1, 2. (a) Tit kong carolok pa Yecu i kom won poto olok-ki. (b) Carolok man nyuto yot cing kacel kica pa Jehovah nining?

I ODIKO mo acel won poto olok owoto i cuk ka yenyo dano wek gubin gukonye ki tic i poto olokke. Co ma en onongogi guwinye pi wel cente ma kiculo ki latic ma otiyo tic pi nino acel. Won poto onongo pud mito lutic mukene, ci obedo ka dok i cuk i dyeceng ka yenyo lutic mukene wek gubin ka tic, kun bene ye me culogi cente mupore. Ka dong cawa oromo me giko tic, olwongo lutic ducu kacel wek eculgi, ci omiyo botgi ducu ciling marom, kadi bed ni ngat moni otiyo pi cawa malac nyo cawa acel. I kare ma jo ma en okwongo lwongogi guniang, gucako nguru. Won poto odok iye ni: ‘Wun mono pe wuye wel ma onongo wawinye iye? An mono ape kitwero me culo jo ducu marom? Nyeko tye ka makowu pien cinga yot?’​—Mat. 20:1-15.

² Carolok pa Yecu-ni poyo wiwa i kom kit pa Jehovah ma pol kare kiloko iye i Baibul​—‘kicane.’ (Kwan 2 Jo Korint 6:1.) Lutic ma gutiyo pi cawa acel keken nen calo pe onongo  gupore me nongo cul me nino acel kulu, ento won poto olok onyutigi cwiny me kica madit adada. Ma lubbe ki nyig lok me “kica” ma pol kare kigonyo ni “gracia” i Baibul mukene, ngat mo ma okwano lok i kom Baibul matut ocoyo ni: “Gin ma pire tek ki i kom lok man aye ni obedo mot me nono dok ma pe wapore pire, nyo gin mo ma kimiyo bot ngat mo ma onongo pe opore me nongone.”

3, 4. Jehovah onyuto kica ma pe wapore pire nining, ki dok pingo?

³ Ginacoya me leb Grik loko i kom “mot me kica pa Lubanga.” (Ep. 3:7) I yo ma nining ma Jehovah miyo “mot” me nono man ki dok pingo? Ka onongo walubo cik pa Jehovah ducu kore ki kore, ci nongo wapore pi kicane. Ento ngene kene ni pe twere. Man aye oweko Kabaka Solomon ocoyo ni: “Pe tye dano mo ma kite atir i lobo man, ma timo gin maber keken ma pe balo.” (Latit. 7:20) Lakwena Paulo bene owaco ni: “Dano ducu gibalo, pe gio i kom deyo pa Lubanga,” ki dok ni “mucara me bal en to.” (Rom. 3:23; 6:23a) Meno aye gin ma wapore pire.

⁴ Ento, Jehovah onyuto mar madit ma en tye kwede i kom dano ma gitye ki roc kun timo botgi kica kadi bed pe gupore pire. En ominiwa mic ma pud dong dit loyo ducu, ma en aye “Wode acel keken” ma ocwalo i lobo me to piwa. (Jon 3:16) Pi meno, Paulo ocoyo lok madok i kom Yecu ni: “En kombeddi dong gimiye deyo ki woro macalo kabaka pi arem me to ma en ociro, wek pi kica pa Lubanga ebil to pi jo ducu.” (Ibru 2:9) Ada, “mot ma Lubanga miyowa nono, en aye kwo ma pe tum i Yecu Kricito Rwotwa.”​—Rom. 6:23b.

5, 6. Adwogi ango ma wanongo ka watye i te loc me (a) bal? (b) kica pa Lubanga?

⁵ Dano ducu gulako bal kacel to nining? Baibul tito botwa ni: “Pi bal pa dano acel [Adam] omiyo to obedo ka loc.” (Rom. 5:12, 14, 17) Ki yomcwiny madit, wan dong watwero yero wek bal aye olowa nyo pe. Ka waketo niyewa i kom ginkok pa Kricito nongo watye ka mine me bedo i te loc me kica pa Jehovah. Man timme nining? “Ka ma bal onya iye, en bene ka ma kica onya iye makato ducu-ni. Kit meno, kit macalo bal yam oloyo loc i to, kica bene myero olo loc pi kwano dano ni kitgi atir, wek omi gunong kwo ma pe tum, pi Yecu Kricito Rwotwa.”​—Rom. 5:20, 21.

⁶ Kadi bed ni pud watye ki bal, pe myero wawek bal aye odor kwowa. Ka watimo bal, myero wakwa Jehovah wek otimwa kica. Paulo ociko Lukricitayo ni: “Bal pe doki bibwoyowu [biloyowu], pien wun dong pe wutye i te cik, ento wutye i te kica pa Lubanga.” (Rom. 6:14) Pi meno, dong watye i te cik me kica pa Lubanga. Man kelo adwogi ango? Paulo otito ni: “Kica pa Lubanga . . . pwonyowa me kwero lubo kit pa jo ma pe lworo Lubanga, kacel ki miti ducu me lobo man, dok pwonyowa me gwokke kenwa wek wabed ma cwinywa atir, kun walworo Lubanga.”​—Tito 2:11, 12.

