Xinalax pa ri tinamit re Sajonia, ojer kbʼix República Democrática Alemana che (RDA). K’o ri loqʼoqʼenik chqaxoʼl kukʼ ri nufamilia, ri nutat nunan xkikʼut ri utz taq bʼantajik chnuwach. Rumal che ri tinamit República Democrática Alemana are jun tinamit comunista, e kʼi winaq nim ta kkil ri kojonik. Ri in kinkoj taj che kʼo Dios. Kʼo kebʼ jastaq che kʼo xubʼan pa ri nukʼaslemal pa dieciocho junabʼ: are che kinkojon ta chrij ri Dios y ri comunismo.

¿Jasche utz xwil ri comunismo? Rumal che xwil ri chomanik che kʼo kukʼ che junam kkil kibʼ. Rumal laʼ xinchomaj, rech kʼo junamil chkixoʼl ri e mebʼaʼ y ri e qʼinomabʼ, rajawaxik kkijach ri kiqʼinomal. Rumal laʼ xinya tobʼanik rukʼ jun organización juvenil comunista. Are chiʼ kʼo 14 nujunabʼ, xinok pa jun proyecto che kubʼan reciclar wuj. Ri qʼatal taq tzij re ri tinamit Aue sibʼalaj xkimaltyoxij chwe y xkiya sipanik chwe. Paneʼ kʼa in ala na xinkunik xwetaʼmaj kiwach jujun winaq che nim kibʼanik pa ri política. Xinchomaj che utz ri tajin kinbʼano y che kinriq na utzilal pa ri petinaq.

Are kʼu xkʼulmataj ta ri nuchomam. Pa 1989 xtzaq ri muro de Berlín, xuqujeʼ xsach uwach ri bloque comunista pa Europa del Este. Sibʼalaj kʼax ri xkʼulmatajik. Xwilo che kʼi itzelal tajin kbʼanik. Jun kʼutbʼal, jachin ri kkiya ta kitobʼanik che ri comunismo nim ta keʼilik. Are kʼu ¿jasche je waʼ xbʼanik? ¿La mat are ri comunismo xbʼinik che rajawaxik junam kqil qibʼ? Ri comunismo xubʼan ta ri xubʼij. Ronojel ri xkʼulmatajik xubʼan chwe che xinbʼisonik.

Ri nuchomanik nabʼe kanoq xkʼextajik, rumal laʼ xwaj xinmajij retaʼmaxik chrij ri música y ri pintura. Xinbʼe pa jun escuela re música rech kinkunik kinbʼe pa ri universidad; ri qas kwaj are che kwetaʼmaj chrij ri música y ri arte. Xinya kan uchomaxik ri xwaj xinbʼano are chiʼ kʼa in nitzʼ na. Ri kwaj are che kinkikotik; rumal laʼ jujun mul xeʼinchʼabʼej kʼi alitomabʼ. Are kʼu ronojel wariʼ xuya ta kikotemal chwe, xuqujeʼ ri cuadros che keʼinbʼano qas ta utz keʼel chnuwach. ¿Jas riʼ ri kkʼulmataj pa ri petinaq? ¿La kʼo upatan ri kʼaslemal?

Are chiʼ xinriq ri kirespuestas ri nupreguntas, xinkikotik. Jun bʼenaqʼij, are chiʼ in kʼo pa ri escuela, xintʼuyi kukʼ ri wachiʼl che tajin ketzijon chrij ri petinaq. Kʼo jun ixoq chkixoʼl ubʼiʼ Mandy, * che testigo rech Jehová che xuya utz taq pixabʼ chwe. Xubʼij chwe: «Andreas, we kawaj kariq ri utzalibʼal uwach ri preguntas che kabʼan chrij ri akʼaslemal pa ri petinaq, chatzukuj pa ri Biblia».

Qas ta xinchʼobʼo, are kʼu xwaj xwetaʼmaj más. Mandy xukʼut ri capítulo 2 re ri wuj re Daniel chnuwach, are chiʼ xinsikʼij uwach xinmayo. Wajun profecía riʼ kchʼaw chrij ri potencias mundiales, kraj kubʼij, ri qʼatal taq tzij re wajun uwach Ulew che kʼo ubʼanik rukʼ ri tajin kkʼulmataj pa taq ri qaqʼij. Tekʼuriʼ, Mandy xukʼut chi nikʼaj profecías re ri Biblia chnuwach che kchʼaw chrij ri petinaq. Qas xinriq kirespuestas ri nupreguntas. ¿Jachin xetzʼibʼan ri profecías riʼ? ¿Jachin kkunik kubʼij ri kkʼulmataj pa ri petinaq rukʼ tzʼaqatil? ¿La kukʼut wariʼ che qastzij kʼo ri Dios?

