Maski Jesus la hasoru susar barak neʼebé ema seluk hasoru tanba nia perfeitu, maibé nia hatudu laran-sadiʼa no komprende ema nia sentimentu. Nia prontu atu ajuda ema iha dalan oioin. Bainhira nia ajuda sira, nia halo ida-neʼe liu fali buat neʼebé sira presiza. Laran-sadiʼa book Jesus atu ajuda ema seluk.

Jesus nunka hatudu an katak nia mak ema importante no okupadu liu. Tan neʼe ema oioin, joven no ema idade, la dada an atu hakbesik ba nia. Sira sente kmaan atu hakbesik ba Jesus tanba sira bele nota katak nia hanoin sira.

Jesus halo beibeik orasaun ba ninia Aman ho laran kuandu nia mesak no mós kuandu hamutuk ho ema seluk. Nia halo orasaun iha tempu oioin, laʼós deʼit kuandu atu han. Nia halo orasaun atu fó agradese no fó glória ba ninia Aman, no mós buka matadalan antes halo desizaun sériu ruma.

Jesus prontu atu halo sakrifísiu no hanoin uluk ema seluk nia diʼak. Maski kole, nia prontu atu ajuda ema seluk duké deskansa. Nia la hanoin deʼit ninia diʼak. Kona-ba neʼe, nia hatudu ezemplu diʼak mai ita atu banati-tuir.

Jesus hanorin katak importante atu fó perdua, no nia mós prontu atu fó perdua ba ninia dixípulu sira no mós ema seluk.

Jesus hatene katak ema Judeu barak sei la simu Mesias no ikusmai inimigu sei oho nia. Karik neʼe bele halo Jesus dada an atu ajuda ema. Maibé nia la halo nuneʼe, nia ho laran-manas haklaken no defende adorasaun neʼebé loos. Ninia ezemplu bele ajuda ninia dixípulu hotu neʼebé hasoru susar tanba ema kontra.

Jesus matenek liu no iha koñesimentu barak liu ema neʼebé la perfeitu. Tuir loloos, Jesus diʼak liu fali ema seluk tanba nia iha kbiit atu hanoin no isin neʼebé perfeitu. Maski nuneʼe nia hatudu haraik an atu ajuda ema.

Jesus sempre hatudu pasiénsia ba ninia dixípulu sira no mós ema seluk bainhira sira la banati-tuir ninia ezemplu ka la halo tuir ninia liafuan. Nia hanorin sira beibeik ho pasiénsia atu nuneʼe sira bele hakbesik ba Jeová.