•  Marito Yo Pfula 2

•  Leswi Hi Swi Dyondzaka eBibeleni 3-5

  •  Mbulavulo 3

  •  Endla Ndzavisiso 4

  •  Ku Hlayiwa Ka Bibele 5

•  Ndzetelo Wa Ntirho Wo Chumayela 6-14

  •  Ku Sungula Mabulo 7

  •  Ku Landzelerisa 8

  •  Ku Endla Vadyondzisiwa 9

  •  Ku Hlamusela Leswi U Pfumelaka Eka Swona 10

  •  Mbulavulo 11

  •  Leswi ku buriwaka hi swona 12

  •  Tindhawu 13

  •  Ndlela Yo Tirhisa Tivhidiyo Ni Mikandziyiso 14

•  Mahanyelo Ya Vakreste 15-16

  •  Dyondzo Ya Bibele Ya Vandlha 16

•  Marito Yo Pfala 17

 Ku Bumabumela Ni Ndzayo 18

•  Nkarhi 19

•  Riendzo Ra Mulanguteri Wa Muganga 20

•  Vhiki Ra Nhlengeletano Ya Muganga Kumbe Ya Xifundzha 21

•  Vhiki Ra Xitsundzuxo 22

•  Mulanguteri Wa Nhlengeletano Ya Mahanyelo Ni Ntirho Wo Chumayela 23

•  Mutshamaxitulu Wa Nhlengeletano Ya Mahanyelo Ni Ntirho Wo Chumayela 24

•  Mutsundzuxi Wa Vakulu Ni Malandza 25

•  Titlilasi Tin’wana 26

•  Tivhidiyo 27

1.  Swiletelo leswi nga eka dokumente leyi swi ta pfuna hinkwavo lava nga ni swiavelo eka Nhlengeletano ya Mahanyelo Ni Ntirho Wa Hina Wo Chumayela. Lava nga ni swiavelo va fanele va rhanga va kambisisa swiletelo leswi fambisanaka ni swiavelo swa vona eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela ni leswi nga eka dokumente leyi va nga se lunghiselela swiavelo sweswo. Kombelani vahuweleri hinkwavo leswaku va tsarisa va ta nyikela mimbulavulo eka tinhlengeletano leti. Van’wana lava taka nkarhi ni nkarhi etinhlengeletanweni ta vandlha va nga tsarisa loko va pfumela eka leswi Bibele yi swi dyondzisaka naswona va hanya tanihi Vakreste. Mulanguteri Wa Nhlengeletano Ya Mahanyelo Ni Ntirho Wo Chumayela, u fanele a bula ni loyi a nga ri ki muhuweleri hi leswi swi lavekaka loko a tsakela ku tsarisa naswona a n’wi byela loko a faneleka. Leswi swi fanele swi endliwa ku ri na loyi a dyondzaka na yena Bibele kumbe mutswari loyi a nga Mbhoni ya Yehovha. Swilaveko swa kona swi fana ni swa lava va tsakelaka ku va vahuweleri lava nga khuvuriwangiki.—od ndz. 8 ndzim. 8.

2. Minete yin’we. Endzhaku ka risimu ro pfula ni xikhongelo, mutshamaxitulu u ta chumbutela vayingiseri leswi ku nga ta dyondziwa hi swona. Mutshamaxitulu u fanele a dzika eka tinhla leti vandlha ri nga ta vuyeriwa swinene eka tona.

 3. Mbulavulo: 10 wa timinete. Nhlokomhaka leyi nga ni tinhla timbirhi kumbe tinharhu yi kumeka eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela. Mbulavulo lowu wu ta averiwa nkulu kumbe nandza wa vutirheli la fanelekaka. Loko ku sunguriwa buku leyintshwa ya Bibele eka ku hlaya ka Bibele ka vhiki rero, ku ta tlangiwa ni vhidiyo ya xingheniso xa buku yoleyo. Xivulavuri xi ta hlamusela ndlela leyi vhidiyo yi fambisanaka hayona ni nhlokomhaka. Kambe xi fanele xi tiyiseka leswaku xi ti hlanganisa kahle tinhla leti boxiweke eka xibukwana. Loko nkarhi wu pfumela, xi ta vulavulela swifaniso leswi fambisanaka ni mhaka leyi ku dyondziwaka hayona. Xi nga ha katsa ni rungula rin’wana ntsena loko ri fambisana ni tinhla leti nga eka mbulavulo.

