Жь кʹәрәма хԝә, дәрһәԛа бьчʹуктайа хԝә гьли кьн.

Әз сала 1943, Италйайеда һатьмә буйине. Малбәта мә, гӧндәки бьчʹукда дьжит, баве мьн хԝәйе кʹархане бу у нәщар бу. Де-баве мьн, әз у хушк у бьред мьн сәр һʹиме баԝәрийа Католики мәзьн кьрьн.

Чьрʹа тә сафи кьр кӧ бьби кʹәшиш?

Жь бьчʹуктайе мьн һʹьз дькьр, готаре кʹәшиша бьбьһем, әԝ дәнге ԝан гәләк мьн хԝәш дьһат, у әʹрф-әʹдәтед дере жи гәләк дьле мьн дьгьртьн. Ләма жи, мьн хԝаст бьбьмә кʹәшиш. Гава әз 13 сали бум, дийа мьн әз шандьмә мәкʹтәбәкә ӧса, кʹидәре гәде бьчʹук һазьр дькьрьн бона, кӧ әԝана ахьрийеда бьбьнә кʹәшиш.

Ԝә ԝедәре, Кʹьтеба Пироз леколин дькьр?

Бь рʹасти бежьм, на. Гава әз 15 сали бум, дәрсдарәки мьнрʹа кʹьтеба Мьзгини да, демәк чар кʹьтеб кӧ дәрһәԛа жийин у һинкьрьнед Иса гьли дькьн, мьн әԝ кʹьтеб чәнд щара хԝәнд. Чахе әз 18 сали бум, әз чумә Рʹоме, ԝедәре әз университетада һин дьбум, демәк заньнгәһада йед кӧ бьн рʹебәрийа Папе Рʹомеда бун. Ԝедәре әз һин дьбум, тʹәрихи, философийа, пʹсихоложийа у ӧса жи зьмане Латини у Йунани. Рʹаст ә, мә рʹезед жь Кʹьтеба Пироз әзбәри дьгот, у ӧса жи хԝәндьна жь Кʹьтеба Пироз дьбьһистьн ԝәʹде хьзмәта Ләʹда, ле йәкә мә Кʹьтеба Пироз леколин нә дькьр.

Гава тӧ буйи рәктор, тә дәрсед религи дәрбаз дькьр?

Рʹаст ә һʹәчʹи зәʹф мьн шьхӧлед администрати дькьр, ле йәкә мьн ӧса жи дәрс дьда дәрһәԛа Щьвака Ватиканийа Дӧда.

Чьрʹа һун религийа хԝәда дӧдьли бун?

Се тьшт мьн һʹәта хьлазийе фәʹм нәдькьр. Йа пешьн, дер дькʹәвә нав шьхӧлед политики. Йа дӧда, әԝ сәбьр дькә бенамуси, кӧ нава кʹәшиша у нава баԝәрмәнде ԝе бәлабуйи йә. У йа сьсийа, һьнә һинкьрьнед дера Католики, бь тʹәхмина мьн нәрʹаст бун. Бәʹса хәбәре, ча Хԝәдейе һʹьзкьри дькарә, мәрьва паше мьрьна ԝан һʹәта-һʹәтайе бьчәрчьринә? Йан гәло Хԝәде жь мә дәʹԝа дькә ԝәки әм пе тʹьзбийа бь сәда щара, дӧа әзбәри бежьн? *

Ԝә сафи кьр кӧ чь бькьн?

Мьн бь һесьра Хԝәдерʹа дӧа дькьр, ԝәки әԝ мьнрʹа рʹийа рʹаст нишан кә. Мьн ӧса жи хԝәрʹа Кʹьтеба Пирозә Оршәлиме дәст хьст, кʹижан сәр зьмане Итали дәркʹәт у мьн дәстпекьр әԝ бьхуньм. Щарәки шәбәԛе паши Меса Ләʹде, гава мьн кʹьнще хԝәйә кʹәшиши дарда дькьр, дӧ мер һатьнә сәминарийайе. Ԝана гот кӧ әԝана Шәʹде Йаһоԝа нә, мә сьһʹәтәк зедәтьр тʹәви ԝан хәбәр дьда, дәрһәԛа Кʹьтеба Пироз у дәрһәԛа ԝе йәке кӧ ча религийа рʹаст тедәрхьн.

