1, 2. (a) ‘Mot pa Lubanga maber ma pe wacce-ni’ kwako gin ango? (b) Lapeny mene ma wabinyamogi i pwony man?

I KARE ma Jehovah ocwalo Wode acel keken i lobo, En omiyo gin ma onongo bidoko mot ma pud dong dit loyo me mar! (Jon 3:16; 1 Jon 4:9, 10) Lakwena Paulo olwongo mot ma Lubanga omiyo-ni ni “motte maber ma pe wacce.” (2 Kor. 9:15) Pingo en oloko kit meno?

² Paulo onongo ngeyo ni meno cikke ducu mamwonya pa Lubanga bicobbe pi dyero kwo pa Kricito ma pe ki roc-ci. (Kwan 2 Jo Korint 1:20.) Pi meno ‘motte maber ma pe wacce-ni’ onongo bikwako jami ducu mabeco kacel ki mar ma pe lokke ma Jehovah onongo binyuto botwa kun tiyo ki Yecu. Ki lok ada, mot man onongo tye me ur adada ma dano adana onongo pe twero titone ducu. Nongo mot ma kite dok pat kumeno myero ogudwa nining? Mot man myero ocuk cwinywa me timo gin ango ka wayubbe me kwero Nipo me to pa Kricito ma bibedo i Ceng Adek, Marci 23, 2016?

3, 4. (a) I winyo nining ka ngat mo omini mot? (b) Ka kimini mot mo ma pire tek twero loko kwoni nining?

³ Labongo akalakala, ka kimini mot mo ibibedo ki yomcwiny madit. Ento, mot mogo pigi romo bedo tek adada ma gitwero loko kwowa kulu. Me labolle, go kong ni gingolo kop me to i wi pien itimo bal mo madit. Cutcut ngat mo ma pe ingeyo okatti ki i kin lwak ci ojalle pire kene kun ye ni giket pwod ma gingolo-ni i wiye. En ojalle pire kene me to piri! Mot madit kuman twero gudo in nining?

⁴ Kodi mar ma kit meno twero weko i cako ngiyo jami ma itimo ki bene twero konyi me loko kit yo me kwoni. Man twero tugo cwinyi me bedo ngat ma cinge yot, lamar bot jo mukene ki dok me timo kica bot jo ma gucwero cwinyi. Pi kwoni ducu, i biwinyo calo i tye ki banya pa ngat ma ojalle piri-ni.

5. I yo ango ma mot pa Lubanga me ginkok-ki dit kato mot mo keken?

⁵ Ento mot ma Jehovah omiyowa kun tiyo ki Kricito dit kato ma kitito i labol meno. (1 Pet. 3:18) Tam kong pingo. Pi bal ma walako, kingolo kop me to i wi wan ducu. (Rom. 5:12) Ki cwiny me mar, Jehovah oketo yub pi Yecu me bino i lobo wek ‘obil to pi jo ducu.’ (Ibru 2:9) Jehovah pe olaro kwowa i kareni keken ento oketo bene yub me jwayo gin ma okelo to woko matwal. (Ic. 25:7, 8; 1 Kor. 15:22, 26) Jo ducu ma giketo niye i kom Yecu gibinongo kwo ma pe tum kun gibedo ki kuc dok ki yomcwiny i lobo macalo jo ma mine ite Ker pa Lubanga ma Kricito loyo, nyo pi jo ma kiwirogi, gibibedo luloc kacel ki Yecu i Ker meno. (Rom. 6:23; Yabo 5:9, 10) Adwogi maber ango mukene ma tye i mot man ma Lubanga omiyo-ni?

6. (a) I kin mot ma Jehovah omiyo-ni mic ango ma itye ka kurone? (b) Tit jami adek ma mot ma Lubanga omiyo-ni bicuko cwinywa me timone.