 4. Endla Ndzavisiso: 10 wa timinete. Leri i bulo ra swivutiso ni tinhlamulo leri nga riki na xingheniso kumbe mahetelelo. Ri fanele ri fambisiwa hi nkulu kumbe nandza wa vutirheli la fanelekaka. Xivulavuri xi fanele xi vutisa vayingiseri swivutiso hinkwaswo. Nakambe, xi nga ha endla xiboho xa loko tindzimana leti kombisiweke ti fanele ti hlayiwa kumbe ti nga hlayiwi. Lava hlamulaka a va fanelanga va hundza tisekoni ta 30.

 5. Ku Hlayiwa Ka Bibele: 4 wa timinete. Mbulavulo lowu wu ta nyikeriwa hi xichudeni xa Bibele xa xinuna. Xichudeni xi fanele xi hlaya rungula leri xi averiweke rona handle ko tirhisa xingheniso kumbe mahetelelo. Mutshamaxitulu u ta pfuna lava hlayaka leswaku va hlaya kahle, va hlaya hi ndlela leyi twisisekaka, va khuluka, va kandziyisa mongo hi ndlela leyi faneleke, va cincacinca rito, va hefemula hi ndlela leyi faneleke ni ku hlaya hi ndlela ya ntumbuluko. Hikwalaho ka leswi tindzima tin’wana leti hlayiwaka eka ku hlayiwa ka Bibele ti nga koma kasi tin’wana ti leheke, mutshamaxitulu wa Nhlengeletano Ya Mahanyelo Ni Ntirho Wa Hina Wo Chumayela u fanele a rhanga a ehleketa hi vuswikoti bya xichudeni lexi a nga ta xi nyika mbulavulo wo hlaya.

6. 15 wa timinete. Xiyenge lexi xi endleriwe ku nyika hinkwavo nkarhi wo praktisa ku chumayela ni ku antswisa ndlela leyi va chumayelaka ni ku dyondzisa hayona. Vakulu na vona va nga ha averiwa mimbulavulo ya swichudeni loko swi fanerile. Xichudeni ha xin’we xi fanele xi tirhela eka dyondzo leyi xi averiweke yona ku nga ha va eka broxara leyi nge Tinyiketele Eku Dyondziseni kumbe leyi nge Rhandza Vanhu leyi kombisiweke etlhelo ka xiavelo xa xona eka Xibukwana Xa Mahanyelo Ni Ntirho Wo Chumayela. Mikarhi yin’wana, ku ta va ni mbulavulo lowu wu nga ta va bulo ni vayingiseri. Mbulavulo wolowo wu ta fambisiwa hi nkulu kumbe nandza wa vutirheli la fanelekaka.­ Loko swi ta eka ndlela yo hetisisisa xiavelo lexi, vona  ndzimana 15.

 7. Ku Sungula Mabulo: Xiavelo lexi xi nga ha endliwa hi xichudeni xa Bibele xa xinuna kumbe xa xisati. Mupfuni u fanele a va wa rimbewu leri fanaka kumbe xirho xa ndyangu. Xichudeni ni mupfuni wa xona va nga ha hlawula ku tshama kumbe ku yima. Leswaku u kuma leswi engetelekeke eka leswi ku buriwaka hi swona na ndhawu ya xiavelo lexi, vona  tindzimana 12 na  13.

 8. Ku Landzelerisa: Xiavelo lexi xi nga ha nyikeriwa hi xichudeni xa xinuna kumbe xa xisati. Mupfuni u fanele a va wa rimbewu leri fanaka. (km 5/97 tl. 2) Va nga ha endla xiavelo lexi va lo tshama kumbe va yimile. Xichudeni xi fanele xi kombisa ndlela yo landzelerisa eka bulo leri ri veke kona enkarhini lowu nga hundza.—Leswaku u kuma leswi engetelekeke eka leswi ku buriwaka hi swona na ndhawu ya xiavelo lexi, vona  tindzimana 12 na  13.

 9. Ku Endla Vadyondzisiwa: Xiavelo lexi xi nga ha nyikiwa xichudeni xa xinuna kumbe xa xisati. Mupfuni u fanele a va wa rimbewu leri fanaka. (km 5/97 tl. 2) Va nga ha endla xiavelo lexi va lo tshama kumbe va yimile. Xiyenge lexi xi fanele xi kombisa Dyondzo ya Bibele leyi yaka emahlweni. A ku laveki xingheniso kumbe ku dlayiseta handle ka loko xichudeni hi ku kongoma xi tirhela eka tin’wana ta tinhla toleto. A swi bohi ku swi hlayela ehenhla switirhisiwa hinkwaswo leswi u averiweke ku tirhela eka swona, hambileswi van’wana va nga hlawulaka ku endla tano.

