I kare ma dong atyeko lweny ki gung cwiny ci acako tic macalo painia, kwona olokke i yo ma pe onongo abyeko. (Ep. 3:20) Ento itwero pennye ni meno ocakke nining. Wek acak ki i acakkine.

Kinywala i boma me Berlin i lobo Germany i mwaka 1939, dwe manok i nge acakki me Lweny me Wi Lobo me II. Ma dong lweny cok gik i mwaka 1945, dege lweny ocako bolo bom i Berlin teretere. I nino mo acel, kibolo bom i gudi ka ma wabedo iye, ci omwoc, an ki lamera matidi ki lunyodowa waringo i ot kanne. Pi ber bedowa, waringo wa i Erfurt, boma ma kinywalo iye mamana.

Mamana obedo ka yenyo ada ki cwinye ducu. En okwano bukke ma luryeko gucoyo ki bukke me dini mapatpat ento pe oyeng kwedgi. I kine ka mwaka 1948, Lucaden aryo gubino i gangwa. Mamana ojologi ci ocako penyogi lapeny teretere. Ma pe kato cawa acel i nge rwatte ki Lucaden, en owaco bota ki lamera matidi ni: “Atyeko nongo ada woko!” Ma pe otero kare malac, an, mamana, ki lamera wacako cito i cokke i Erfurt.

I mwaka1950 wadok cen i Berlin, ci wabedo i kacokke me Berlin-Kreuzberg. I nge kobo i kabedo mukene i Berlin, wabedo i kacokke me Berlin-Tempelhof. Lacen mamana onongo batija ento an abedo ka galle. Pingo?

Pe adongo i yo me cwiny oyotoyot pien an onongo lalewic matek. Kadi bed onongo awoto kacel ki jo mukene i tic me pwony, ento pi mwaki aryo pe aloko ki ngat mo keken me miyo caden. Jami olokke i kare ma acako bedo kacel ki omege ki lumege ma onongo gunyutu tekcwiny ki gennegi bot Jehovah. Jo mogo i kingi yam gukanyo kwo i kam me aunauna pa Nazi nyo i buc i East Germany. Jo mukene onongo guketo kwogi ka mading ki tero bukkewa i mung wa i East Germany. Lanengi ogudo cwinya adada. Acako tamo ni ka guketo kwogi ka mading pi  Jehovah ki pi utmege, ci an omyero atute me lweny ki lewic.

Acako loyo lworona i kare ma anywako i rwec ma kite dok pat me tito kwena i mwaka 1955. I waraga ma kiketo i gajeti me Informant, * Omego Nathan Knorr omiyo lok angeya ni man bibedo rwec madit loyo ma dulwa oyubo. En owaco ni, ka lutit kwena ducu gunywako i rwec man, “wabibedo ki dwe ma pud dong ber loyo me tito kwena ma otimme i wi lobo man.” Man aye gin mutimme kikome! Ma pe otero kare malac i nge rwec meno, adyero kwona bot Jehovah, dok i mwaka 1956, anongo batija wan ki babana kacel ki lamera. Ento ma pe ori, akemme ki tam ma pire tek ma onongo mitte ni amoki.

Pi mwaki mapol, onongo angeyo ni omyero ati macalo painia, ento abedo ka diro yub man anyim. Mukwongo, amoko tamma me nongo pwonnye i Berlin i kom kit me wilo ki cato jami bot lubiacara ma i lobe mukene. I nge meno, onongo amito ni kong ati tic ma akwano-ni wek adong dirona iye ma peya acako tic macalo painia. Pi meno, i mwaka 1961, anongo tic i Hamburg, ma obedo boma madit loyo ki i Germany ma tye i dog pii. Onongo amaro tic man tutwal ma oweko abedo ka diro anyim yubba me tic macalo painia. Ngo ma onongo dong abitimo?

Atye ki pwoc ni Jehovah otiyo ki omege ma lumar me konya me keto pi jami me cwiny wek obed mukwongo. Lurema mapol onongo dong gucako tic macalo painia dok guweka lanen maber. Medo i kom meno, Omego Erich Mundt, ma onongo yam kitweye i kam me aunauna, ocuko cwinya me geno Jehovah. En otito ni i kare ma gitye i kam me aunauna, omege ma gujenge i komgi kekengi lacen gudoko goro. Ento jo ma gugeno Jehovah ki cwinygi ducu gugwoko gennegi dok gukonyo dul pa Jehovah.