⁶ Mot pa Jehovah kwako cango twowa ducu, loko lobowa me doko paradic, ki dong cero jo muto. (Ic. 33:24; 35:5, 6; Jon 5:28, 29) Labongo akalakala mo, wamaro Jehovah kacel ki Wode me amara pi miyowa “motte maber ma pe wacce.” Kadi bed kumeno, lapeny pud tye ni, Mar pa Lubanga myero otug cwinywa me timo ngo? Kong wanenu kit ma mar pa Lubanga tugo kwede cwinywa (1) me lubo lanen pa Yecu Kricito macok, (2) me nyuto mar bot utmegiwa, ki dong (3) me timo kica ki cwinywa ducu.

7, 8. Myero wawiny nining i kom mar pa Kricito, dok man myero otug cwinywa me timo ngo?

⁷ Me acel, mar pa Lubanga myero otug cwinywa me kwo pi Yecu Kricito. Lakwena Paulo owaco ni: “Mar pa Kricito loyo kwowa.” (Kwan 2 Jo Korint 5:14, 15.) Paulo onongo ngeyo ni meno ka waniang ni Yecu tye ki mar madit piwa ci man bicuko cwinywa me maro en. Ka waniang gin ma Lubanga otimo piwa dok mar meno gudo cwinywa, ci wabibedo ki miti me dyero kwowa ki cwinywa ducu pi Yecu Kricito. Watwero nyuto miti meno nining?

⁸ Mar pi Jehovah miyo jone gilubo lanen pa Kricito, kun gilubo kore macok. (1 Pet. 2:21; 1 Jon 2:6) Wanyuto marwa pi Lubanga ki Kricito ka wabedo luwiny. Yecu owaco ni: “Ngat ma tye ki cikka, ma gwokogi, en aye ngat ma mara; ngat ma mara Wora bimare, an bene abimare, abinyutte kena bote.”​—Jon 14:21; 1 Jon 5:3.

9. Dic ango ma warwatte kwedgi?

 ⁹ I kare me Nipo, bedo ber ka walwodo yo me kwowa. Penye kekeni ni: ‘I yo mene me kwona ma atye ka lubo kwede ki lanen pa Yecu Kricito? Kabedo mene ma myero ayubi?’ Pire tek me ngine i yo meno pien kare ducu warwatte ki dic me lubo yo me lobo-ni. (Rom. 12:2) Ka pe wagwokke, ci watwero doko lulub kor luryeko nyo jo muywek kacel ki lutuko ma gingene me lobo-ni. (Kol. 2:8; 1 Jon 2:15-17) Watwero cung matek i kom dic magi nining?

10. Lapeny mene ma waromo penye kwedgi i kare man me Nipo-ni, dok lagamgi bitugo cwinywa me timo ngo? (Nen cal ma tye i pot karatac 12.)

¹⁰ Watwero tic ki kare me Nipo me ngiyo bongiwa, vidio ma wanenogi, wer ma wawinyo, nyo bene jami ma wagwokogi i kompiuta ki cim cing. Ka itye ka ngiyo bongini, penye kekeni ni: ‘Tika onongo abibedo agonya me ruko bongo man ka onongo atye ka cito ka ma Yecu bene bibedo iye?’ (Kwan 1 Temceo 2:9, 10.) ‘Ka ce aruko, tika binen bot dano ducu ni atye lalub kor Yecu Kricito?’ Watwero bene penye ki lapeny macalo magi ka odok i kom vidio ki wer ma wayerogi. ‘Tika cwiny Yecu onongo bibedo yom me neno vidio nyo winyo wer man? Ka olego cim cing ma mega, lewic tika bimaka pi jami ma en binenone?’ Ka itye ka neno lok madok i kom tuku me vidio, penye kekeni ni: ‘Tika bibedo tek me tito ki Yecu pingo amaro tuku man?’ Mar pi Jehovah bimiyo wabolo gin mo keken ma pe opore pi lalub kor Kricito kadi bed ni welgi tek adada. (Tic 19:19, 20) Wakwonge i kare me dyerewa ni pe wabikwo piwa kenwa ento pi Kricito. Pi meno, myero pe wamok calo okwodo i kom jami mogo ma twero gengowa me lubo kor Kricito.​—Mat. 5:29, 30; Pil. 4:8.

11. (a) Marwa pi Jehovah gin ki Yecu cuko cwinywa nining i tic me Pwony? (b) Mar ma watye kwede twero cuko cwinywa nining me konyo jo mukene i kacokkewa?

