• Na ruri Modimo o a re kgathalla?

• Na dintwa le mathata di tla ke di fele?

• Ho etsahalang ka rona ha re e shwa?

• Na ka le leng bafu ba tla tsoswa?

• Nka rapela Modimo jwang e le hore a nkutlwe?

• Nka fumana thabo jwang bophelong?

O ka fumana dikarabo tsa dipotso tsee hokae? Haeba o ne o ka ya laebraring kapa dishopong tsa dibuka, mohlomong o ne o tla fumana dibuka tse dikete tseo ho thweng di araba dipotso tseo. Leha ho le jwalo, hangata dibuka tsena ha di dumellane. Tse ding tsa tsona ekare dia utlwahala empa kapelepele ditaba tsa tsona di siuwa ke nako ebe dia ntjhafatswa kapa di nkelwa sebaka ke tse ding.

Leha ho le jwalo, ho na le buka e le nngwe feela e nang le dikarabo tseo re ka di tshepang. Ke buka e buang nnete. Ha Jesu Kreste a rapela Modimo, o ile a re: “Lentswe la hao ke nnete.” (Johanne 17:17) Kajeno rea tseba hore Lentswe leo ke Bibele e Halalelang. Maqepheng a latelang, o tla fumana tlhaloso e kgutshwanyane ya dikarabo tsa Bibele tse hlakileng le tse nepahetseng tsa dipotso tse ka hodimo.

LEBAKA LEO KA LONA HO BOTSWANG POTSO ENA: Re phela lefatsheng le tletseng bobe. Madumedi a mangata a ruta hore ke thato ya Modimo hore ebe re hlahelwa ke mathata.

SEO BIBELE E SE RUTANG: Le ka mohla Modimo a ke ke a baka bobe. Jobo 34:10 ho Bibele ya Sesotho ya Mongolo wa Afrika Borwa, e re: “Modimo o ke ke wa etsa bobe. . . Ya matla wohle ha ho kamoo a ka etsang bokgopo kateng!” Modimo o na le tshepiso e bontshang hore o rata batho. Ke ka lebaka leo Jesu a ileng a re ruta hore ha re rapela re re: “Ntata rona ya mahodimong, . . . Mmuso wa hao o ke o tle. Thato ya hao e ke e etsahale lefatsheng, jwalokaha e etsahala lehodimong.” (Matheu 6:9, 10) Modimo o re rata haholo hoo a ileng a ba a tela ntho e kgolo ka ho fetisisa e le hore a phethahatse tshepiso ya hae.—Johanne 3:16.

Sheba le Genese 1:26-28; Jakobo 1:13; le 1 Petrose 5:6, 7.

LEBAKA LEO KA LONA HO BOTSWANG POTSO ENA: Dintwa di bolaya batho ba bangata ka tsela e tshosang. Kaofela ha rona re kile ra utlwiswa bohloko ke bothata bo itseng.

SEO BIBELE E SE RUTANG: Modimo o ile a bolela esale pele hore o tla tlisa kgotso lefatsheng lohle. Tlasa Mmuso wa hae o tla busa o le lehodimong, batho “ha ba sa tla hlola ba ithuta ntwa.” Ho e na le hoo, ba tla fetola “disabole tsa bona hore e be mehoma.” (Esaia 2:4) Modimo o tla fedisa kgethollo le mathata ohle. Bibele e re tshepisa hore: ‘Modimo o tla hlakola meokgo yohle mahlong a bona, lefu ha le sa tla hlola le e ba teng, mme maswabi kapa ho bokolla kapa bohloko ha di sa tla hlola di e ba teng. Dintho tsa pele, tse akarelletsang ho hloka toka le mathata a teng kajeno di tla be di fetile.’—Tšenolo 21:3, 4.

Sheba le Pesaleme ya 37:10, 11; 46:9; le Mikea 4:1-4.

LEBAKA LEO KA LONA HO BOTSWANG POTSO ENA: Madumedi a mangata a ruta hore ho na le ntho e nngwe ka hare ho motho e tswelang pele e phela ha a se a hlokahetse. A mang a ruta hore bafu ba ka lematsa batho ba phelang le hore Modimo o otla batho ba etsang diketso tse mpe ka hore a ba tjhese ka ho sa feleng mollong wa dihele.

SEO BIBELE E SE RUTANG: Ha motho a hlokahala, o kgaotsa ho ba teng. Moeklesia 9:5 e re: “Ba shweleng, ho hang ha ba tsebe letho.” Kaha ha ho letho leo batho ba hlokahetseng ba le tsebang, ba le utlwang le leo ba le hlokomelang, ba ke ke ba ntsha batho ba phelang kotsi kapa ba ba thusa.—Pesaleme ya 146:3, 4.

Sheba le Genese 3:19 le Moeklesia 9:6, 10.

LEBAKA LEO KA LONA HO BOTSWANG POTSO ENA: Re rata ho phela ebile re batla ho thabela bophelo le batho bao re ba ratang. Ka tlhaho re lakatsa hore re boele re bone batho bao re ba ratang, ba seng ba hlokahetse.

