiwa tye matek?

13. Ngo ma bikonyowa me ngeyo ka marwa pi utmegiwa tye matek?

¹³ Yo acel me ngeyo ka marwa pi utmegiwa tye matek aye ki ngiyo kit ma wadok kwede iye ka niang manok tye. (2 Kor. 8:8) Lakwena Petero oloko iye kun waco ni: “Makato ducu wumok matek i marre kekenwu; pien mar umo lwak bal mapol.” (1 Pet. 4:8) Dong, kit ma wadok kwede iye ka utmegiwa gutimo  bal nyo gucwero cwinywa bikonyowa me niang ka marwa pigi tye matek.

14. Ma lubbe ki 1 Petero 4:​8, kodi mar mene ma omyero wabed kwede? Mi labol.

¹⁴ Kong dong wanyamu lok pa Petero man i yo matut. Bute mukwongo me tyeng me 8 tito ni “wumok matek i marre kekenwu.” Nyig lok ma Petero otiyo kwede ma kigonyo ni “matek” tyen lokke atir atir tye ni “yaro iye malac.” Bute me aryo tito gin ma wabitimo ka watye ki mar matek pi jo mukene. Mar ma kit meno konyowa me umo bal pa utmegiwa. Watwero porone kit man: Go kong ni wi meja moni tye ki cilo ma omodo iye. Watwero kwanyo latam malac ci wayaro i wi meja man me umone, kun pe waumo roc acel nyo aryo keken ento lwak cilo madwong. I yo acel-lu, ka watye ki mar matek pi omegiwa ki lumegiwa ci watwero “umo,” nyo timo kica, pe pi bal acel nyo aryo keken ento “lwak bal mapol.”

15. Ka marwa pi omegiwa ki lumegiwa tye matek, ngo ma wabibedo ki kare me timone? (Jo Kolocai 3:13)

¹⁵ Marwa pi luwotwa myero obed  matek ma weko watwero timo kica pi balgi​—kadi bed meno mito tute matek. (Kwan Jo Kolocai 3:13.) Ka watimo kica ki jo mukene, wanyuto ni marwa tye matek dok ni wamito yomo cwiny Jehovah. Ngo mukene ma twero konyowa me timo kica ki jo mukene kun pe waweko cwinywa cwer oyotoyot pi gin ma gitimo?

16-17. Ngo mukene ma bikonyowa me cayo bal matino ma jo mukene gitimo i komwa? Mi labol. (Nen bene cal.)

¹⁶ Ket cwinyi i kom kit mabeco ma omegini ki lumegini gitye kwede, ento pe i kom kitgi maraco. Nen kong labol man. Go kong ni itye ka namo kacel ki omege ki lumege mogo. Wubedo ka nongo mit pa yweyo wiwu, ci i agikki me namowu wumako cal kacel. Ci dok imako cal aryo mukene, wek okonyi ka ce cal mukwongo pe okatti maber. Dong itye ki cal adek. Ento i cal acel, ineno ni omego mo ojude woko. Ibitimo ngo ki cal meno? Ibirucone woko, pien itye ki cal aryo mukene mabeco ma nyuto dano ducu ma gitye ka bwunyo, kadiwa omego-ni.

¹⁷ Watwero poro cal ma wagwoko ki tam ma wayero me gwoko i adamwa. Pol kare, wiwa po i kom kare mabeco ma wabedo kwede ki omegiwa ki lumegiwa. Ento ket kong ni i kare meno, omego  nyo lamego mo owaco nyo otimo gin mo ma ocwero cwinywa. Gin ango ma omyero watim ki niang manok meno? Omyero watute me rucone woko ki i wiwa kit ma waruco kwede cal ma pe ber. (Car. 19:11; Ep. 4:32) Watwero ruco bal matidi ma omego nyo lamego mo otimo pien wiwa po i kom kare mabeco mapol ma wabedo kwede ki ngat meno. Meno aye jami ma wamito ni wiwa obed ka po iye.

18. Jami ma pigi tego ango ma wanyamo i pwony man madok i kom mar?

¹⁸ Pingo wamito ni marwa pi luwotwa obed matek? Kit ma waneno kwede, ka wanyuto mar pi omegiwa ki lumegiwa, nongo watye ka nyuto ni wamaro Jehovah. Wanyuto marwa pi luye luwotwa nining? Yo acel ma watimo kwede meno aye ki kweyo cwinygi. Wabibedo ki kare me ‘kweyo cwiny luwotwa’ ka kica makowa i komgi. Watwero weko marwa pi luwotwa bedo matek nining? Ka watute me timo kica ki utmegiwa kadi bed timone tek.

19. Pingo pire tek tutwalle i kare-ni me nyuto mar bot luwotwa?

¹⁹ Pingo pire tek tutwalle i kare-ni, me nyuto mar bot luwotwa? Nen kong tyen lok ma Petero omiyo: “Agikki me jami ducu dong cok; pi meno, . . . wumok matek i marre kekenwu.” (1 Pet. 4:​7, 8) Ka agikki me lobo man marac-ci nyiko cok, gin ango ma wangeyo ni bitimme? I kare ma Yecu tye ka lok i kom lulub kore, en otito ni: “Jo me rok ducu bikwerowu pi nyinga.” (Mat. 24:9) Me kanyo adegadega ma kit meno, mitte ni wabed ma wanote kacel. Ka wamaro omegiwa ki lumegiwa, Catan pe bibedo ki kare me pokowa pien mar “tweyo jami ducu, ribogi kacel” licwic.​—Kol. 3:14; Pil. 2:​1, 2.