I pwony meno, waniang ni tye lok mo acel ma pire tek adada ma gudo dano ki lumalaika ducu. Meno aye lok ma kwako lonyo nying Jehovah. Lok me lonyo nying Jehovah pire tek pien Catan okelo pyem ka ce yo me loc pa Jehovah aye ber loyo. Marom aroma, lok man bene kubbe ki lok me gwoko genne pa dano bot Lubanga.

Pingo dong i kare-ni wawaco ni lok ma pire tek loyo cung i kom lonyo nying Jehovah? Kong wanenu tyen lok adek.

Mukwongo, i poto me Eden, Catan obalo nying Jehovah. Lapeny ma Catan openyo ki Kawa oweko onen lapiny lapiny ni Jehovah cinge pe yot dok keto cik ma lubone tek pi Luticce. I nge meno, Catan owaco olungtuke pa gin ma Jehovah owaccigi. En owaco ni Lubanga obedo lagoba. Pi meno, en obalo nying Jehovah. En odoko ‘Larac-ci,’ ma te lokke ni “lagoba.” (Jon 8:44; Yabo 12:9) Pien Kawa oye goba pa Catan, Kawa ojemo i kom Lubanga ma meno onyuto ni en pe mito ni Lubanga obed lalocce. (Acak. 3:1-6) Nio wa i kare-ni, Catan pud tye ka medde ki tito lok goba i kom Jehovah. Jo ma giye kit goba macalo meno pol kare pe gibedo luwiny bot Jehovah. Dong bot jo pa Lubanga, goba ma kiwaco i kom nying Jehovah aye goba marac loyo. Meno aye tyen lok madit mumiyo lobo opong ki deno can.

Me aryo, me kelo adwogi maber bot dano ki lumalaika, Jehovah omoko tamme me lonyo nyinge. Meno aye lok ma pire tek loyo bot Jehovah. Pi meno en owaco ni: “Abinyuto kit ma nyinga leng kwede.” (Ejek. 36:23) Dok Yecu onyuto ni meno omyero obed gin ma pire tek loyo i lega pa lutic pa Jehovah ma lugen i kare ma en owaco ni: “Giwor nyingi maleng.” (Mat. 6:9) Baibul nyuto tere tere kit ma keto deyo i kom nying Jehovah pire tek kwede. Nen kong labol mogo manok: “Wumi deyo bot Rwot [Jehovah] muporo nyinge.” (1 Tekwaro 16:29; Jab. 96:8) “Wuwer wer pi pako deyo me nyinge.” (Jab. 66:2) “Abibedo ka miyo deyo boti kun atuco nyingi nakanaka.” (Jab. 86:12) I kare mo ma Jehovah oloko ki i polo ci dwane owinye i ot pa Lubanga ma i Jerucalem, Yecu onongo olego ni: “Abana, ket deyo i kom nyingi.” Ci Jehovah ogamo ni: “Dong aketo deyo i kome, dok abiketo aye.”—Jon 12:28. a

Me adek, yub pa Jehovah tye ni omyero kimedde ki pako nyinge maleng-ngi nakanaka. Tam kong: Ngo ma bitimme i nge atematema me agikki ma bibedo tye i agikki me Mwaka Alip Acel me Loc pa Kricito? Tam ango ma lumalaika ki dano ducu gibibedo kwede i kom nying Jehovah? Me konyowa  gamo lapeny meno, myero wiwa opo i kom lok aryo ma gical acala—gwoko genne pa dano ki twero me loc pa Lubanga. Tika bimitte ni dano ma gunyuto ni gin lugen pud gukemme ki ariya me gwoko gennegi? Pe. Nongo dong gitye labongo roc pien kityeko temogi woko. Gibinongo kwo ma pe tum. Medo i kom meno, pe dong bimitte ni kinyut ni yo me loc pa Jehovah aye ber loyo. I kare meno, jo ducu ma tye i polo ki lobo gibinote kun giye loc pa Jehovah. Ento i kare meno, tika nying Jehovah pud bibedo gin ma pire tek loyo bot jone?

I kare meno, dano ducu gibingeyo lok ada i kom Jehovah dok nyinge nongo dong kilonyo woko matwal. Kadi bed kit meno, nying Jehovah bimedde ki bedo gin ma pire tek loyo bot luticce i polo ki lobo. Pingo? Pien gibineno kit ma Jehovah medde kwede ki timo jami me aura dok mamwonya. Tam kong i kom lok man: Ki mwolo madit, ka Yecu odwoko cen loc ducu bot Jehovah, Lubanga bicoko “jami ducu i te locce.” (1 Kor. 15:28) I nge timo meno, jo ducu ma bedo i lobo gibinongo “deyo ma gimiyo ki litino pa Lubanga.” (Rom. 8:21) Dok Jehovah bicobo yubbe me ribo litinone ma i polo ki lobo kacel calo jo me ot acel.—Ep. 1:10.

I nge timme pa jami magi ducu, jo me ot pa Jehovah ma i polo ki lobo gibiwinyo nining? Labongo akalakala mo, pud wabibedo ki miti matek me pako nying Jehovah. Lubanga oweko Daudi ocoyo ni: “Gipwo Rwot [Jehovah], Lubanga . . . Gipak nyinge me deyo-ni nakanaka.” (Jab. 72:18, 19) Wabimedde ki nongo tyen lok me timo meno pi naka.

Nying Jehovah cung pi jami ducu madok i kome. Ka watamo i kom nying Jehovah, watamo i kom marre. (1 Jon 4:8) Kare ducu wiwa bibedo ka po ni Jehovah ocweyowa pien marowa dok omiyo ginkok pien marowa. Dok wiwa bibedo ka po ni kare ducu yone me loc tye atir dok nyuto mar. Ento wabimedde ki neno kit ma Jehovah nyuto kwede mar bot cwecce. Wabinyikke cok kwede macalo Wonwa kun wawero wer me pako nyinge me deyo-ni.—Jab. 73:28.