SEO BIBELE E SE RUTANG: Boholo ba batho ba hlokahetseng ba tla tsoswa. Jesu o ile a tshepisa hore ‘ba mabitleng a kgopotso ba tla . . . tswa.’ (Johanne 5:28, 29) Tumellanong le morero wa Modimo wa qalong, batho baa tla tsoswa, ba tla fumana monyetla wa ho phela lefatsheng la paradeise. (Luka 23:43) Bokamoso bona boo re bo tshepisitsweng bo akarelletsa hore batho ba mamelang ba tla phela bophelo bo phethahetseng ka ho sa feleng. Bibele e re: “Ba lokileng ba tla rua lefatshe, ba tla dula ho lona ka ho sa feleng.”—Pesaleme ya 37:29.

Sheba le Jobo 14:14, 15; Luka 7:11-17; le Liketso 24:15.

LEBAKA LEO KA LONA HO BOTSWANG POTSO ENA: Hoo e ka bang madumeding ohle batho ba a rapela. Leha ho le jwalo, ba bangata ba nahana hore Molimo ha a arabele dithapelo tsa bona.

SEO BIBELE E SE RUTANG: Jesu o ile a re ruta hore re se ke ra phetapheta mantswe a tshwanang ha re rapela. O itse: “Ha o rapela, o se ke wa phetapheta dintho tse tshwanang.” (Matheu 6:7) Haeba re batla hore Modimo a mamele dithapelo tsa rona, re lokela ho rapela ka tsela eo a e amohelang. E le hore re etse seo, re lokela ho ithuta hore na thato ya Modimo ke efe ebe re rapela ka tsela e dumellanang le yona. Johanne wa Pele 5:14 e re: ‘Ho sa tsotellehe hore na ke eng eo re e kopang ho ya ka thato ya hae, Modimo o a re utlwa.’

Sheba le Pesaleme ya 65:2; Johanne 14:6, 14; le 1 Johanne 3:22.

LEBAKA LEO KA LONA HO BOTSWANG POTSO ENA: Batho ba bangata ba dumela hore ba tla thaba haeba ba e na le tjhelete, ba tumme ba bile ba le batle. Empa, le hoja ba lelekisa dintho tse jwalo, ba ntse ba sa thaba.

SEO BIBELE E SE RUTANG: Jesu o ile a bontsha hore na ntho ya bohlokwa e tlisang thabo ke efe ha a re: “Ho thaba ba utlwang lentswe la Modimo mme ba le boloka!” (Luka 11:28) Re ka fumana thabo ya nnete haeba feela re tseba nnete ka Modimo le ka dintho tseo a tla di etsa nakong e tlang. Nnete eo e fumanwa ka Bibeleng. Ho tseba nnete eo ho ka re thusa ho kgetholla pakeng tsa dintho tsa bohlokwa le tseo e seng tsa bohlokwa. Ha re dumella nnete ya Bibele hore e re tataise dinthong tseo re di etsang le diqetong tsa rona, re tla phela bophelo bo kgahlisang Modimo.

Sheba le Liproverbia 3:5, 6, 13-18 le 1 Timothea 6:9, 10.

 Re hlahlobile ka bokgutshwanyane feela hore na Bibele e araba dipotso tsena tse tsheletseng jwang. Na o sa na le dipotso tse ding? Haeba o e mong wa ba ratang ho ithuta ka Modimo, ha ho pelaelo hore o batla ho tseba dintho tse ding. Mohlomong o ipotsa dipotso tse ding tse kang tsena: ‘Haeba Modimo o a re kgathalla, ke hobaneng ha a dumeletse hore ho be le bobe bo bongata hakaale le mathata? Nka ntlafatsa bophelo ba lelapa la ka jwang?’ Bibele e araba dipotso tsena le tse ding tse ngata ka tsela e utlwahalang le e kgotsofatsang.

Leha ho le jwalo, kajeno batho ba bangata ha ba thahaselle ho bala Bibele. Ba e nka e le buka e kgolo eo ka dinako tse ding ho leng thata ho e utlwisisa. Na o ka thabela ho fumana dikarabo ka Bibeleng? Dipaki Tsa Jehova di ka o thusa ka ditsela tse pedi.

Ya pele, ke ho o fa bukana e reng Bibele e re Rutang? E ngolletswe ho thusa batho ba se nang nako hore ba hlahlobe tsela e hlakileng eo ka yona Bibele e arabang dipotso tsa bohlokwa. Ya bobedi, ke thuto ya Bibele e sa patallweng. Paki e nngwe ya Jehova e dulang haufi le moo o dulang, e ka tla lapeng la hao kapa sebakeng se seng seo le dumellaneng ka sona mme ya nka nako e kgutshwanyane e bala Bibele le wena beke e nngwe le e nngwe, e sa o patadise. Thuto ena e se e thusitse batho ba dimilione lefatsheng ka bophara. Ho thabisang ke hore, ha ba bangata ba bona ba ntse ba ithuta ba ile ba re: “Ke fumane nnete!”

Ha ho letlotlo le leholo ho feta lena leo motho a ka le fumanang. Nnete ya Bibele e re pholosa dithutong tsa bohata, e etsa hore re seke ra ferekana kapa ra tshaba dintho tse itseng. E re fa tshepo ebile e etsa hore re thabele bophelo. Jesu o ile a re: “Le tla tseba nnete, mme nnete e tla le lokolla.”—Johanne 8:32.