7, 8. Te lokke ngo ka kiwacci Jehovah nyuto kicane i ‘yo mapatpat’? (Nen cal ma tye i pot karatac 20.)

⁷ Lakwena Petero ocoyo ni: “Kit macalo ngat acel acel tye ki motte ma gimiye, wuti kwede pi konnye kekenwu, macalo lagwok-jami mabeco, ma tiyo ki mot me kica ma Lubanga omiyo ma kite patpat.” (1 Pet. 4:10) Man te lokke ngo? Man te lokke ni kadi bed watye ka kato ki i atematema madit adada i kwowa, Jehovah bikonyowa me cirone. Lubanga binyuto kicane i kwowa kun konyowa ki i atematema mo keken ma watye ka kato ki iye.

⁸ Ki lok ada, Jehovah nyuto kicane i yo mapol mapatpat. Lakwena Jon ocoyo: “Nia i lonyone mapol wan ducu gimiyowa kica i kom kica.” (Jon 1:16) Yo mapatpat ma Jehovah onyuto kwede kicane weko wanongo mot mapol. Magi gubedo ngo?

9. Wanongo adwogi maber ki i kica pa Jehovah nining, dok watwero nyuto pwocwa pire nining?

⁹ Timo kica pi balwa. Pi kicane ma pe lokke, Jehovah timo kica pi balwa tekki wangut kun bene waketo tek me lweny ki miti me timo bal. (Kwan 1 Jon 1:8, 9.) Kica pa Jehovah myero owek wabed ki pwoc madit dok ocuk cwinywa me mine deyo. I kare ma Paulo tye ka coyo waraga me cuko cwiny Lukricitayo luwote, en owaco ni: “[Jehovah] ceng olarowa ki i loc me piny macol ci okobowa woko i te loc pa Wode ma emaro. Koko dano, ma en aye weko bal, a ki bote.” (Kol. 1:13, 14) Timo kica pi balwa weko wabedo atera me nongo mot mapol.

10. Gin ango ma dong twere pi kica pa Lubanga?

¹⁰ Bedo ki wat maber ki Lubanga. Nicakke ma kinywalowa, wan lubalo dok lumone pa Lubanga. Paulo oniang ni: “I kare ma onongo wan pud lukwor pa Lubanga, en odwokowa cen bote, pi to pa Wode.” (Rom. 5:10) Wat maber ma dong tye i kinwa oweko watwero bedo ki kuc ki Jehovah. Paulo onyuto ni man obedo kica pa Jehovah, kun waco ni: “Kit macalo gikwanowa [omege pa Kricito ma kiwirogi] ni kitwa atir pi niye, watye dong ki kuc i nyim Lubanga, pi Rwotwa Yecu Kricito. Pire omiyo giyabo botwa yo me limo kica man ma ocung pi niye-ni.” (Rom. 5:1, 2) Man pud dong obedo mot madit ya!

11. Jo ma kiwirogi guloko ‘romi mukene-ni’ me doko jo ma kitgi atir nining?

¹¹ Bedo jo ma kitgi atir. Wan ducu lubal nicakke i kare ma kinywalowa. Ento, lanebi Daniel otito con ni i kare me agikki, “jo maryek” ma gin aye udong jo ma kiwirogi ‘gibiloko jo mapol bedo ma kitgi atir.’ (Kwan Daniel 12:3.) Tito kwena kacel ki pwonyo dano, oweko “romi mukene” ma welgi tye milion mapol dong guyubo watgi ki Jehovah. (Jon 10:16) Jami magi ducu gutimme pi kica pa Jehovah. Paulo otito ni: “Lubanga kwanogi ni kitgi atir nono, miyogi macalo mot pi kicane pi kit ma Yecu okokogi kwede.”​—Rom. 3:23, 24.

12. Lega rwatte ki kica pa Lubanga nining?

¹² Lok ki Lubanga i lega. Pi kicane, Jehovah oyabo yo botwa me nyikke cok ki komkerre me polo ka walego bote. Ki lok ada, Paulo olwongo komker  pa Jehovah ni “komker . . , ka ma kica tye iye” dok bene okwayowa me nyiko cok i nyime ki “tekcwiny.” (Ibru 4:16a) Jehovah ominiwa mot man kun tiyo ki Wode, “pire omiyo wan jo ma waye Yecu walimo tekcwiny, pien oyabo botwa yo me o i nyim Lubanga ki gen.” (Ep. 3:12) Lega bot Jehovah obedo yo acel ma en onyuto kwede ki kicane botwa.