 10. Ku Hlamusela Leswi U Pfumelaka Eka Swona: Loko ku ri mbulavulo, xiavelo lexi xi fanele xi nyikiwa makwerhu wa xinuna. Loko ku ri nkombiso, wu nga ha nyikiwa makwerhu wa xinuna kumbe wa xisati. Mupfuni u fanele a va wa rimbewu leri fanaka kumbe xirho xa ndyangu. Xichudeni xi fanele xi nyikela nhlamulo leyi baka nhloko ya mhaka hi ku tirhisa switirhisiwa leswi xi nyikiweke swona. Xichudeni xi nga ha hlawula ku tirhisa kumbe ku nga tirhisi switirhisiwa leswi xi averiweke ku tirhela eka swona.

 11. Mbulavulo: Xiavelo lexi xi ta nyikeriwa hi xichudeni xa xinuna tanihi mbulavulo evandlheni. Loko mbulavulo wu sekeriwe eka yinhla leyi humaka eka xiengetelo A xa broxara leyi nge Rhandza Vanhu, xichudeni xi fanele xi hlamusela ndlela leyi matsalwa wolawo ma nga tirhisiwaka hayona ensin’wini. Hi xikombiso, a nga ha hlamusela leswaku tsalwa ri tirha eka xiyimo xa njhani, leswi ri vulaka swona ni ndlela yo bula ha rona ni munhu un’wana. Loko mbulavulo wu sekeriwe eka tin’wana ta tinhla leti humaka eka ti dyondzo leti nga eka broxara leyi nge Rhandza Vanhu, xichudeni xi fanele xi dzika eka ndlela leyi tinhla ti nga tirhisiwaka hayona ensin’wini. A nga ha vulavula hi xikombiso lexi nga eka yinhla 1 ya dyondzo kumbe a tirhisa man’wana ya matsalwa lama nga kona eka dyondzo yoleyo, loko swi pfuna.

   12. Leswi ku buriwaka hi swona: Switirhisiwa leswi nga eka ndzimana leyi ni le ka leti landzeleka swi tirha eka swiavelo swa “Ku Sungula Mabulo” ni le ka “Ku Landzelerisa.” Handle ka loko swi kombisiwile, leswi xichudeni xi faneleke xi swi fikelela i ku avelana rungula ro olova ra le Bibeleni leri nga ntiyiso, leri khumbaka loyi xi vulavulaka na yena ni ku tlhela xi pfula ndlela yo bula na yena enkarhini lowu taka. Xichudeni xi fanele xi hlawula rungula leri nga enkarhini ni leri khumbaka vayingiseri va ndhawu yoleyo. Xichudeni xi nga hlawula ku tirhisa kumbe ku nga tirhisi minkandziyiso ni tivhidiyo leti nga eka Switirhisiwa Swo Pfuneta Ku Dyondzisa. Ematshan’wini yo kirema xingheniso, xichudeni xi fanele xi tikarhatela ku va mudyondzisi lonene hi ku kombisa xinghana ni ku vulavula hi ndlela ya ntumbuluko.

   13. Tindhawu: Xichudeni xi fanele xi tirhela eka xiavelo xa xona hi ku ya hi swiyimo swa le ndhawini ya ka vona. Hi xikombiso:

(1) Yindlu Ni Yindlu: Endlelo leri ri katsa ku chumayela hi yindlu na yindlu—ku nga ha va hi xiviri, hi foni kumbe hi papila ni ku tlhela hi landzelerisa eka bulo leri hi veke na rona nkarhi lowu nga hundza loko hi chumayela hi yindlu ni yindlu.

(2) Ku Chumayela Hi Xitshuketa: Endlelo leri ri hlamusela loko u pfulekela hi nkarhi wa ku cinca mabulo lama tolovelekeke kutani u chumayela. Swi nga ha katsa ku burisana ni vatirhikulobye entirhweni hi tsalwa ro karhi, exikolweni, vaakelani, eka swo famba swa mani na mani kumbe kun’wana na kun’wana laha u vaka u ri kona.