Xwetaʼmaj kiwach ri jukʼulaj Horst y Angelika, che e testigos rech Jehová. Ri e areʼ xkiya tobʼanik chwe rech xinchʼobʼ ri kubʼij ri Biblia. Xwetaʼmaj che xaq xiw ri utinamit Jehová qas kkikoj ri ubʼiʼ ri Jehová y kkiya uqʼalajisaxik (Salmo 83:18; Mateo 6:⁠9). Xuqujeʼ xwetaʼmaj che ri Jehová kutzujuj chke ri winaq che kiriq jun kʼaslemal che kʼo ta ukʼisik pa ri kotzʼiʼjalaj uwach Ulew. Ri Salmo 37:9 kubʼij: «Qastzij, ri e bʼanal taq etzelal keʼesax na bʼik pa ri ulew, e are kʼut ri kikubʼan kikʼuʼx chrij ri Ajawaxel kkechbʼej na ri uwach ulew». Utz xinta ri sipanik che kkiriq ri winaq we kkikoj kichuqʼabʼ rech kkibʼan pa ri kikʼaslemal ri taq pixabʼ.

Kʼax xinbʼan che uyaʼik kan jujun jastaq y unimaxik ri Biblia. Rumal che in músico y pintor xubʼan chwe che xinkʼut nimal, rumal laʼ rajawaxik xinkoj nuchuqʼabʼ rech xinux machʼalik winaq. Xuqujeʼ kʼax xinbʼan che uyaʼik kan ri nukʼaslemal inmoral. Kinya maltyoxinik che ri Jehová rumal ri upaciencia, keʼuchʼobʼo y keʼuloqʼoqʼej konojel ri kkikoj kichuqʼabʼ che ubʼanik ri kubʼij ri Biblia.

Ri comunismo y che kinkoj taj che kʼo Dios kʼo xubʼan pa ri nukʼaslemal pa ri dieciocho junabʼ, are kʼu ri Biblia tajin kinutoʼo rech kinkʼex ri nuchomanik. Ri xwetaʼmaj xinutoʼ pa ri nukʼaslemal rech kinbʼison ta chi che uchomaxik ri kinkʼulmaj pa ri petinaq. Pa ri junabʼ 1993 xinbʼan ri nuqasanjaʼ y xinux testigo rech Jehová, y pa ri junabʼ 2000 xinkʼuliʼ rukʼ Tabitha, jun utzalaj wachiʼl pa ri nukojonik. Oj kebʼ xeqatoʼ ri winaq rech kqakʼut chkiwach ri kubʼij ri Biblia. Junam rukʼ ri xkʼulmataj wukʼ in nabʼe kanoq, e kʼi kʼexom ri kichomanik rumal ri comunismo y kekojon ta chrij ri Dios. Sibʼalaj kuya kikotemal chwe keʼintoʼ ri winaq rech kketaʼmaj chrij ri Jehová.

Are chiʼ xinmaj kachilaxik ri testigos rech Jehová, ri nutat nunan sibʼalaj xkixeʼj kibʼ. Are kʼu chiʼ xqʼax ri tiempo xkil ri utzilal che tajin kuya pa ri nukʼaslemal. Kimik sibʼalaj kinkikotik rumal che tajin kketaʼmaj chrij ri Biblia y kebʼe pa ri e riqbʼal ibʼ kukʼ ri testigos rech Jehová.

Oj kebʼ rukʼ Tabitha kqakoj qachuqʼabʼ rech kqabʼan ri pixabʼ che kubʼij ri Biblia chke ri e kʼulanik, y wariʼ kubʼano che sibʼalaj kojkikotik. Jun kʼutbʼal, unimaxik ri pixabʼ rech kqakʼut sukʼilal chbʼil taq qibʼ ukowirisam ri qachilanik pa ri qakʼulanem (Hebreos 13:4).

Kinbʼison ta chi chrij ri nukʼaslemal kimik xuqujeʼ pa ri petinaq. In kʼo chuxoʼl jun familia che kʼo cho ronojel ri uwach Ulew jawijeʼ qonojel junam kqil qibʼ. Are waʼ ri amaqʼel xintzukuj pa ronojel ri nukʼaslemal.