To kumbila kuti u ti budze ne kwe buchilo gugo ha u chi ngwana.

Nda ka zwaligwa ku Italy ne 1943. Nda ka kulila ne bakulu bangu ne dziazwadzi dzangu mu nzi ntukununu, ngono tate bangu ba ka bali nlimi kakale bali mbezhi. Bazwadzi bedu ba ka be shaka kuti ti be Bakatoliki ba ka lulwama.

Ini wa ka be u shaka ku be mpirisiti?

Ha ndi chi msananyana, nda ka ndi da ku hwilila bapirisiti ku kereke. Nda ka ndi kgatiwa kwazo ne mahwi abo, kose ne mishingo yabo. Ichecho cha ka thama kuti dumbu ndi shake ku be mpirisiti. Ha ndi na makole ali 13, mme ba ka ndi tola kuti ndi no gala ku ikwele cha ka chi batsha baisana kuti ba khone ku zwidiyila bupirisiti gwe mamo a pezhugwi.

A cha wa ka u zwidiya cha ka chi dwa mu Baibili?

A ku zo jalo. Ha ndi na makole ali 15, nngwe we ba ka be be ndi diya wa ka ndi pa khopi ye dzi-Gospel​—mbiko ye buchilo gwa Jesu ne nshingo uwe—​ngono nda ka bala buka iyeyo kanjinji. Ha ndi na makole ali 18, nda ka enda ku Rome ku no zwidiya ku dziyunivesiti dze budiyi, dzi no laugwa ne mupapa. Nda ka zwidiya Chilatini, Chigiriki, histiri, philosophy, psychology, ne theology. Ne ta ka ti buyulila ndimana dze Baibili ne hwa Baibili i bagwa ne Sunday, ta ka ti si nga zwidiye Baibili.

Wa ka be ntungamili. A ichecho cha ka chi shanganyila ku diya?

Kwazo kwazo nshingo wangu wa ka uli we ku laula. Ngono nda ka ndi diya dzi-class ha nda tumiwa ne Second Vatican Council.

Ini wa ka simulula ku sola kereke?

Kuna zwithu zwitatu zwa ka zwi ndi dziyidza. Kereke ya ka i nginilila mu dzipolotiki. Ku dumiligwa kwe mazwibato a sa ka lulwama e badiyi ne bathu ba no ngina kereke. Ngono zwidiyo zwingwe zwe Katoloki zwa ka zwi sa ka lulwama. Ha ti lakidzila, ini Ndzimu u na ludo u nga dziyidzila bathu ba ka fa cha chose? Kakale, a Ndzimu dumbu u no shaka kuti ti tembezele mitembezelo ingompela kanjinjinjinji ti shingisa rosari? a

Wa ka thamani?

Nda ka lila, ngono a tembezela ndi kumbila batsho. Nda ka tenga khopi ye Jerusalem Bible ye Katoliki, ya ka i cha dwa ku tshambisiwa ne Chi-Italian, ngono a tangisa ku i bala. Ngono, mu mangwanana angwe e zhuba le Tshipi, ha ndi cha nika zwiambalo zwangu ha ndi dwa ku kereke, nda ka etegwa ne balume babili. Ba ka ndi dwa kuti Bafakazi ba Jehova. Ta ka lebeleka mu chibaka chi no pinda awara ne kwe Baibili ne cha i no leba ne kwe chi no lakidza budumili gwe malebeswa.

Kumba kwabo kwa ka ku ama chini?

Nda ka da zila ya ba no dumila nayo ne zila ya ba ka be khona ku zhula dzindimana mu Baibili ye Chikatoliki. Shule, Mfakazi nngwe, u noyi Mario, wa ka simulula ku ndi etela. Wa ka ali moyonlefu kakale e thembeka​—mangwanana e Saturday nngwe ne nngwe vula i na kene i singa ne, ne 9:00 am wa ka e kokodza pa nkoba we kereke.

Bapirisiti bangwe ba ka be tini ha a ku etela?

Nda ka ba laletsa kuti ba wo hwilila bo, ngono a kuna wabo wa ka be e kgategela ku zwidiya Baibili ne malebeswa. Ne kwa ka jalo, imi nda ka ndi shathisiwa kwazo ne ku zwidiya Baibili. Nda ka ndi zwidiya zwithu zwa ka naka, zwi no fanana ne kuti ini Ndzimu e dumilila zwithu zwa ka bipa ne ku sokola​—chithu cha ka chi ndi chenamisa mu chibaka chilefu.

A badiyi babo bakulu ba ka lika ku ku misa ku zwidiya Baibili?

Ne 1975, nda ka etela ku Rome kanjinji ku thalusa zila ya ndi no linga zwithu nayo. Badiyi bangu bakulu ba ka be gwisa ku shandula zila ya nda ka ndi kumbula nayo, ngono a kuna wabo wa ka be e shingisa Baibili. Gwe bupelo, ne January 9, 1976, nda ka kwala likwalo ku Rome ndi lakidza kuti a ndi chi nngwe we Bakatoliki. Mu zhuba le bubili, nda ka siya kereke ngono a tatha tirina ndi no shanganila mu zwidiyo zwangu zwe kutanga zwe Bafakazi ba Jehova, ngono zhuba ilelo ya ka ili nshangano we dziphuthego njinji. Chingwe ne chingwe cha ka chi sa ka fanana choselele ne cha nda ka nda ka jwayela! Mfakazi nngwe ne nngwe wa ka a ka bata Baibili e yendidzana ne chilebeleki chingwe ne chingwe chi no pa ndebo.

Be nsha uwo ba ka toleka chini?

Bunji gwabo ba ka ba singa dumane nami choselele. Ne kwa ka jalo, nda ka hwa kuti nngwe we bana ba mme bangu we chilume wa ka e zwidiya ne Bafakazi ku Lombardy, ku northern Italy. Nda ka yenda ndi no mbona, ngono Bafakazi ba ikoko ba ka ndi batsha ku bona nshingo ne bugalo. Shulenyana mu gole ilelo, nda ka kolobetsiwa se nngwe we Bafakazi ba Jehova.

A kuna cha u no sola ne kwacho?

A kuna choselele! Ngwenu, ndo zwihwa ne malebeswa ndi li pejo kwazo ne Ndzimu, ne kuti cha ndi no ziba ne kukwe cha ka teyiwa mu Baibili, i si mu philosophy kene chilenje che kereke. Ngwenu ndo diya bangwe ndi na ku duma kwa ka pelela.