Omego Martin Poetzinger, ma lacen obedo lamemba me Lukiko Madit, obedo ka cuko cwiny omege kun waco ni, “Tekcwiny aye obedo gin maber loyo ma itwero bedo kwede!” I nge lwodo lok meno, aweko ticca woko dok acako tic macalo painia i Juni 1963. Meno aye pud dong tam maber loyo ma amoko! I nge dwe aryo, ma peya acako yenyo tic manyen, kilwonga me tic macalo painia keken. Mwaki mogo manok i nge meno, Jehovah omina mot ma onongo pe abyeko. Kilwonga i kilaci me 44 me Cukul me Gilead.

Gin acel ma pire tek ma apwonyo ki bot Omego Nathan Knorr ki Lyman Swingle aye ni: “Pe omyero iil cingi oyotoyot.” Gucuko cwinywa me medde ki bedo i ticwa kadi bed ni onongo pe yot. Omego Knorr owaco ni: “Ngo ma ibiketo cwinyi iye? Cilo, ober, lwango, can? Nyo mono ibineno yadi, ature ki dano ma cwinygi yom? Wupwonnye me maro dano!” Nino mo acel ma Omego Swingle tye ka tito pingo jo mukene giilo cinggi woko oyotoyot, cwinye otugge mada ma pig wange mito ony. En kong oling mot wang ma cwinye opye ci omedde ki pwony. Man ogudo cwinya matek mumiyo amoko tamma pe me turo cwiny Kricito nyo omegine.​—Mat. 25:40.

I kare ma kiminiwa waraga me tyeko kwan, Lubetel mogo gubedo ka penyowa ka ma wabicito iye. Guloko maber i kom kabedo ma jo mukene-ni gibicito iye, ento i kare ma oo i koma, awaco ni: “Congo (Kinshasa).” Kong guling mot ka dong guwaco ni: “Ai, Congo! Jehovah myero obed kwedi ba!” I kare meno, Congo (Kinshasa) onongo kimaro lok iye tutwal pi lweny, tim aranyi ki nek alany. Ento wiya pe owil i kom pwony ma anongo. Ma pe otero kare malac i nge tyeko kwan i Sektemba 1967, an kacel ki omego Heinrich Dehnbostel, ki omego Claude Lindsay, wacako wot me cito i Kinshasa, boma madit loyo ki i Congo.

I kare ma wao i boma me Kinshasa, wakwano leb French pi dwe adek. I nge meno watuk  ki dege wa i boma me Lubumbashi, ma onongo yam kilwongo ni Elisabethville, ma tye tung kupiny me Congo, macok ki lobo Zambia. Wadak i gang pa lumiconari ma tye i dye boma kikome.

Kit macalo onongo peya kitito kwena bot pol pa dano ma i boma me Lubumbashi, cwinywa obedo yom me bedo jo mukwongo me nywako lok ada me Baibul kwedgi. Ma pe orii, onongo watye ki lutino kwan mapol ata ma pe watwero kwan kwedgi ducu. Watito kwena bot ludito pa gamente ki abili bene. Polgi onongo gitye ki woro pi Lok pa Lubanga kacel ki ticwa me tito kwena. Dano onongo polle giloko leb Swahili, pi meno an kacel ki Claude Lindsay wapwonyo leb man bene. I nge meno, kicwalowa i kacokke ma gitiyo ki leb Swahili.

Kadi bed jami mabeco otimme i kwowa ento bene wakato ki i ariya mogo. Tyen mapol onongo lumony ma gumer dok gitye ki muduku nyo abili ma giger gibedo ka yelowa, kun gimoro adot ma tere pe i komwa. I nino mo acel, gurup pa abili ma gitye ki muduku i cinggi gudonyo i cokkewa ma onongo tye ka wot anyim i gang pa lumiconari ci guterowa i polic citecen, ka ma gumiyo wabedo piny i ngom wa cawa angwen me dyewor ka dong kigonyowa.