(3) Ku Chumayela Etindhwani Ta Mani Na Mani: Endlelo leri ri katsa ku chumayela hi xigolonyana, ku endzela vanhu etindhawini ta mabindzu, ku chumayela exitarateni, ku chumayela etiphakeni, laha timovha ti pakiwaka kona kumbe kun’wana ni kun’wana laha vanhu va nga kumekaka kona.

 14. Ku Tirhisa Ti Vhidiyo Ni Mikandziyiso: Hi ku fambisana na xiyimo, xichudeni xi nga ha hlawula ku tirhisa vhidiyo kumbe nkandziyiso. Loko xiavelo xa xichudeni xi katsa ku tirhisa vhidiyo kumbe xichudeni xi hlawula ku yi tirhisa, xi fanele xi endla xingheniso ni ku hlamusela vhidiyo yoleyo kambe xi nga yi tlangi.

15. Endzhaku ka risimu, timinete ta 15 leti landzelaka ta xiyenge lexi, ti ta va ni xiphemu xin’we kumbe swimbirhi leswi endleriweke ku pfuna vayingiseri ku tirhisa leswi Bibele yi swi dyondzisaka. Handle ka loko swi kombisiwile, swiphemu sweswo swi nga averiwa nkulu kumbe nandza wa vutirheli loyi a fanelekaka kambe loko ku ri swilaveko swa vandlha swi ta fambisiwa hi nkulu. Loko ku ri xiphemu xa bulo ni vayingiseri, xivulavuri xi nga ha vutisa swivutiso leswi engetelekeke eka leswi nga kona. Xivulavuri xi fanele xi komisa xingheniso xa xona leswaku xi ta kota ku va ni nkarhi lowu eneleke wo humesa tinhla nkulu ni leswaku vayingiseri va ta katseka hi xitalo. Loko ku ri mbulavurisano, va ta va endla kahle loko loyi ku burisaniwaka na yena a ri exitejini ematshweni yo va laha a tshameke kona, loko swiyimo swi pfumela.

  16. Dyondzo Ya Bibele Ya Vandlha: 30 wa timinete. Xiphemu lexi xi fanele xi averiwa nkulu loyi a fanelekaka. (Loko vandlha ri ri ni vakulu vatsongo, malandza ya vutirheli lama fanelekaka ma nga ha averiwa xiphemu lexi, loko swi fanerile.) Muhlanganisi wa huvo ya vakulu u fanele a kumisisa leswaku i mani a fanelekaka leswaku a nga fambisa Dyondzo Ya Bibele Ya Vandlha. Lava va fanelekaka va fanele va kota ku fambisa dyondzo hi nkarhi ni ku kandziyisa matsalwa nkulu ni ku pfuna vamakwerhu leswaku va twisisa nkoka wa tinhla leti ku buriweke ha tona. Lava fanelekaka va ta vuyeriwa loko va kambisisa nkongomiso lowu humesiweke mayelana ni ku fambisa swiphemu swa swivutiso ni tinhlamulo. (w23.04 tl. 24, bokisi) Endzhaku ka loko tinhla ta dyondzo ya vhiki rero ti hlanganile, a ku na xivangelo xo lehisa dyondzo. Loko swi koteka, vhiki rin’wana ni rin’wana ku fanele ku tirhisiwa va fambisi ni va hlayi vo hambanahambana. Loko mutshamaxitulu wa Nhlengeletano Ya Mahanyelo Ni Ntirho Wa Hina Wo Chumayela a kombela leswaku dyondzo yi komisiwa mufambisi u fanele a ti endlela xiboho xa leswaku u ta yi komisa njhani. A nga ha hlawula leswaku tindzimana tin’wana ti nga hlayiwi.

17. Timinete tinharhu. Mutshamaxitulu u ta pfuxeta tinhla ta nkoka leti ku buriweke ha tona siku rero. U fanele a chumbutela vandlha leswi nga ta dyondziwa vhiki leri landzelaka. A nga vula ni mavito ya vamakwerhu lava nga ta va ni swiavelo vhiki leri landzelaka loko nkarhi wu pfumela. Handle ka loko swi kombisiwile, switiviso leswi bohaka ni mapapila swi fanele swi hlayeriwa vandlha hi mutshamaxitulu loko a ri karhi a gimeta tidyondzo. Switiviso leswi tolovelekeke swo tanihi malunghiselelo ya nsimu ni ku basisa a swi fanelanga swi tivisiwa exitejini kambe swi fanele swi nameketiwa ebodweni ya switiviso. Loko switiviso ni mapapila lama faneleke ma hlayeriwa vandlha swi lehile, mutshamaxitulu u fanele a kombela vamakwerhu lava nga ni mimbulavulo eka xiyenge xa Mahanyelo Ya Vakreste leswaku va komisa mimbulavulo ya vona. (Vona  tindzimana 16 na  19.) Tidyondzo ti ta gimeta hi risimu ni xikhongelo.

