Huahuitamanta túcuy muyuyniypi ima ckáaj carani ancha gustáaj cara. Ashca cutis familiayuan pásiaj carani chá ancha súmaj sachapi y represapi ima Ciudar Jyväskylä chaupinpi Finlandiamanta tían. Anchami gústaaj cara uyuas. ¡Huahuitamanta abrasánaaj carani túcuy ashcosta y mishis ima ckáaj carani! Na atunsitu cas, ckallarera llaquichiayta ckaayta imaina uyuasta maltrátaj carancu y cuscayacorani persunasuan ima uyuasta deféndej carancu. Chaypi ’rejserani persunasta ima quiquin nocka pénsaj carancu.

’Rúaj caraycu protestas uyuastas defendes. Sáckej caraycu informaciún y ’rúaj caraycu marchas y protestas cá personas erejes contranpi. Tiempuan ’ruaraycu suj organisaciún uyuastas defendéypaj. Laya imaina nipúcoj caraycu y ’ruaraycu ashca cutis autoridaresuan problemas ápej caraycu. Ashca cutis preso y enjuiciascka carani.

Nátaj aflígiaj cara persunas huajchaspa causaynin. Chayraycu cuscayacorani suj organisaciunman huajyascka Amnistía Internacional y Greenpeace y túcuy tiempu chaypi tíaj carani yanapas. Astaanpas afanácoj carani chackaycunaraycu ima huajchas y yarckalus carancu.

Chaypacha tiempuan cuentát cayerani múndup imastisninta mana allichayta atini. Amapas huaquin cutis batallas utulitas gánaj caraycu, problemas astaan ashcayácoj carancu. Cara imainásh fuersásniy mishpora mundút y ni pipasta importapora. Maa fuersasníyoj cuticorani.

Fuerzas maa apiyta saycúchiaj cara, cha layamanta ckallarerani pensayta Tata Yayapi y Bibliapi nisckanta. Amapas únay na estúdiaj carani Jehóvap testigusninuan y agradécej carani bondar y interesnincuta, chá tiempupe manáraj decidiscka tiarani cambiayta chá laya cáusay. Pero cunan maa chayna can.

Bíbliay mascarani y leeyta ckallarerani. Cara suj ancha súmaj ahui ina nanasníypaj. Leerani ashca testus ima animaancu allít tratayta uyuasta. Ejemplúpaj, Proverbios 12:10 nin «Pi justu can uyuasninta cuidan» (La Palabra de Dios para Todos). Unancharanipas Tata Yayát maa tumpayta atini múndup afliciunesninmanta. Manapé, afliciunesniycu mana alli ruacorancu imaraycu ashca personas mana ’ruancu Jehová munasckanta. Ancha huackachiaara ckaayta múnay y atun pacencia ima pay apiaycu (Salmo 103:8-14).

Chá huatapi tarerani suj invitación estudiáypaj libru Biblia, ¿imát yachachiáysh?, datusniyta churas estafetapi sackerani cachanancúpaj. Mana ashca tiempo llallera y suj matrimoniu testigusmanta visitaarancu y ofrecearancu Bibliát estudiayta. Chayllapi «ari» nerani. Astaanpas, ckallarerani tantacunasman ’riyta Salunpi Reinumanta. Allimanta allimanta, Biblia nisckan sonckoyman chayara.

Gracias ima Bibliát estudiarani, ashca cambius ’ruayta aterani. Pitayta y upiayta sacakerani; ckallarerani limpiu y alli arreglascka puriyta, malas palabras mana ’rimayta y respetayta autoridaresta (Romanos 13:1). Astaanpas, sackerani huarmilu cayta, chay ancha gústaaj cara.

Pero nockápaj astaan difícil cara ckaayta organisaciunesta ima lúchaj carancu, imaina ckaánay tiara. Mana chayllapi cambiarani. Huamajpi séntej carani ima upalliácoj carani si paycunata renunciarani. Pero, cuentát ckocorani ima solamente Tata Yáyap Reinun humanidarta allíchaj ’rin, chayraycu dedicacorani tucuypi apoyayta y gentét ’rejsichiyta (Mateo 6:33).

Activista cas persunasta ishcaypi sepáraj carani: allista y mana allista, y maa dúdaj carani mana allista contranpi tiayta. Cunan, gracias ima Bibliát estudiarani, sackerani apiyta chá chéjniy mana alli y afanacun munanaas tucuy persunasta (Mateo 5:44). Chá múnay ckaachini ashca layasmanta. Por ejemplu, predicas alli noticias Tata Yáyap reinunmanta. Cusichian ckaas chá ancha súmaj llámcay ckon persunasta pas, cusi y checka suyana.

Sackeyta afliciunes Jehóvap maquisninpi sackeara cutis pas apiyta. Convencescka tiani ima pay, pay ’Rúaj, mana sackencka ckaris y uyuas maltratu usus seguichuncu, ni sackenckachu cay ancha súmaj ashpa huajllicuchun. Gobiernunuan mana unas remédiaj ’rin túcuy dañu ima ckari ruara (Isaías 11:1-9). Cusiscka cani, manalla checkát rejsis, manapé, atiyta yanapayta sujcunasta fe churayta caycunapi. Na mana amuan necesidar munduta allichayta.