“Totajtsin Dios kinpankixtis yoltokke nochi in [mikemej].” (Hechos 24:15, El Nuevo Testamento en Náhuatl de la Sierra de Puebla.)

Techyolseuis keman momikilis se akin tiktasojtaj (2 Corintios 1:3, 4).

Amo tiktelmouiliskej mikilis (Hebreos 2:15).

Uelis senkis tikneltokaskej ke oksepa nemiskej akin momikilijkejya (Juan 5:28, 29).

Kemaj, maj tikitakan eyi:

• Dios kitemaka nemilis. Biblia kijtoua ke Jiova “techmakatok tonemilis” (Hechos 17:24, 25; Salmo 36:9). Komo yejuatsin kimakak nemilis nochi tein yoltok, tikyekmatij ke uelis oksepa kinmakas nemilis akin momikilijkejya.

• Ne uejkauj Dios oksepa kinmakak nemilis sekin akin momikilijkaj. Biblia kijtoua ke oksepa kinmakak nemilis chikueyin akin momikilijkaj, tein katkaj siuamej uan takamej akin tataman xiuit kipiayaj, uan oksepa nenkej nikan taltikpak. Sekin yekin momikilijkaj; sayoj ke se takat kiuikayaya naui tonal keman momikilijka (Juan 11:39-44).

• Dios oksepa kineki kinmakas nemilis akin momikilijkejya. Jiova kitauelita mikilis porin kiita kemej se akin taixnamiki (1 Corintios 15:26). Senkis kineki kijkuanis uan kichiuas keman oksepa kitemakas nemilis. Yejuatsin kinejneki maj oksepa nemikan nikan taltikpak akin moajsij itech italnamikilis (Job 14:14, 15).