18. Endzhaku ka loko xichudeni ha xin’we xi hetile xiavelo xa xona, mutshamaxitulu u ni minete yin’we yo bumabumela ni ku tsundzuxa xichudeni hi ku ya hi dyondzo leyi a xi averiwe eka yona. Loko mutshamaxitulu a tivisa mbulavulo wa xichudeni, a nge boxi dyondzo leyi xi tirhelaka eka yona. Hambiswiritano, loko xichudeni xi xi hetisisile xiavelo xa xona, mutshamaxitulu u ta xi bumabumela kutani a boxa dyondzo leyi a xi tirhela eka yona ivi a vula leswaku hikwalaho ka yini a vula leswaku xi endle kahle kumbe hikwalaho ka yini xi fanele xi tlhela xi tirhela eka dyondzo yoleyo. Mutshamaxitulu a nga boxa tinhla tin’wana leti a vonaka onge ti ta pfuna xichudeni kumbe vandlha leti a ti xiyeke loko xichudeni xi ri karhi xi hetisisa xiavelo xa xona. Xichudeni xi nga ha nyikiwa ndzayo yin’wana exihundleni leyi sekeriweke eka broxara leyi nge Rhandza Vanhu, broxara leyi nge Tinyiketele Eku Dyondziseni kumbe eka buku leyi nge Xikolo Xa Vutirheli endzhaku ka tidyondzo kumbe hi nkarhi wun’wana.—Leswaku u twisisa ntirho wa mutshamaxitulu wa Mahanyelo Ni Ntirho Wa Hina Wo Chumayela ni wa mutsundzuxi wa vakulu ni malandza, vona  tindzimana 19,  24 na  25.

19. A ku na xiphemu ni xin’we lexi faneleke xi hundza nkarhi lowu xi pimeriweke wona hambi ku ri mutshamaxitulu a nga fanelanga a tlurisa nkarhi lowu a nyikiweke wona. Hambileswi Xibukwana Xa Mahanyelo Ni Ntirho Wa Hina Wo Chumayela xi boxaka nkarhi lowu xiphemu ha xin’we xi faneleke xi hela ha wona, loko tinhla ta dyondzo yoleyo ti hlanganile a ku na xivangelo xo lehisa swi nga fanelanga leswaku u heta nkarhi lowu u nyikiweke wona. Loko lava va nga ni swiavelo va dya nkarhi, mutshamaxitulu wa Nhlengeletano Ya Mahanyelo Ni Ntirho Wa Hina Wo Chumayela kumbe mutsundzuxi wa vakulu ni malandza u fanele a va nyika ndzayo exihundleni. (Vona  tindzimana 24 na 25.) Tidyondzo hinkwato, ku katsa ni swikhongelo ni tinsimu swi fanele swi heta awara ni timinete ta 45.

20. Loko vandlha ri endzeriwe hi mulanguteri wa muganga, tidyondzo ti fanele ti fambisiwa hilaha swi hlamuseriweke ha kona eka Xibukwana Xa Mahanyelo Ni Ntirho Wa Hina Wo Chumayela handle ka leswi landzelaka: Dyondzo Ya Bibele Ya Vandlha a yi nge vi kona, yi ta siviwa hi mbulavulo wa mulanguteri wa muganga lowu nga ta teka 30 wa timinete. Emahlweni ka mbulavulo, mutshamaxitulu u ta pfuxeta leswi dyondziweke ni ku chumbutela vayingiseri leswi nga ta dyondziwa vhiki leri landzelaka, a tlhela a hlaya switiviso ni mapapila lama bohaka ku hlayeriwa vandlha, kutani endzhaku ka sweswo u ta vitana mulanguteri wa muganga. Endzhaku ka mbulavulo wa ntirho, mulanguteri wa muganga u ta gimeta tidyondzo hi risimu leri a ri hlawuleke. A nga ha vitana makwerhu un’wana leswaku a ta pfala hi xikhongelo. A ku na titlilasi leti faneleke ti khomiwa hi vhiki ra riendzo ra mulanguteri wa muganga. Ntlawa wu nga ha khoma tidyondzo ta wona hambi loko mulanguteri wa muganga a endzele vandlha rero. Hambiswiritano, ntlawa wolowo wu fanele wu hlangana ni vandlha hi nkarhi wa mbulavulo wa mulanguteri wa muganga.

