Adongo i kabedo mo ma opong ki lucan ma gitiyo tic ma rwomme lapiny. Kwo onongo tek. Pe angeyo mama kikome dok wat i kinwa ki babana onongo pe tye maber. Apwonnye me kwo pekopeko.

Ma ao mwaka apar, onongo dong acako kwalo jami pa jo mukene. Ma atye mwaka 12, angweco woko ki gang pi tyen mukwongo. Pi tyen makato acel, babana ogamo ki i opic pa abili me dwoka gang. Onongo amaro daa ki dano​—onongo amaro tim gero dok cwinya kec i kom ngat mo keken. Angweco woko matwal ki gang ma atye mwaka 14. Ci acako tic ki yadi calo jayigi-ni dok onongo alak ata i kin piny. Onongo aturo doggola me mutoka pa dano ci abuto iye wa odiko pien ape ki kabuto. Ka aa ayenyo ka ma pii twero nonge iye wek alwoke.

Adoko twon lakwor adada​—dok onongo akwalo gin mo keken, cakke ki i yuto kicaa pa dano wa i yako odi pa dano i dyewor. Nyinga oballe adada dok ma pe otero kare malac, gurup pa lutim aranyi mo gulwonga ni adony i gurupgi, man oweko acako yako cente wa i beng. Pi kita ma onongo rac tutwal-li, dano me gurup man gucako wora adada i nge kare manok. Onongo pe acito ka mo keken labongo mudukuna; ki lok ada, onongo abuto kwede i te laten wiwa. Tim gero, tic ki yadi calo jayigi-ni, kwor, tic ki leb macilo, ki dong tim tarwang odoko kit me kwona. Kare ducu nongo abili tye ka yenya. Abili gumaka tyen mapol, dok abedo i buc tyen mapol, pi mwaki mapol bene.

I kare mo ma kigonya ki i buc, acito ka limo lamin mamana. Onongo pe angeyo ni en kacel ki lutinone aryo dong gitye Lucaden pa Jehovah. Gin gulwonga me cito i cokke pa Lucaden. Amoko tamma me cito kacel kwedgi pien onongo amito niang kit ma cokkene bedo kwede. Ma wao i Ot me Ker, awaco ni amito bedo cok ki doggola pien onongo amito neno dano ducu ma donyo i ot ki ma gikato woko. Ngene kene ni onongo atye ki mudukuna.

Cokke meno oloko kwona. Wiya po ni abedo ka tamone ni nen calo atye ka ma pat ki lobo. Dano ducu gumota ki yomcwiny dok ki bwunyo. Wiya pud po ni wang Lucaden magi onongo opong ki kica dok ginen calo jo ma genne. Man onongo dok pat adada ki kwo ma angi kwede-ni!

Acako kwano Baibul ki Lucaden. Ka ngecca woto ki medde, acako niang bene ni myero alok kwona kwicikwici. Aketo i tic lok ma kicoyo i Carolok 13:20: “Ngat ma bedo kacel ki jo maryek pwonnye doko ryek bene, ento ngat ma mako lurem ki luming kite biballe woko.” Aniang ni omyero awek gurup pa lutim aranyi ma atye iye-ni. Pe obedo yot me timo meno, ento ki kony pa Jehovah aweko gurup meno.

Ajuko bene jami maraco ma onongo atimogi-ni. Atute matek ci ajuko mato taa ki yadi ma onongo atiyo kwedgi. Alyelo yer wiya maber, dok abolo gin-it ducu ma onongo arukogi, ajuko bene tic ki leb macilo. Pi tyen mukwongo i kwona, acako bedo ki twero me loyo jami ma atimogi.

Pe onongo amaro kwan wacon, dok onongo pe yot me keto cwinya ka atye ka kwano Baibul. Ento, atute matek ci motmot acako maro Jehovah, dok kit ma awinyo kwede bene ocako lokke​—cwiny ma ngola kop ocako pida. Onongo atye ki akalakala ka ada Jehovah twero timma kica pi jami maraco ducu ma atimo. Ka atye ka winyo kit meno, onongo anongo kwecwiny madit ka akwano lok i kom kit ma Jehovah otimo kwede kica bot Kabaka Daudi i nge timo bal madit adada.​—2 Camuel 11:1–12:13.

Gin mukene ma obedo tek adada me timone aye tito pi niyena bot jo mukene i ot ki ot. (Matayo 28:19, 20) Onongo atye ki lworo ni atwero rwatte ki ngat mo ma awano nyo ma atimo gin mo marac i kome i kare mukato angec! Ento motmot, lworo meno orweny woko. Dok acako nongo yomcwiny me ada ka atye ka konyo jo mukene me pwonyo lok i kom Wonwa me polo ma timo kica ki cwinye ducu.

Pwonyo lok i kom Jehovah olaro kwona! Pol pa luwota ma onongo abedo kwedgi con dong guto woko dok mukene gitye i buc, ento atye ki yomcwiny me ada dok ki gen pi anyim mamwonya. Apwonnye me bedo ngat ma mwol dok ma lawiny ki me juko kinigana. Macalo adwogine, atye ki wat maber ki jo mukene. Atye ki yomcwiny i kwo me otwa kacel ki dakona me amara, Carmen. Wanongo yomcwiny madit i konyo jo mukene me pwonyo lok me Baibul.

Dok atiyo tic ma genne i kare-ni​—i kine mukene wa i beng, ento me ka yako cente me beng, adunyo adunya!