Хәбәрдана тʹәви ԝан ча сәр тә һʹӧкӧм бу?

Әз гәләк әʹщебмайи мам кӧ әԝана ча баԝәрийа хԝәда һʹимгьрти бун у ча Кʹьтеба Пирозә Католики рʹьнд дьданә хәбате. Ԝәʹдә шунда Шәʹдәки Йаһоԝа бь наве Марио, дьһатә щәм мьн. Фьрԛи тʹӧнә һәвва чь щурʹәйи бу, әԝи бь сәбьр һәр Шәми дьһатә щәм мьн у шәбәԛе сьһʹәта нәһа ида дәри дьхьст.

Ле кʹәшишед дьн сәр ԝе йәке ча дьньһерʹин?

Мьн ԝана тʹәглифи сәр һинбуна Кʹьтеба Пироз дькьр, ле диса жи әԝана сәр һинбуна Кʹьтеба Пироз сәрʹа-бәрʹа дьньһерʹин. Мьн щабед сәр пьрсед ӧса дит, кӧ гәләк ԝәхт мьн әʹщьз дькьрьн. Бәʹса хәбәре, чьрʹа Хԝәде дьһелә, ԝәки зӧлми у кӧл-дәрд һәбьн.

Ле кʹәшишед дьн, кӧ щийе бьльнд дьгьртьн, рʹийа тә дьгьртьн ԝәки тӧ һинбуна Кʹьтеба Пироз бьди сәкьнандьне?

Сала 1975-да, әз чәнд щара чумә Рʹоме сәва кӧ ԝанрʹа ньһерʹандьна хԝә шьровәкьм. Һьнәк жь ԝан дьхԝәстьн мьнрʹа избат кьн кӧ баԝәрийа мьн нәрʹаст ә. Ле йәкә тʹӧ кәс жь ԝан нькарьбу ԝе йәке сәр һʹиме Кʹьтеба Пироз мьнрʹа избат кә. Ләма жи, сала 1976-да, 9 Чьләйе, мьн нәʹмә шанд Рʹоме, кʹидәреда кӧ мьн ньвиси, ԝәки әз ида нахԝазьм әндәме дера Католики бьм. Паши дӧ рʹожа әз жь сәминарйайе чум у пе тьрене щара пешьн чумә сәр щьвата Шәʹдед Йаһоԝа. Гава әз һатьм, әз пеһʹәсийам, ԝәки wе рʹоже ԝедәре щьвата мәзьн дәрбаз дьбу у чәнд щьват тʹәвайи тʹоп бьбун. Ԝедәре һәр тьшт жь дере щӧдә дьбу, щәм һәр Шәʹде Йаһоԝа Кʹьтеба Пироз һәбу у ԝәʹде готара, гьшка Кʹьтеба Пироз вәдькьр.

Ле малбәта ԝә ча ԛәбул кьр ԝе йәке, кӧ ԝә религийа хԝә гӧһаст?

Гәләк нәфәред мьн мьԛабьли мьн рʹабун. Ле әз пеһʹәсийам кӧ бьраки мьни һʹәлал кӧ Ломбардйайеда дьжит, бакӧра Италйайе, тʹәви Шәʹде Йаһоԝа Кʹьтеба Пироз һин дьбә. Әз чум щәм ԝи меван, ԝедәре Шәʹдед Йаһоԝа али мьн кьрьн ԝәки әз хԝәрʹа хәбат у мал бьвиньм. Ԝәʹдә шунда һʹәма ԝе сале, әз һатьмә ньхӧмандьне ча Шәʹде Йаһоԝа.

Бона ԝе сафикьрьна хԝә һун пʹошман бунә?

Тӧ щар! Әз тʹәхмин дькьм, кӧ ньһа әз бь рʹасти незики Хԝәде мә, чьмки ньһа занәбуна мьн сәр һʹиме Кʹьтеба Пироз ә, нә кӧ сәр философийа у әʹдәтед дере. Ньһа әз бь дьл у щан у бь исафа тʹәмьз, дькарьм мәрьве дьн жи дәрһәԛа ԝе йәке һин кьм.