Ododo 67

Yekocapat Geno Jehovah

IN INGEYO co magi kacel ki gin ma gitye ka timone? Gin gitye ka cito i lweny, dok co ma anyim-mi gitye ka wer. Ento in itwero penyo ni: ‘Pingo luwer-ri pe gitye ki pala lucwan kacel ki tong me lweny?’ Wanenu kong.

Yekocapat aye kabaka me ker me kaka aryo pa Icrael. En okwo i kare pa Kabaka Akab ki Jejebel me ker me kaka 10 ma kumalo-ni. Ento Yekocapat obedo kabaka ma kite ber, dok wonne Aca onongo bene obedo kabaka maber. Pi meno jo me ker me kaka aryo ma kupiny-nyi gubedo ki kwo maber pi mwaka mapol.

Ento kombeddi gin mo otimme ma omiyo dano gudoko lwor. Lukwena gukelo lok bot Yekocapat ni: ‘Mony madwong tye kabino ka lweny i komi ma gua ki i lobo Moab, Ammon ki Got Ceir.’ Jo Icrael mapol gucokke i Jerucalem me kwayo kony ki bot Jehovah. Gin gucito i ot pa Lubanga, ci ki kunnu Yekocapat olego ni: ‘Ai Jehovah Lubangawa, wan pe wangeyo gin me atima. Wan pe watwero lweny i kom lwak dul mony man. Wan wakwayo kony ki boti.’

Jehovah owinyo, ci en oweko laticce mo acel otito bot lwak ni: ‘Lweny-nyi pe mewu, ento pa Lubanga. Wun pe wubilweny. Ciku wangwu, wek wunen kit ma Jehovah bilarowu kwede.’

Pi meno odiko orwone Yekocapat owaco bot lwak ni: ‘Wubed ki gen i kom Jehovah!’ En dong oketo luwer i nyim lumonnye, ma gidore anyim kun giwoto ki wero wer pak bot Jehovah. In ingeyo gin mutimme i kare ma guo cok ki dog lweny? Jehovah omiyo lumony ma lukworgi gulwenyo i kin-gi keken-gi. Dong i kare ma jo Icrael guo, lumony ma lukworgi ducu onongo dong guto woko.

Yekocapat onongo pe ryek tutwal me geno Jehovah? Wan wabibedo ryek ka wageno En bene.

1 Luker 22:41-53; 2 Tekwaro 20:1-30.