Ikoto Ijo Ajenun Abeit?

ABEIT naikamunit inyo? Nuikamunitosi aingiseta nuengitingitata itunga. Aticepak iwumokinit ijo da aingiseta kwape nat kanu:

Konye cut Edeke kipodokinit oni?

Esangete kerek ijiisio ka aiticanitoi?

Inyo etakanikin oni kitwaka?

Ejai kerek amun kanukangun kalukatwak?

Biai ebeitor eong ailipi ido kiirar Edeke?

Biai apedoria eong adumun aiyalam kotoma aijar?

Aibo ebeit ijo amoyari abongonokineta kaingiseta kanu? Arai kiloto ijo olaiburaris araibo angadis naka itabon, aticepak idumun ilukumin luka itabon lu ebakai ebe ajatar kabongonokineta. Konye duc mam abongonokineta kec acamanara. Esubitos bala edolitos konye kapak naedit ice mam bobo eraasi luedolitos,ewanyanario araibo ijulakinio.

Konye ejai aitabo ediopet lo ejaatar kabongonokineta numunon. Nges eitabo loka abeit. Abu Yesu Kristo kotema kotoma alipi Edeke ebe: “Akonikirot nges abeit.” (Yokana 17:17) Ilolo ijeni oni Akirot ngin kwape eitabo Lokalaunan Ebaibuli. Kapapulai nuetupakinete, ibuni ijo idumun abongokineta nuecaeta ido kodolitos kama ijaasi aingiseta nukokuju.

 Konye Cut Edeke Kipodokinit Oni?

NUINGISTERE AINGISETE NA:

Ijai oni akwap naileleba adedeng ka amamus etube loka abeit. Idiinin luipu isisianakinete ebe aiticanitoi naijataari oni erai akot naka Edeke.

NUISISIANAKIN EBAIBULI:

Mam Edeke eyangaununei nuarokok. “Madi Edeke, aswam nueroko; madi Lokapedor kere, aswam numan edolito!” ebala Yob 34:10. Ejaatar Edeke kede alosikinet naminat mama ejaasi itunga. Nges esisianakina Yesu oni ailip: “Papakosi loejoi toma akuj, . . . Akonijakanut kobu. Nuikoto kiswamai kakwapin kwape iswamaere kotoma akuj.” (Matayo 6:9, 10) Emina Edeke oni noi, ido da alot toma aidulesu naepolo noi ailelebikin alosikineta ke.​—Yokana 3:16.

Kowany da bobo Ageun 1:26-28; Yakob 1:13; ka 1 Petero 5:6, 7.

Esangete Kerek Ijisio ka Aiticanitoi?

NUINGISTERE AINGISETE NA:

Iyatakitos ijiisinei amudiar aijar naka itunga naepolo. Oni kere kitirorit aiticanitoi naka ituŋa.

NUISISIANAKIN EBAIBULI:

Isumunit Edeke apak na eyauna nges ainapakin akwap kere. Kotoma ajakanut ke, ajakanut nakokuju, mam bobo itunga “isisiaunete ejie.” Aibois naka ijie, “etataete kesi ikilengakec da aituluor imelekes.” (Isaia 2:4) Isinangi Edeke etube lokaronon ka aiticanitoi kere. Isumunit Ebaibuli: “Emwatari [Edeke] akiyo kere kakonyenekec, mam bobo ejaun atwanare, karaida akuudian, karaida aimony, karaida ariebo, mam bobo ejaunos [aimoriarit amamus etube loka abeit ka aiticanitoi], naarai atuboros nusodit.”​—Apukokinio 21:3, 4.

Kowany da bobo Isabulin 37:10, 11; 46:9; ka Mika 4:1-4.

Inyo Etakanikin Oni Kitwaka?

NUINGISTERE AINGISETE NA:

Idiinin luipu isisianakinet ebe ajai ibore tomawok yen iyatakin aijaar akaulo na atwaner. Iyuunitos ice ebe epedorete ikatwak aimusung luka ajaarak araibo ebe itisilar Edeke lukaronok kaicwee kes kotoma akim.

NUISISIANAKIN EBAIBULI:

Kotoma atwanar mam bobo itunga ajaunos. “Konye mam ikatwak ejenete ibore,” ebala Ekalimonokinan 9:5. Kwape mam ikatwak epedoriatar eijen, aipupu apipilu karaida aijene diobore kere mam epedorete aimusung karaida aingarakin luka ajaarak.​—Isabulin 146:3, 4.

Kowany da bobo Ageun 3:19 ka Ekalimonokinan 9:6, 10.

 Ejai Kerek Amun Kanukangun Alukatwak?

NUINGISTERE AINGISETE NA:

Ikoto oni aijar, ka ailele nepepe kangun luminan wok. Erai duc ajauten wok loisubitere eipudi awanyun bobo luminan wok lukatwak.

NUISISIANAKIN EBAIBULI:

Itunga luipu luetwakitosi itajaruno. Isumunit Yesu ebe ‘iirarete itunga kere luejaas atesin ekeporoto elomunete.’ (Yokana 5:28, 29) Nepepe ka alosikinet naka Edeke nasodit, itunga luitajaaruno edumunet arereng naijar kakwap naka paradais. (Luka 23:43) Aisumunet na nakongoren imoriarit angaleu naedolit ka aijar naka ikar kere kalu itunga luerimara. Ebala Ebaibuli ebe: “Irumete ikadolitok akwap, ebusete kotoma ikar kere.”​—Isabulin 37:29.