I mwaka 1969, kimina tic me limo adwol. I adwol meno, abilo kwo me caro me Afrika, kun onongo awoto wot mabor i yo mupong ki coto ki i kin lum ma olot maboco! I caro mo acel, min gweno mo ki lutinone gubedo ka buto i te kitandana i dyewor. Wiya pe twero  wil i kom kit ma min gweno-ni onongo woo kwede i odiko ducu ma nongo piny pud col. Wiya pud po ki yomcwiny kit ma onongo wabedo i wang oo otyeno kacel ki omege kun waloko i kom ada me Baibul.

Peko acel madit adada ma wayelle kwede obedo jo ma onongo gitimme calo gitye Lucaden pa Jehovah kun i ada gitye lumemba me gurup pa lucung i wibye ma kilwongo ni Kitawala. * Mogo i kingi gunongo batija dok gudoko wa luelda i kacokke. Pol pa jo magi onongo gitye calo ‘gweng mukanne’ i kacokke, ento pe gutwero bwolo omege ki lumege ma lugen. (Juda 12, NW.) I agikkine, Jehovah okwanyo jo magi woko ki i kacokke. I nge meno, jo mukene mapol gupwonyo ada.

I mwaka 1971, kicwala me tic i jang gang kal ma i Kinshasa, ka ma atiyo tic mapatpat, tic calo coyo ki gamo waraga, gamo ki cwalo bukke, kacel ki doro tic me tito kwena. Ki i Betel, apwonyo kit me yubo ticwa i lobo madit ma dongo lobo tye lapiny iye. I kare mogo, waraga ma wacoyo bot kacokke onongo tero dwe mapol me o botgi. Onongo kikwanyo waraga magi ki dege ci kiketo i yeya ma lacen moko woko i kin doo me wi nam. Ento, tic gire ocobbe kadi bed wakato ki i ariya magi ki mukene.

Onongo abedo ki ur me neno kit ma omege giyubo gure madito kadi bed gitye ki cente manok keken. Onongo gigero wi abam ki i kom bye, gitiyo ki lagada me yubo kor ot kun gitweyo mukene doko kabedo. Onongo bene gicomo koo me gero odi ci giumo wiye ki kolo kun kolo mukene kiyubo ki meja. Dok giwanyo pok nge yat me tweyo jami me ka tic ki cumar. Neno diro ma omege ki lumege magi gitiyo kwede me cobo peko onongo weko abedo ki woro pigi. Amarogi matek adada. Abedo ka parogi mada i kare ma kicwala ka tic i kabedo mukene!

I mwaka 1974, kikoba ka tic i jang gang kal ma i Nairobi, Kenya. Onongo wabedo ki tic madwong me atima, pien jang gang kal me Kenya onongo neno wi tic me tito kwena i lobe 10 macok, kun i lobe magi mukene onongo gamente oketo kigeng i kom ticwa. Kare ki kare kibedo ka cwala me limo kabedo magi, tutwalle Ethiopia, ka ma utmegiwa onongo gitye ka kato ki i aunauna matek. Polgi kiketo awano i komgi nyo kitweyogi i buc dok mogo kinekogi. Ento gukanyo pien onongo gitye ki wat maber ki Jehovah ki dok i kingi.

I mwaka 1980, kwona odoko mwonya adada i kare ma anyomo lamego ma nyinge Gail Matheson, ma a ki i lobo Canada. Gail okwano kacel kweda i kilaci acel me Gilead. Wabedo ka kubbe ki coyo waraga. Gail onongo tiyo macalo lamiconari i lobo Bolivia. I nge mwaka 12, warwatte doki i boma me New York. Ma pe ori, wanyomme i Kenya. Atye ki pwoc madit adada bot Gail pien en kare ducu neno jami kit ma Jehovah neno kwede dok bedo ma oyeng ki jami ma en tye kwede. En pud medde ki bedo lawota ma lamar dok pud konya.

I mwaka 1986, an kacel ki Gail kicwalowa me limo adwol kun bene onongo bene atye ka tic macalo lamemba me Komitti me Jang Gang Kal. Tic me limo adwol onongo kwako limo lobe mapol ma gitye i te jang gang kal me Kenya.

