Kena taun 1949, apai aku pindah ari Australia ngambika ulih gawa ba industri perlombongan enggau penjanaan tenaga elektrik. Apai diau ba endur ke jauh ari bandar di Victoria, lalu jadi enggau indai aku. Aku ada kena taun 1953.

Beberapa taun pengudah nya, indai berengkah belajarka Bup Kudus enggau Saksi-Saksi Jehovah. Nyadi, ari mit aku udah diajar pasal Bup Kudus. Tang apai amat begedika pengarap, lalu iya nyadi ganas ketegal indai belajarka Bup Kudus. Taja indai takut, tang iya terus belajarka Bup Kudus enggau belalai. Lebuh apai nadai ba rumah, indai ngajar aku sereta madi indu aku pasal harapan ba Paradais, sereta baka ni ajar Bup Kudus ulih nulung kami sebilik lantang.—Masmur 37:10; Isaiah 48:17.

Maya aku beumur 18 taun, aku pansut ari rumah laban enda tan enggau ulah apai aku ke ganas. Taja aku pechayaka ajar Bup Kudus, tang aku enda nitihka ajar nya. Maya nya, aku berengkah gawa nyadi juruelektrik ba lombong arang. Aku kawin maya aku beumur 20 taun. Pengudah tiga taun aku kawin, kami pan bisi anak indu. Tu ngasuh aku berundingka utai ti penting ba pengidup kami. Aku nemu ajar Bup Kudus ulih nulung ruang bilik aku, nya kebuah aku pan berengkah belajar enggau Saksi Jehovah. Tang bini aku nyakal. Enti aku udah abis enggau begempuru, bini aku maksa aku milih entara diri sebilik tauka Bup Kudus. Aku amat sayauka ruang bilik aku, nyadi aku pan badu betemu enggau bala Saksi agi. Lebuh aku ngenang baru kebuah diri ngaga pemutus nya, aku amat nesal laban enda berani ngetanka utai ti betul.

Bisi sekali, orang ke sama gawa nunjukka utai ti kamah tauka pornografi ngagai aku. Keterubah, aku keji meda nya. Tang ba maya ti sama, aku ka meda nya. Aku berasai besalah laban aku nemu Petara begedika utai nya, lalu aku pechaya Iya tentu deka ngukum aku. Tang sayau, aku enda ngelaban pengingin nya. Aku terus meda pornografi nyentukka aku gian.

Sepemanjai 20 taun ke nangkanka nya, pengidup aku majak enda manah. Aku jauh limpang ari utai ke diajar indai aku. Pornografi meri kesan ngagai ulah sereta chara aku bejaku. Aku rindu nyebut utai ti lucu tang kamah, sereta ngembuan runding ti salah pasal seks. Taja aku bisi bini, aku butang. Bisi sekali, aku merening diri empu ba cheramin lalu bejaku kediri, “Aku begedika nuan.” Aku ngasaika diri nadai guna. Aku mega keji enggau diri empu.

Rumah tangga enggau pengidup aku abis anchur. Maya nya, enggau pengabis ati aku besampi ngagai Jehovah. Pengujung iya, aku berengkah belajarka Bup Kudus baru enggau Saksi Jehovah. Maya tu, apai aku udah nadai lalu indai aku udah nyadi Saksi.

Aku nemu, chara pengidup aku udah jauh limpang ari ajar Bup Kudus. Tang aku ka berubah. Aku deka ngasaika pengelantang baka ke disebut ba Bup Kudus. Nyadi, aku naka ulih ngubah chara aku bejaku sereta pemangah aku. Aku mega bebendar ngetuka tebiat aku ti jai baka ulah ti enda bemoral, bejudi, mabuk sereta ngenchuri.

Tang, orang ke sama gawa enda faham nama kebuah aku deka berubah. Pengelama tiga taun, sida majak mai aku pulai baru ngagai pengidup ke suba. Lebuh aku enda tetagangka diri tauka tesebutka jaku ti kasar, sida terus nyindir aku, “Nya iya! Nya baru Joe ke dikelala kami!” Jaku sindir sida ngemediska ati aku, lalu ngasaika diri enda beguna.

Kelimpah ari nya, endur aku gawa mega penuh enggau utai ti kamah, enda ngira nya nengah elektronik tauka ari utai ke dibacha. Orang ke sama gawa selalu nganjung gambar ti kamah nengah komputer. Aku bebendar deka berubah, tang sida sengaja ngelebuka pengeran aku ke deka berubah. Kena aku ngulihka peransang sereta sukung, aku ngiga pengajar Bup Kudus aku, lalu mansutka asai ati aku. Iya ninga enggau sabar, lalu ngena ayat Bup Kudus nulung aku napi gian nya. Iya mega meransang aku bebendar besampi kena minta bantu ari Jehovah.—Masmur 119:37.

Bisi sekali, aku ngangauka orang ke sama enggau aku gawa. Ba entara sida, bisi dua iku orang ke gian ngirup ai bisa. Aku ngasuh orang ke sama gawa ti bukai meri bir ngagai dua iku pekereja nya, tang sida terus nganu lalu madah, “Ni ulih baka nya! Sida tu gian ngirup, lalu benung bebendar ka berubah!” Udah nya, ku aku nyaut sida, “Aku pan benung ka berubah ari gian meda pornografi!” Kenyau ari nya, sida sedar aku benung bebendar deka berubah. Pengujung iya, sida badu agi nekan aku tauka ngumpan aku meda utai ti kamah.

Ari bantu Jehovah, aku ulih muai gian aku nya. Kena 1999, aku dibaptisa. Aku amat beterima kasih laban diberi peluang kedua, lalu aku ulih ngasaika pengidup ti lantang.

Diatu baru meh aku amat nemu kebuah Jehovah begedika semua pengawa aku suba. Iya deka nyaga aku ari kesan ti jai ketegal pornografi. Aku mega setuju enggau jaku ba Jaku-Dalam 3:5, 6, ‘Panggaika diri ba Jehovah enggau pengabis ati nuan. Anang manggaika diri ba penemu diri empu. Awakka Jehovah seruran ngiring nuan, nya baru Iya deka nunjukka jalai ti ngena ngagai nuan.’ Ajar Bup Kudus ukai semina nyaga kitai, tang pia mega nulung kitai mujur ba pengidup.—Masmur 1:1-3.

Suba, aku amat begedika diri empu. Tang diatu, aku majak sayauka diri empu lalu bulih ati ti tenang. Idup aku tuchi. Aku ulih ngasaika sukung ari Petara, sereta pengampun ari Iya. Kena taun 2000, aku jadi enggau Karolin, siku menyadi indu ti bajik, ke rinduka Jehovah lalu kami idup lantang. Aku amat beterima kasih laban ulih nyadi sebagi ari ruang bilik pengarap ti manah sereta bepengerindu.