13. Kica pa Lubanga “konyowa i kare ma mitte” nining?

¹³ Nongo kony i cawa ma mitte. Paulo ocuko cwinywa me bedo agonya me lok ki Jehovah i lega, wek “wanong bene kica ma konyowa i kare ma mitte.” (Ibru 4:16b) I cawa mo keken ma watye i atematema nyo cwinywa otur, watwero lega bot Jehovah pi kony. Kadi bed pe wapore, en gamo legawa kun pol kare tiyo ki Lukricitayo luwotwa, dok meno aye “gin mumiyo cwinywa tek, kun wawaco ni, ‘Rwot [Jehovah] en lakony mera, pe abibedo ki lworo; ngo kono ma dano twero timo i koma?’”​—Ibru 13:6.

14. Adwogi maber ango ma wanongo pi kica pa Jehovah?

¹⁴ Wanongo kwe cwiny. Mot madit ma wanongo pi kica pa Lubanga ka cwinywa otur en aye kwe cwiny. (Jab. 51:17) Paulo okweyo cwiny Lukricitayo me Tecalonika ma onongo kitye ka unogi kun waco ni: “Rwot Yecu kikome, ki Lubanga Wonwa ma marowa dok okweyo cwinywa matwal ki gen maber ma obino pi kica, okwe cwinywu, omokwu matek.” (2 Tec. 2:16, 17) Pud dong kweyo cwinywa ya me niang mar ma Jehovah tye kwede i komwa pi kicane ma pe lokke!

15. Gen ango ma watye kwede pi kica pa Lubanga?

¹⁵ Bedo ki gen me nongo kwo ma pe tum. Macalo lubalo, piwa kenwa pe watwero bedo ki gen meno. (Kwan  Jabuli 49:7, 8.) Ento Jehovah miniwa gen mamwonya adada. Yecu ociko lulub kore ni: “Man en gin ma Wora mito, ni, dano ducu ma neno Wod, ma ye en, myero olim kwo ma pe tum.” (Jon 6:40) Ada, gen me nongo kwo ma pe tum obedo mot ma wanongo pi kica pa Lubanga. Paulo, ngat ma obedo ki pwoc pi mot man owaco ni: “Kica pa Lubanga dong onen pi laro dano ducu.”​—Tito 2:11.

16. Lukricitayo mogo i kare macon gunywaro kica pa Lubanga nining?

¹⁶ Kadi bed ni pi kica pa Jehovah weko wanongo mot mapol, pe dong myero watam ni en bitimo botwa kica pi bal ma watimo akaka. Lukricitayo mogo i kare macon ‘guloko kica ma Lubanga omiyowa odoko me timo tim coco.’ (Juda 4) Lukricitayo magi ma pe gungut-ti gutamo ni gitwero timo bal akaka ci gikwayo Jehovah ni otim botgi kica. Ma dong rac loyo, gutute me bito utmege mogo me donyo i timo kodi timgi-ni. I kare-ni bene, ngat ma timo meno nongo “ongalo cwiny maleng me kica pa Lubanga.”​—Ibru 10:29.

17. Tira magwar ango ma Petero omiyo?

¹⁷ I kare-ni bene, Catan obwolo Lukricitayo me donyo i timo bal akaka pien gitamo ni Lubanga bitimo botgi kica. Ento kadi bed ni Jehovah tye atera me timo kica bot jo ma gungut, en mito ni watute matek me lweny ki cwiny ma terowa i timo bal. Pi teko pa cwiny maleng Petero ocoyo ni: “Pi meno, lurema, kit ma dong onongo wungeyo man con, wugwokke pe wuwek jo ma pe giworo cik mo gubwolwu, dok pe gungakwu woko i tamwu, miyo wupoto woko ki ka ma wucung iye matek. Wumedde ki dongo i kica pa Rwotwa, ma en Lalarwa Yecu Kricito, kun wumedde ka ngeye bene.”​—2 Pet. 3:17, 18.

18. Tic ango ma watye kwede pi kica pa Jehovah?

¹⁸ Macalo jo ma gitye ki pwoc pi kica pa Jehovah, myero wati ki motwa me miyo deyo bot Lubanga ki bene me konyo luwotwa. I yo mene? Paulo ogamo ni: “Watye ki mot mapatpat ma lubo gum ma Lubanga omiyo botwa; myero wati kwedgi. Ka ce gimiyo botwa mot me tito lok pa Lubanga; myero watit kit macalo niyewa tye kwede. Ka ce omiyowa mot me tic pi dano, myero wati tic botgi. Ngat ma lapwony myero opwony dano; ngat ma cuko cwiny dano myero ocuk cwinygi; .  . . ngat ma konyo lucan, myero okonygi ki yomcwiny.” (Rom. 12:6-8) Kica ma Jehovah onyuto botwa-ni weko wabedo i te cik me tic ki mit kom i ticwa me pwony, wapwonyo dano ki lok ma i Baibul, wacuko cwiny Lukricitayo luwotwa, ki dok watimo kica bot jo ma gibalo botwa.

19. Tic ango ma watye kwede ma kibinyamo i yo matut i pwony ma lubo man?

¹⁹ Macalo jo ma gitye ki pwoc pi mar pa Jehovah, myero watute ki kerowa ducu “me tito lok me kwena maber me kica pa Lubanga.” (Tic 20:24) Kibinyamo tic man i yo matut i pwony ma lubo man.