Pud wiya po ki yomcwiny i kom kit ma wayubo kwede gure madit i Asmara (ma tye i lobo Eritrea) i mwaka 1992, ma onongo peya kigengo ticwa i lobo meno. Ki cwercwiny, wanongo ot mo ma nen rac ki woko ento onongo dong rac loyo ki i iye. I nino me gure madit, abedo ki ur me neno kit ma omege guloko kwede i ot meno odoko mwonya ma opore me woro Jehovah. Jo me odi mapol gukelo latam ci gudeyo ka mo keken ma onongo nen rac. Wabedo ki gure mamit adada dok wel dano obedo 1,279.

 Tic me limo adwol okelo alokaloka madit i kwowa pien onongo wabedo i kabedo mapatpat cabit ki cabit. I kare mo, wabedo i twon ot mo madit dok mamwonya ma tye i dog nam; i kare mukene wabedo i ot ma kiyubo kome ki bati i kam pa lutic, kun coron onongo tye futi 300 (mita 100) mabor ki ot ma wabedo iye. Ento labongo paro pi ka ma wabedo iye, gin ma wiwa po iye loyo aye mit pa tiyo tic me pwony ki lutit kwena kacel ki lupainia ma komgi mit. I kare ma dok kiminiwa tic mukene, waweko luremwa mapol ma waparogi mada.

I kine ka mwaka 1987 ki 1992, gamente oye coyo ticwa ma lubbe ki cik i lobe mapol ma tye i te jang gang kal me Kenya. Macalo adwogine, kicako jang gang kal mapatpat i lobe magi. I mwaka 1993, kicwalowa me cito ka tic i jang gang kal ma i Addis Ababa, i lobo Ethiopia, ka ma onongo kibedo ka tiyo ticwa lapiny lapiny pi mwaki mapol, ento dong gamente oye coyo ticwa woko.

Jehovah ogoyo laane i kom ticwa i lobo Ethiopia. Omege ki lumege mapol gucako tic macalo painia. Pacen makato 20 i kom lutit kwena ducu gutiyo macalo painia marii nicakke i mwaka 2012. Medo i kom meno, cukul mapatpat omiyo pwonnye ki lutit kwena, dok kigero Odi me Ker makato 120. I mwaka 2004 Lubetel gudak i ot manyen, dok Ot me Gure ma kigero i kabedo acel meno okelo mot mapol bot omege.

Pi mwaki mapol, an wan ki Gail wadoko lurem macok ki omege ki lumege mapol ma i lobo Ethiopia. Wamarogi pien gubedo lukica dok gimaro dano. Ma cokcok-ki wabedo ka yele ki peko me yotkom, pi meno kicwalowa i jang gang kal me Central Europe, ka ma kitye ka gwokowa iye maber adada ento pud waparo omegiwa ma i lobo Ethiopia matek.

Waneno kit ma Jehovah oweko ticce odongo kwede. (1 Kor. 3:6, 9) Me labolle, i kare ma acako tito kwena bot anywali lobo Rwanda ma gubino i Congo ka yenyo mola, onongo pe tye latit kwena mo keken i lobo Rwanda ma tye ka miyo ripot. Kombeddi dong tye lutit kwena ma romo 30,000 i lobo meno. I mwaka 1967, onongo tye lutit kwena 6,000 i lobo Congo (Kinshasa). I kare-ni dong tye lutit kwena makato 230,000, dok dano makato milion acel gubedo tye i Nipo i mwaka 2018. Ka kiribo wel lutit kwena ducu ma gitye i lobe ma yam gitye i te jang gang kal me Kenya, wel lutit dong omedde makato 100,000.

Mwaki makato 50 angec, Jehovah otiyo ki omege mapat pat me konya wek acak tic pi kare malac. Kadi bed ni pud atye ka lweny ki lewic wa i kare-ni, apwonye me jenge i kom Jehovah. Kwo ma awok ki iye i Afrika okonya me dongo diyo cwiny ki me bedo ma ayeng ki jami ma atye kwede. An wan ki Gail wamaro omege ki lumege ma ginyutu yot cing ki jolo wele, gikanyo pekki madongo, dok gigeno Jehovah. Atye ki pwoc madit pi kica mere ma pe apore pire. Ada, mot ma Jehovah omina dwong makato kit ma onongo abyeko woko.​—Jab. 37:4.