¹¹ Marwa pi Yecu biterowa me tic ki cwinywa ducu i tic me tito kwena ki loko dano me doko lulub kor Yecu. (Mat. 28:19, 20; Luka 4:43) I kare me Nipo, wabibedo ki kare me tic calo painia pi tutunu kun nongo watero cawa 30 nyo 50 i tic me tito kwena. Tika itwero keto yub me timo meno? Omego mo ma tye ki mwaka 84 dok bene dakone dong oto woko onongo tamo ni pe itwero tic calo painia pi tutunu pi mwakane kacel ki yot kome. Kadi bed kumeno, painia mogo ma gibedo cok kwede guketo yub me konye. Gunonge giwot dok guyere wang tic macok ma en twero tic i iye, wek ocob yubbe me tic pi cawa 30. In tika itwero jalle me konyo ngat mo ki i kacokke-ni wek onong yomcwiny ma bino pi tic macalo painia pi tutunu i kare me Nipo? Ngene kene ni, pe jo ducu gitwero tic macalo painia pi tutunu. Kadi bed kumeno, watwero tic ki kare mo keken ma ononge kacel ki kerowa me medo malo rwom me ticwa pi Jehovah. Ka watimo kit meno, nongo watye ka lubo lanen pa Paulo ma bene mar pa Kricito aye otugo cwinye. Mar pa Lubanga dok bitugo cwinywa me timo gin ango mukene?

12. Mar pa Lubanga cuko cwinywa me timo gin ango?

¹² Me aryo, mar pa Lubanga bicuko cwinywa me nyuto mar pi utmegiwa. Lakwena Jon bene oniang lok man. En ocoyo ni: “Lurema, ka Lubanga dong omarowa kit man, wan bene myero wamarre  kekenwa.” (1 Jon 4:7-11) Ki lok ada, pe watwero wacone ni wamaro Lubanga kun nongo pe wamaro utmegiwa. (1 Jon 3:16) Watwero nyutone nining ni wamaro jo mukene?

13. Labol ango ma Yecu oweko inyuto mar i kom jo mukene?

¹³ Tam kong i kom labol pa Yecu. I kare ma tye i ticce me pwony i lobo, en oketo cwinye i kom jo ma rwomgi lapiny. En okonyo jo ma onongo gitye ki goro​—lungolo, luto wang, luding it ki jo ma te lebgi oto. (Mat. 11:4, 5) Yecu okwanyo kare me pwonyo jo ma onongo kec nekogi i yo me cwiny kadi bed lutela dini pa Lujudaya onongo terogi ni gubedo jo ma “gicenogi.” (Jon 7:49) En omarogi dok otiyo matek me pwonyogi.​—Mat. 20:28.

14. Gin ango ma in itwero timone me nyuto mar pi utmegini?

¹⁴ Kare me Nipo biminiwa kare me lubo lanen pa Yecu ka wakwanyo cawa me bedo kacel ki utmegiwa i kacokke. Ka itimo kit meno, labongo akalakala mo olo to ibineno jo mogo ma gitwero nongo adwogi maber ki i cwiny me mar meno ma inyuto-ni. Twero bedo ni tye omege kacel ki lumege mogo ma gimito kony. Tika itwero limo jo magi? Tika itwero minigi cam, konyogi ki tic me ot, terogi i cokkewa, nyo bene tic kwedgi i ticwa me pwony? (Kwan Luka 14: 12-14.) Omyero wawek mar pa Lubanga aye odorwa me konyo ki nyuto mar pi utmegiwa.

15. Ngo ma myero wange?

¹⁵ Me adek, mar pa Jehovah cuko cwinywa me timo kica bot omegiwa kacel ki lumegiwa. Wan ducu macalo lutino pa Adam, walako bal kacel ki adwogine to. Ngat mo pe tye ma twero wacone ni, “Pe amito ginkok.” Kadi wa ngat ma dong lagen loyo pud mito kica pa Jehovah ma woko ki i Kricito. Wan ducu myero wange ni meno kitimiwa kica pi bal madit ma walako. Pingo man pire tek? Lagamme nongo i carolok mo acel ma Yecu obolo.