21. Tidyondzo a ti nge vi kona hi vhiki ra nhlengeletano ya muganga kumbe ya xifundzha. Vandlha ri fanele ri tsundzuxiwa leswaku tidyondzo leti a ti fanele ti dyondziwa vhiki rero un’wana ni un’wana u fanele a tidyondzela tona a ri yexe kumbe ni ndyangu.

22. Loko Xitsundzuxo xi ri exikarhi ka vhiki, tidyondzo ta le xikarhi ka vhiki a ti nge vi kona.

23. Nkulu loyi a hlawuriweke hi huvo ya vakulu u ta va mulanguteri wa Nhlengeletano Ya Mahanyelo Ni Ntirho Wa Hina Wo Chumayela. U fanele a tiyiseka leswaku tidyondzo ti fambisiwa hi ndlela leyi hlelekeke ni hi ku landza nkongomiso lowu. Ku fanele ku va ni ku vulavurisana lokunene exikarhi ka yena ni mutsundzuxi wa vakulu ni malandza. Loko Xibukwana Xa Nhlengeletano Ya Mahanyelo Ni Ntirho Wa Hina Wo Chumayela se xi kumeka, mulanguteri wa Mahanyelo Ni Ntirho Wa Hina Wo Chumayela u fanele a ava swiavelo swa tinhlengeletano ta le xikarhi ka vhiki swa tin’hweti timbirhi. Leswi swi katsa ni swiavelo leswi nga riki swa swichudeni ni mutshamaxitulu wa nhlengeletano ya le xikarhi ka vhiki eka lava hlawuriweke hi huvo ya vakulu ku katsa ni swiavelo swa swichudeni. (Vona  tindzimana 3-16 na  24.) Loyi a avaka swiavelo loko a ri karhi a ava u fanele a tekela enhlokweni malembe ya swichudeni, ntokoto ni ntshunxeko wa ku vulavula emhakeni leyi ku buriwaka hayona. U fanele a endla hilaha ku fanaka ni le ka swiphemu leswin’wana swa nhlengeletano. Swiavelo swi fanele swi nyikiwa vamakwerhu ka ha sale mavhiki manharhu. Ku fanele ku tirhisiwa Fomo ya Xiavelo Xa Nhlengeletano Ya Mahanyelo Ni Ntirho Wa Hina Wo Chumayela (S-89) eka swiavelo swa swichudeni. Mulanguteri Wa Nhlengeletano Ya Mahanyelo Ni Ntirho Wa Hina Wo Chumayela u fanele a tiyiseka leswaku xiyimiso xa tinhlengeletano hinkwato xi namekiwa eka bodo ya switiviso. Huvo ya vakulu yi nga hlawula nkulu un’wana kumbe nandza wa vutirheli leswaku a n’wi pfuna. Hambiswiritano, i vakulu ntsena lava faneleke va tirhisiwa ku ava swiavelo swa swichudeni.