Kowany da bobo Yob 14:14, 15; Luka 7:11-17; ka Aswamisio 24:15.

Biai Ebeitor Eong Ailipi Ido Kiirar Edeke?

NUINGISTERE AINGISETE NA:

Itunga kodiinin kere ilipete. Konye, luipu epupute ebe mam ailipasinei kes ebongonokinio.

NUISISIANAKIN EBAIBULI:

Abu Yesu kisisianaki oni ainyeikin abongobongo awok ailipasenei. “Ido nailipiata,” ebala nges, “sirinyogonyogoete akiro atai.” (Matayo 6:7) Arai ikoto oni Edeke aiirar ailipasinei wok, Ibusakinit oni ailipi koipone loitojokit nges. Kanu aswam ngun, ibusakinit oni aisisiaun akot naka Edeke kosodete ailipi kwape kwangin. Itetemit 1 Yokana 5:14: “Arai kiilip ibore kwape ejaar akoteke [Edeke], kipupuni ngesi oni.”

Kowany da bobo Isabulin 65:2; Yokana 14:6, 14; ka 1 Yokana 3:22.

Biai Apedoria Eong Adumun Aiyalam Kotoma Aijar?

NUINGISTERE AINGISETE NA:

Itunga luipu emunos ebe isirigin, ajenara, araibo atemelele nges einakini kes aiyalama. Kanuka ngun abwapakitos do kes iboro kwape kangul konye edumunete kes ebe akuik kes aiyalama.

NUISISIANAKIN EBAIBULI:

Abu Yesu kitodu elacet loepedori ayaun aiyalama neabalar ebe: “Isirerengitoi lukican komoyo.” (Matayo 5:3) Aiyalama naka abeit ipedori adumun arai kito kisimonik oni aipudiwok loepolo noi​—etengei wok kanu abeit naikamunit Edeke ka alosikinatake kanuwok. Idumakin abeit na Obaibuli. Ajenun abeit ngin ingarakin oni amisikin nuepolok cut​—kanu mam. Acamakin abeit nake Ebaibuli aingarenikin awamisio wok ka aswamisio itodikin oni aijar na ejai alosikinet.​—Luka 11:28.

Kowany da bobo Awaragasia 3:5, 6, 13-18 ka 1 Timoteo 6:9, 10.

 Arai ngin ber awanyunet naewuriana naka abongokineta nuka Ebaibuli mama ejaasi aingisita akanyape. Ikoto ijo ajenun nudeparitos ngun? Arai, irai ijo idiopet ka “lukican komoyo,” koman abuonokin irai ijo. Aticepak iwomomoi ijo ace aingiseta kwape nat: ‘Arai epodokinit Edeke oni, kanukinyo ejalakinitor nges arokisio nuepol ka aiticanitoi ameum apengo? Biai apedoria eong aiyatakin aitojokar aijar nakokaleka?’ Ijaikinit Ebaibuli abongonikineta nueleleba ido kisimonikinete aingiseta ngun ka ace aingisingiseta da nuipu.

Konye, luipu lolo ekuriaka aanyanar Ebaibuli. Esesenete kes nges kwape eitabo loepol ido da ecesawan kotiono amisikin. Ikoto ijo aingarakinio kanu adumun abongokineta Koibaibuli? Ejaatar Ikajenak luka Yawe iboro iiyarei luepedorete aingarakin ijo.

Nasodit eitabo, Anyoika Cut Nuisisianakin Ebaibuli? Itemonokitai nges kanu engarakin itunga lu epolo aswam aanyanar abongonikineta nuecaete ka aingisita nuepolok noi. Ibore yeniiyareit, ainapinapet na atitai na aisisia Ebaibuli. Epedori idiopet ka Ajenak luka Yawe abunere orekon araibo aboisit naepatanikit ijo, eyangaikin apak naedit kangoni sabiti aisisia Ebaibuli ka ijo. Imillion luitunga kakwap kere kes emedata kanu ka ainapinapetait kana. Luipu ka kes ariengutu noi kobalasi ebe: “Adum eong ebeit!”

Emamei ibore yenetiayi yen ibusakin adumun. Ilacakin abeit naka Ebaibuli oni kama ejaasi inonosio, aitolitolo, kede aiyalongongo. Enakin oni amuno, alosikinet, ka aiyalam. Abala Yesu: “Ijenunete da abeit, abeit da kiwosikini yes.”​—Yokana 8:32.

□ Komamei abuikinit, akoto eong eitabo Anyoika Cut Nuisisianakin Ebaibuli?

□ Kelipit, kiriamunos ka eong kanu aisisia Ebaibuli atitai.

Ikoto ijo akiro ace? Kiwadikak Ajenak luka Yawe kitosomai inabai lu eposita luta.

Karaai mam itodiaritai kere, elomunitos kotoma angajep naepatana naka Ebaibuli loka Ateso lo 1961.

[Ilope Aputo kapapula 2]

© Paul Lowe/Panos Pictures