16, 17. (a) Gin ango ma myero wapwony ki i carolok ma Yecu obolo i kom kabaka ki luticce? (b) Imoko tammi dong me timo gin ango i nge lwodo lok i kom carolok ma Yecu obolo-ni?

¹⁶ Yecu otito kit ma kabaka mo otimo  kwede kica bot laticce mo ma onongo tye ki banyane me talanta 10,000 nyo denari 60,000,000. Ento latic ma kitimme kica pi banya madit-ti onongo pe mito timo kica pi banya mo matidi me denari 100 ma lawote onongo tye kwede. Kabaka cwinye ocwer adada i kare ma oniang col cwiny pa laticce ma etimme kica-ni. Kabaka owaco ni: “In latic marac! Aweki banya ca woko ducu pien onongo ilega kun ibako dogi bota; onongo in bene pe kica twero maki i kom latic lawoti-nu, kit macalo onongo kica omaka i komi-ni?” (Mat. 18:23-35) Ki lok ada, cwiny me kica pa kabaka-ni myero onongo bene ocuk cwiny laticci me timo kumeno. I yo acel-li, mar ki kica pa Jehovah myero ocuk cwinywa me timo gin ango?

¹⁷ Kare me Nipo biminiwa kare me neno ka ce tye kiniga mo ma wamako i cwinywa i kom omegiwa kacel ki lumegiwa. Ka tye kumeno, ci man pud dong bibedo kare maber ya me lubo lanen pa Jehovah, ma tye atera me ‘weko bal pa dano.” (Nek. 9:17; Jab. 86:5) Ka wabedo ki pwoc pien Jehovah oweko banyawa madit-ti, ci man biweko bene watimo kica ki jo mukene ki cwinywa ducu. Pe watwero bedo ki mar kacel ki kica pa Lubanga nikwanyo ka wanyuto mar dok watimo kica bot jo mukene. (Mat. 6:14, 15) Kadi bedo ni meno timo kica pe biloko jami ma otimo angec, ento biweko wabedo ki anyim maber.

18. Mar pa Lubanga okonyo lamego mo acel me diyo cwinye i kom i roc pa lamego mukene nining?

¹⁸ Pe yot ki wan ducu me ‘diyo cwinywa’ nino ki nino i kom goro pa omegiwa kacel ki lumegiwa? (Kwan Jo Kolocai 3:13, 14; Jo Epeco 4:32.) Me labolle, Lily lamego ma wiye nono okonyo dato mo ma nyinge Carol i kacokkene. ^[1] Lily onongo konyo Carol ki giwot, tic matino tino me gang, dok bene onongo nyuto cwiny me kica i yo mapol mapat pat. Kadi bed ni Lily onongo timo jami magi ducu, Carol kare ki kare pud obedo ka keto gingi dok oweko tic kwede onongo tek adada. Kadi bed kit meno, Lily obedo ka keto cwinye i kom kit mabeco ma Carol onongo tye kwede. En omedde ki konye pi mwaki mapol nio ka kome odoko lit matek ka lacen oto. “Medo i kom meno,” Lily owaco ni, “Atye ki miti madit me rwatte ki Carol i kare me nicer. Amito ni angeye ma nongo dong pe ki roc.” Ada, mar pa Lubanga twero weko wadiyo cwinywa i kom omegiwa ki lumegiwa dok miyo wabedo ki miti madit me rwatte kwedgi i kare ma nongo dano ducu dong pe ki roc.

19. ‘Mot maber ma pe wacce’ pa Lubanga-ni bicuko cwinyi nining?

¹⁹ Ki lok ada pud dong wanongo ‘mot maber ma pe wacce’ ya ki bot Jehovah. Omyero watero mot man calo gin ma pire tek adada. Tutwalle i kare man me Nipo-ni, myero walwod lok kun wanyuto pwocwa i kom jami mabeco ma Jehovah gin ki Yecu gutimo piwa. Ada, margi myero ocuk cwinywa me lubo lanen pa Yecu kore ki kore, nyuto mar bot omegiwa ki dok timo kica botgi ki cwinywa ducu.