24. Vhiki ni vhiki, nkulu un’we u ta va mutshamaxitulu wa Nhlengeletano Ya Mahanyelo Ni Ntirho Wa Hina Wo Chumayela. (Laha ku nga ni nhlayo yitsongo ya vakulu, malandza ya vutirheli ma nga ha averiwa ku va mutshamaxitulu, loko ma faneleka.) U ni vutihlamuleri byo vula marito yo pfula ni yo gimeta. U tlhela a tivisa mimbulavulo hinkwayo naswona a nga tlhela a va ni mbulavulo wo karhi na yena, ngopfungopfu eka mimbulavulo leyi ku nga riki na bulo ni vayingiseri naswona ku ngo tlangiwa vhidiyo ntsena kambe swi ta ya hi ku, ku ni vakulu vangani evandlheni. A nga fanelanga a vulavula ngopfu loko tidyondzo ti ri karhi ti ya emahlweni. Huvo ya vakulu hi yona yi nga ta hlawula vamakwerhu lava fanelekaka kahle eka xiavelo lexi. Nkulu ha un’we la fanelekaka u ta averiwa ku va mutshamaxitulu nkarhi ni nkarhi. Mulanguteri wa Nhlengeletano Ya Mahanyelo Ni Ntirho Wa Hina Wo Chumayela a nga ha averiwa ku va mutshamaxitulu hi ku phindhaphindha ku tlula vakulu lavan’wana kambe swi ta ya hi leswaku evandlheni rero ku ni vakulu vangani. Loko nkulu a faneleka ku fambisa Dyondzo Ya Bibele Ya Vandlha, swi le rivaleni leswaku wa faneleka ku va mutshamaxitulu. Hambiswiritano, hi kombela mi xiya leswaku nkulu loyi a nga mutshamaxitulu u fanele a bumabumela swichudeni hinkwaswo a tlhela a swi nyika ndzayo, loko swi fanerile. Nakambe u fanele a tiyiseka leswaku tidyondzo ti hela hi nkarhi. (Vona  tindzimana 17 na  19.) Loko mutshamaxitulu a swi tsakela naswona ku ri ni ndhawu leyi eneleke eplatifomo ku nga ha vekiwa xikurisamarito leswaku a ta kota ku vitana xivulavuri ha xin’we a ri kwalaho leswaku xi ya yima laha xi faneleke xi nyikela mbulavulo xi ri kona. Hilaha ku fanaka, loko mutshamaxitulu a swi lava a nga tshama eplatifomo hi nkarhi wa mbulavulo wa ku hlayiwa ka Bibele ni hi nkarhi wa xiyenge lexi nge Ndzetelo Wa Ntirho Wo Chumayela. Leswi swi nga ha hlayisa nkarhi.

25. Swi nga va kahle ngopfu loko xiavelo lexi xo nyikiwa nkulu loyi a nga xivulavuri lexi nga ni ntokoto. Vutihlamuleri bya mutsundzuxi wa vakulu ni malandza i ku nyika vakulu ni malandza ya vutirheli ndzayo exihundleni loko swi fanerile mayelana ni mimbulavulo hinkwayo leyi va yi nyikelaka ku katsa ni mimbulavulo ya le rivaleni, ku fambisa dyondzo ya Xihondzo Xo Rindza ni Dyondzo Ya Bibele Ya Vandlha ku katsa ni ku hlaya tindzamana etidyondzweni. (Vona  ndzimana 19.) Loko ku ri ni vakulu vo hlayanyana lava nga swivulavuri leswi nga ni ntokoto evandlheni, vakulu lava fanelekaka va nga ha cincana lembe ni lembe ku endla xiavelo lexi. A swi bohi leswaku mutsundzuxi wa vakulu ni malandza a nyikela ndzayo endzhaku ka mbulavulo wun’wana ni wun’wana.

26. Loko mavandlha ma ri ni swichudeni swo tala ma nga ha khoma titlilasi tin’wana leswaku swichudeni swi ta kota ku nyikela mimbulavulo. Tlilasi ha yin’we yi fanele yi va ni mutsundzuxi loyi a fanelekaka, ku nga hava nkulu. Loko swi fanerile, ku nga ha tirhisiwa nandza wa vutirheli loyi a fanelekaka. Huvo ya vakulu yi fanele yi endla xiboho xa leswaku i mani loyi a nga ta endla xiavelo lexi kumbe yi lava leswaku vamakwerhu vo hambanahambana va cincana ku endla xiavelo lexi. Mutsundzuxi u fanele a landzela nkongomiso lowu hlamuseriweke eka  ndzimana 18. Loko ku ri ni titlilasi tin’wana, swichudeni swi fanele swi komberiwa ku ya etitlilasini ta swona endzhaku ka xiyenge lexi nge Endla Ndzavisiso. Swi fanele swi tlhela swi hlangana ni vandlha hinkwaro loko ku sungula xiyenge lexi nge Mahanyelo Ya Vakreste.

27. Ku ta va ni tivhidiyo tin’wana leti nga ta tlangiwa leti fambisanaka ni tidyondzo leti. Tivhidiyo ta kona ti ta kumeka eka JW Library® app naswona u nga ti dawuniloda hi ku tirhisa switirhisiwa swo hambanahambana.

© 2023 Watch Tower Bible and Tract Society of Pennsylvania

S-38-TS 11/23