Lubanga Jehovah * aye ocako te yub me nyom. Baibul tittiwa ni Lubanga ocweyo dako mukwongo ci ‘okelo bot laco.’ Ki yomcwiny Adam owacci: “Man aye cogo mua i cogona kikome, ki ringo bene mua ki i ringona kikome.” (Acakki 2:22, 23) Jehovah pud mito ni jo munyomme gubed ki yomcwiny.

Ka pud inyomme anyoma iromo tamo ni jami ducu biwot maber. I ada, kadi wa laco ki dako ma gimarre mada olo gibinongo ayelayela mo i kwogi me ot. (1 Jo Korint 7:28) I brocuwa man, ibinongo pwony me Baibul ma ka ilubo bikelo yomcwiny i nyomwu ki i kwo me otwu.—Jabuli 19:8-11.

GIN MA BAIBUL WACO: Laco aye lawi ot.—Jo Epeco 5:23.

Macalo lawi ot, Jehovah geno ni myero igwok dakoni ki mar. (1 Petero 3:7) En omiyo dakoni me bedo lakony boti dok mito ni iket deyo i kome kun imare. (Acakki 2:18) Myero imar dakoni mada kun ibedo atera me keto mitine mukwongo.—Jo Epeco 5:25-29.

Ka itye dako munyomme, Jehovah mito ni iwor cwari dok ikonye me cobo ticce. (1 Jo Korint 11:3; Jo Epeco 5:33) Cwak tam ma en katti kwede ki cwinyi ducu dok wuti kacel. (Jo Kolocai 3:18) Ka itimo meno, ibibedo mwonya i nyim cwari ki Jehovah.—1 Petero 3:1-6.

GIN MA ITWERO TIMONE:

• Peny luoti kit ma itwero medde ki bedo laco nyo dako maber. Winy lok ki diro, ci iyub ka ma mitte

• Di cwinyi, pien niang kit me yomo cwiny lawoti bitero kare

GIN MA BAIBUL WACO: Myero ipar pi miti pa lawoti. (Jo Pilipi 2:3, 4) Ter lawoti calo ngat ma pire tek, kun wi opo ni Jehovah mito ni luticce gubed jo ma ‘lukica bot dano ducu.’ (2 Temceo 2:24) “Lok pa ngat ma pe ki tam winnye malit macalo pala lucwan ka ocobo dano, ento lok ma a ki i leb ngat maryek twero cango dano.” Pi meno yer lokki maber. (Carolok 12:18) Cwiny pa Jehovah bikonyi me lok ki kica kacel ki mar.—Jo Galatia 5:22, 23; Jo Kolocai 4:6.

GIN MA ITWERO TIMONE:

• Leg bot Jehovah pi cwiny ma opye mot wek ibed ki neno matir ka itye ka nyamo lok matego ki luoti

• Tam matut i kom gin ma ibiwaco ki kit me wacone

GIN MA BAIBUL WACO: I nge nyomme, wudoko “kom acel” ki luoti. (Matayo 19:5) Ento wun pud wutye dano aryo, dok tamwu nongo bedo patpat. Pi meno, omyero wupwony kit me bedo ma wuribbe kacel i cwinywu ki i tamwu. (Jo Pilipi 2:2) Ribbe kacel pire tek ka wutye ka moko tam. Baibul wacci: “Yub ducu cobbe maber ka kong ityeko nongo tam mabeco muromo.” (Carolok 20:18) Wuwek pwony me Baibul otirwu ka wutye ka moko tam ma pigi tego kacel.—Carolok 8:32, 33.

GIN MA ITWERO TIMONE:

• Pe itit ki luoti ngec nyo tam keken, ento bene kit ma iwinyo kwede

• Peny tam pa luoti ma peya imoko me timo gin mo